རྒྱལ་ཡོངས་ཚོགས་སྡེའི་ ཁྲི་འཛིན་མཆོག་ལུ་ རྩིས་ལོ་ ༢༠༢༣-༢༠༢༤ གི་ ལོ་བསྟར་རྩིས་ཞིབ་སྙན་ཞུ།

སྤྱི་ཟླ་ ༡༡ པའི་ཚེས་ ༡༩ ལུ་ རྒྱལ་ཡོངས་ཚོགས་སྡེའི་ ཁྲི་འཛིན་མཆོག་ལུ་ རྒྱལ་གཞུང་རྩིས་ཞིབ་དབང་འཛིན་གྱི་ རྩིས་ཞིབ་ཡོངས་ཁྱབ་ བཀྲ་ཤིས་ཀྱིས་ རྩིས་ལོ་ ༢༠༢༣-༢༠༢༤ གི་ ལོ་བསྟར་རྩིས་ཞིབ་སྙན་ཞུ་ གཞུང་འབྲེལ་དུ་ཕུལ་ནུག།
སྙན་ཞུ་དེ་ནང་ ལྷན་ཁག་དང་ ལས་ཁུངས་ ལས་སྡེ་ཚུ་ནང་ གཞུང་གི་ཟད་འགྲོ་དང་ དངུལ་འབྲེལ་འཛིན་སྐྱོང་ མི་མང་ལས་སྡེའི་ འགན་འཁྲི་ཚུ་གི་སྐོར་ལས་ ཤེས་རྟོགས་གཙོ་བོ་ཚུ་ གསལ་བཀོད་འབད་དེ་ཡོདཔ་ད་ དྭངས་གསལ་དང་ འགན་འཁྲི་ མི་མང་ཐོན་སྐྱེད་ཚུ་ དོན་སྨིན་ཅན་སྦེ་ ལག་ལེན་འཐབ་ནི་ལུ་དམིགས་ཏེ་ གལ་ཆེ་བའི་ བལྟ་རྟོག་དང་ གྲོས་འཆར་ཚུ་ཡང་ གསལ་སྟོན་འབད་ཡོདཔ་ཨིན་པས།
ཞལ་འཛོམས་སྐབས་ལུ་ ཁྲི་འཛིན་དང་ རྩིས་ཞིབ་ཡོངས་ཁྱབ་ ༢ ཀྱི་བར་ན་ རྩིས་ཞིབ་ཀྱི་ གྲུབ་འབྲས་དེ་གིས་ སྲིད་བྱུས་བཟོ་ནི་དང་ གཞུང་སྐྱོང་ནང་ ཕན་གནོད་ཚུ་གུ་ གསུང་གྲོས་གཏིང་ཟབ་སྦེ་ གནང་ཡོདཔ་མ་ཚད་ རྒྱལ་ཁབ་ནང་ མི་མང་དངུལ་འབྲེལ་འཛིན་སྐྱོང་ སྒྲིང་སྒྲིང་བཟོ་ནི་དང་ གཙུག་སྡེའི་འགན་འཁྲི་ ཡར་དྲག་གཏང་ཐབས་ལུ་ ལམ་ལུགས་ཀྱི་ གནད་དོན་ཚུ་སེལ་དགོཔ་ གལ་ཆེ་བའི་སྐོར་ལས་ཡང་ གསུང་གྲོས་གནང་ནུག།
དེ་བསྒང་ ཚོགས་སྡེའི་ཁྲི་འཛིན་གྱིས་ རྒྱལ་གཞུང་རྩིས་ཞིབ་དབང་འཛིན་གྱི་ཁ་ཐུག་ལས་ དངུལ་འབྲེལ་གྱི་ འཛིན་སྐྱོང་དྲང་བདེན་ཐོག་ལས་ ལག་ལེན་འཐབ་ནི་ལུ་ འཕྲོ་མཐུད་དེ་ར་ བརྩོན་ཤུགས་བསྐྱེད་མི་ལུ་ བཀའ་དྲིན་དགའ་ཚོར་ཡོད་ལུགས་དང་ རྒྱལ་ཡོངས་ཚོགས་སྡེའི་ ཁ་ཐུག་ལས་ སྙན་ཞུ་བསྐྱར་ཞིབ་འབད་དེ་ སྲིད་བྱུས་གྲོས་ཐག་བཅད་ནི་དང་ ལྟ་རྟོག་ཕན་ནུས་ཅན་གྱི་དོན་ལས་ རྒྱབ་སྐྱོར་གི་ ཁས་བླངས་ཡང་ མཛད་ཡོད་པའི་གནས་ཚུལ།