བསམ་གྲུབ་ལྗོངས་མཁར་ མར་ཚ་ལའི་ རྒེད་འོག་ནང་ རི་དྭགས་སེམས་ཅན་ཚུ་གིས་ གནོདཔ་བཀལ་བའི་དཀའ་ངལ།

སྒྲོལ་མ་ཡེ་ཤེས།
བསམ་གྲུབ་ལྗོངས་མཁར་ མར་ཚ་ལའི་ རྒེད་འོག་ནང་ རི་དྭགས་སེམས་ཅན་ཚུ་གིས་ གནོདཔ་བཀལཝ་ལས་ རྒེད་འོག་དེ་ནང་གི་ མི་སེར་ཚུ་ལུ་ དཀའ་ངལ་སྦོམ་ཡོདཔ་མ་ཚད་ གནམ་བྱཱར་གྱི་ནམ་དུས་ལུ་ འཁོར་ལམ་ཚུ་ ཆུ་རུད་དང་ ས་རུད་ཀྱིས་ འཕྱག་བདའ་སྟེ་ ལམ་འགྲུལ་འབད་མ་ཚུགས་པའི་ དཀའ་ངལ་ཡང་ཡོད་ཟེར་ཨིན་པས།
དེ་ཡང་ སྐྱེས་ལོ་ ༤༠ འབད་མི་ མར་ཚ་ལའི་རྒཔོ་ ཡོན་ཏན་རྡོ་རྗེ་གིས་ བཤད་ཡོདཔ་ད་ དེ་སྦེ་ གླངམོ་ཆེ་དང་ རི་ཕག་ སྤྱ་ལ་སོགས་པའི་ རི་དྭགས་སེམས་ཅན་ཚུ་གིས་ གནོདཔ་བཀལ་ནི་ལས་ བཀག་ཐབས་ལུ་ ཐབས་ཤེས་ཚུ་ སྟོན་ཡོད་རུང་ བཀག་མ་ཚུགས་པར་ ལོ་ཐོག་ཚུ་ལུ་ གནོདཔ་བཀལ་བཞིན་དུ་ཡོད་ཟེར་ བཤདཔ་ཨིན་པས།
རྒེད་འོག་དེ་ཁར་ སྤྱི་འོག་ ༦ གི་ནང་ གུང་གྲངས་ ༦༢༡ དང་ གུང་སྟོང་ ༩ ཡོདཔ་ད་ མི་རློབས་ ༥,༠༡༡ ལྷགཔ་ཅིག་ཡོདཔ་ཨིན་པས།
ཡོན་ཏན་རྡོ་རྗེ་གིས་ སློབ་རིམ་ ༡༠ པ་ཚུན་ ལྷབ་པའི་ཤུལ་ལུ་ སྤྱི་ལོ་ ༢༠༠༤ ལས་ ༢༠༡༡ ཚུན་ གཞི་རྟེན་ཤེས་ཡོན་གྱི་ སློབ་དཔོན་སྦེ་ ཕྱག་ཞུ་ཡོདཔ་ད་ སྤྱི་ལོ་ ༢༠༡༡ ལུ་ ས་གནས་གཞུང་གི་ བཙག་འཐུ་ཐེངས་ ༡ པའི་ནང་ བཅའ་མར་གཏོགས་ཡོདཔ་བཞིན་དུ་ རྒ་པོའི་གོ་གནས་ཁར་ བཙག་འཐུ་གྲུབ་ཡོདཔ་ལས་ ལོ་ངོ་ ༥ གི་རིང་ལུ་ ཕྱག་ཞུ་ནུག།
ཨིན་རུང་ བཙག་འཐུ་ཐེངས་ ༢ པའི་ནང་ བཙག་འཐུ་གྲུབ་མ་ཚུགསཔ་ལས་ ལོ་ངོ་ ༥ གི་རིང་ལུ་ ཀུན་ཕན་ནོར་བདེ་བཟོ་གྲྭ་ཚད་འཛིན་ནང་ བདག་སྐྱོང་འགོ་དཔོན་སྦེ་ སྡོད་ཡོདཔ་ད་ ན་ཧིང་ བཙག་འཐུ་ཐེངས་ ༣ པའི་ནང་ བཅའ་མར་གཏོགས་ཡོདཔ་ལས་ བཙག་འཐུ་གྲུབ་ཡོད་པའི་གནས་ཚུལ།