ཡུ་ཀེ་རེན་གྱི་ ཚོང་འབྲེལ་ལྟེ་བ་ཅིག་ནང་ ར་ཤི་ཡ་གིས་ མི་ཛ་ཡེལ་བཏང་སྟེ་ མི་སེར་ ༡༦ དམར་བསད།

བི་བི་སི།

སྤྱི་ཟླ་ ༦ པའི་ཚེས་ ༢༨ ལུ་ ཡུ་ཀེ་རེན་གྱི་ ཀེ་རེ་མེན་ཅུག་ཁྲོམ་སྡེའི་ ཚོང་འབྲེལ་ལྟེ་བའི་ནང་ ར་ཤི་ཡ་གིས་ མི་ཛ་ཡེལ་བཏང་སྟེ་ དྲག་བཅོམ་འབདཝ་ལས་ མི་སེར་ ༡༦ དེ་ཅིག་ལུ་ ཤི་རྐྱེན་བྱུང་ནུག།

དེ་བསྒང་ འུར་བྱེལ་འཐབ་མི་ ཚོང་འབྲེལ་ལྟེ་བ་དེ་ནང་ ཞི་བའི་མི་སེར་ ༡,༠༠༠ དེ་ཅིག་ཡོད་པའི་ ཚོད་རྩིས་བཏོན་ཡོདཔ་སྦེ་ སྲིད་འཛིན་ཝོ་ལོ་ཌེ་མིར་ ཛི་ལེནཛ་ཀེ་གིས་ གསུངས་ཡོདཔ་ཨིན་པས།

ད་རེས་ ཇར་མ་ནི་ལུ་ རྒྱལ་ཁབ་ཕྱུག་ཤོས་ ༧ གྱི་ དབུ་ཁྲིད་ཚུ་གི་བར་ན་ ཞལ་འཛོམས་ཅིག་ འཚོགས་པའི་བསྒང་ཡོདཔ་ལས་ དབུ་ཁྲིད་དེ་ཚུ་གིས་ ར་ཤི་ཡ་གིས་ དེ་བཟུམ་མའི་ གནོདཔ་བཀལ་མི་དེ་ རྩ་ལས་ར་ ངོས་ལེན་འབད་མ་ཚུགས་པའི་ བྱ་ངན་ཅིག་ཨིན་པའི་ ཁ་བཏང་ནུག།

དབུ་ཁྲིད་ཚུ་གིས་ མཉམ་འབྲེལ་གསལ་བཤད་ཅིག་ནང་ བཀོད་དོ་བཟུམ་འབད་བ་ཅིན་ བརྟག་དཔྱད་མ་འབད་བར་ ཉེས་པ་མེད་པའི་ ཞི་བའི་མི་སེར་ཚུ་ལུ་ གནོདཔ་བཀལ་མི་དེ་ དམག་གི་ཁྲིམས་འགལ་ཨིནམ་སྦེ་ རྩིས་འཇོག་འབད་འོང་ཟེར་ཨིན་པས།

དེ་མ་ཚད་ དྲག་བཅོམ་དེ་ལུ་བརྟེན་ཏེ་ ཡུ་ཀེ་རེན་གྱི་ མི་སེར་ ༥༩ དེ་ཅིག་ལུ་ཡང་ རྨ་སྐྱོན་བྱུང་ཡོདཔ་ལས་ ཤི་རྐྱེན་གྱི་ གྱངས་ཁ་དེ་ ཡར་འཕར་འགྱོ་ནི་ཨིན་པས་ཟེར་ བཀོད་འདུག་པའི་གནས་ཚུལ།