ཤྲཱི་ལངྐའི་ སྲིད་འཛིན་མཆོག་ དགོངས་ཞུ་མཛད་ནི།

བི་བི་སི།

ཤྲཱི་ལངྐའི་ བློན་ཆེན་གྱི་ ཡིག་ཚང་ལས་ གནས་ཚུལ་གསར་བཏོན་ཅིག་ནང་ བཀོད་དོ་བཟུམ་འབད་བ་ཅིན་  སྲིད་འཛིན་དང་ བློན་ཆེན་གྱི་ གཟིམ་ཅུང་དེ་ ངོ་རྒོལ་འབད་མི་ཚུ་གིས་ སྟོར་བཏང་པའི་ཤུལ་ལུ་ སྲིད་འཛིན་གོ་ཏ་བཱ་ཡ་ ར་ཇ་པག་ས་དེ་ དགོངས་ཞུ་མཛད་ནི་སྦེ་ གཏན་འཁེལ་སོང་ཡོདཔ་ཨིན་པས།

ཨིན་རུང་ ངོ་རྒོལ་འགྲེམ་སྟོན་འབད་མི་ཚུ་གིས་ ད་ལྟོའི་བར་ན་ཡང་ སྲིད་འཛིན་དང་ བློན་ཆེན་གྱི་ གཟིམ་ཅུང་ནང་ སྡོད་ཡོདཔ་ད་ ཁོང་གིས་ བཤད་དོ་བཟུམ་འབད་བ་ཅིན་ འགོ་ཁྲིདཔ་ཚུ་ དགོངསམ་མ་ཞུ་ཚུན་ཚོད་ དེ་ཁ་ལས་ ལོག་མི་འགྱོ་ཟེར་ཨིན་པས།

དེ་འབདཝ་ལས་ རྒྱལ་ཡོངས་ཚོགས་འདུའི་ ཚོགས་དཔོན་གྱིས་ སྤྱི་ཟླ་ ༧ པའི་ཚེས་ ༡༣ ལུ་ སྲིད་འཛིན་དགོངས་ཞུ་མཛད་ནི་ཨིན་ཟེར་ གསུངས་ཡོད་རུང་ ངོ་རྒོལ་འབད་མི་ མང་ཤོས་ཅིག་གིས་ར་ ཁྱབ་བསྒྲགས་དེ་ལུ་ དོགས་པ་སྦོམ་སྦེ་ར་ བསགས་ཡོདཔ་ཨིན་པས།

དེ་མ་ཚད་ སྤྱི་ཟླ་ ༧ པའི་ཚེས་ ༡༡ ལུ་ བློན་ཆེན་གྱི་ ཡིག་ཚང་ལས་ གསར་བཏོན་འབད་མི་གནས་ཚུལ་ཅིག་ནང་ སྲིད་འཛིན་ར་ཇ་པག་ས་དེ་ སྤྱི་ཟླ་ ༧ པའི་ཚེས་ ༡༣ ལུ་ དགོངས་ཞུ་མཛད་ནི་ཨིན་ཟེར་ བཀོད་ཡོད་རུང་ སྲིད་འཛིན་གྱིས་ ཐད་ཀར་དུ་ ག་ནི་ཡང་ གསུངས་གསུངམ་ཅིག་མེད་ཟེར་ཨིན་པས།

ག་དེ་སྦེ་ཨིན་རུང་ རྩ་ཁྲིམས་ཆེན་མོ་དང་འཁྲིལ་བ་ཅིན་ སྲིད་འཛིན་ལས་ དགོངས་ཞུ་འབད་ནིའི་དོན་ལུ་ རྒྱལ་ཡོངས་ཚོགས་འདུའི་ ཚོགས་དཔོན་ལུ་ དགོངས་ཞུའི་ཡི་གུ་ བཙུགས་པའི་ཤུལ་ལས་ ངོས་ལེན་འབདཝ་ཨིན་རུང་ ཡིག་ཐོག་ལུ་ ག་ནི་ཡང་མེད་ཟེར་ཨིནམ་ད་ བློན་ཆེན་གྱི་ཐད་ཁར་ དགོངསམ་ཞུ་ནི་ཨིན་ཟེར་ ཧེ་མ་ལས་ར་ གསུངས་ཏེ་ཡོདཔ་སྦེ་ བཀོད་འདུག་པའི་གནས་ཚུལ།