བང་ལ་དེཤ་ རྒྱལ་ཁབ་ནང་ ཆར་ཆུ་འབོལ་བའི་སྟབས་ཀྱིས་ ཆུ་རུད་ཐོན་ཏེ་ མི་སེར་མང་རབས་ཅིག་ལུ་གནོད་སྐྱོན།

ཨེན་ཌི་ཊི་ཝི།
སྤྱི་ཟླ་ ༦ པའི་ཚེས་ ༡༧ ལུ་ དབང་འཛིན་འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ གནམ་བྱཱར་གྱི་ ཆར་ཆུ་འབོལ་བའི་སྟབས་ཀྱིས་ བང་ལ་དེཤ་ལུ་ ཆུ་རུད་ལན་ཐེངས་ ༢ པ་ ཐོན་ཡོདཔ་ལས་ མི་སེར་ཚུ་ལུ་ རྒྱབ་སྐྱོར་འབད་ནིའི་དོན་ལས་ དམག་མི་ཚུ་ བགོ་བཀྲམ་འབད་ཡི་ཟེར་ཨིན་པས།
དེ་ཡང་ བང་ལ་དེཤ་གི་ ས་ཁ་དམའ་སར་སྡོད་མི་ མི་སེར་ས་ཡ་ལས་བཅད་མི་ཚུ་ལུ་ ཆུ་རུད་ཀྱིས་ གནོད་ཉེན་བྱུང་ཡོདཔ་ད་ མཁས་མཆོག་ཚུ་གིས་ བཤད་དོ་བཟུམ་འབད་བ་ཅིན་ དེ་སྦེ་ ཆུ་རུད་ཡར་འཕར་འགྱོ་མི་དེ་ གནམ་གཤིས་འགྱུར་བགྲོད་ལུ་བརྟེན་ཏེ་ འོང་ནི་མས་ཟེར་ཨིན་པས།
བང་ལ་དེཤ་གི་ ཤར་ལྷོའི་ས་གནས་ཚུ་ ཆུ་ནང་ཐིམས་ཡོདཔ་ད་ གནམ་གཤིས་སྔོན་བཤད་དང་འཁྲིལ་བ་ཅིན་ བདུན་མཐའི་ནང་ གནས་སྟངས་དེ་ སྐྱོ་དྲགས་ཅིག་ལུ་ འགྱུར་ནི་མས་ཟེར་ཨིན་པས།
མི་སེར་ས་ཡ་ ༢ ལྷགཔ་ཅིག་ལུ་ ཆུ་རུད་ཀྱིས་ གནོད་སྐྱོན་བྱུང་ཡོདཔ་ལས་ རྒྱལ་ཁབ་ནང་འཁོད་ཀྱི་ སློབ་རིམ་ཁང་མིག་ཚུ་ མི་སེར་ཚུ་གི་ གནས་སྐབས་ཀྱི་ སྡོད་ཁྱིམ་སྦེ་ ལག་ལེན་འཐབ་པ་ལུ་བརྟེན་ཏེ་ སློབ་གྲྭའི་ཆོས་རྒྱུགས་ཚུ་ཡང་ ཕར་འགྱངས་འབད་ནུག།
དེ་མ་ཚད་ མི་སེར་ཚུ་གིས་ རང་སོའི་གྲུ་ཆུང་ཚུ་ཡང་ གནས་སྐབས་ཀྱི་ སྡོད་ཁྱིམ་སྦེ་ ལག་ལེན་འཐབ་དོ་ཡོདཔ་ད་ མི་སེར་ཚུ་ སྲོག་སྐྱབས་འབད་ནིའི་དོན་ལས་ དམག་མི་ཚུ་ བགོ་བཀྲམ་འབད་དེ་ཡོདཔ་སྦེ་ འགོ་དཔོན་ཚུ་གིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།