བྷའི་ཅུང་བྷུ་ཊི་ཡ་དེ་ ཧམ་རོ་སི་ཀིམ་པར་ཊིའི་ གཙོ་འཛིན་གསརཔ་སྦེ་ བཙགས་འཐུ་གྲུབ་ཡོདཔ།

ཨེན་ཌི་ཊི་ཝི།

སྤྱི་ཟླ་ ༩ པའི་ཚེས་ ༢༠ ལུ་ སྐྱེས་ལོ་ ༤༥ འབད་མི་ སྐད་གྲགས་ཅན་གྱི་ ཕུཊ་བཱོལ་ལར་ཟེར་ རྐང་རིལ་རྩེད་འགྲན་པ་ བྷའི་ཅུང་བྷུ་ཊི་ཡ་དེ་ ཧམ་རོ་སི་ཀིམ་པར་ཊི་ཟེར་མི་ སྲིད་དོན་ཚོགས་པའི་ གཙོ་འཛིན་གསརཔ་སྦེ་ བཙགས་འཐུ་འབད་ནུག།

དེ་ཡང་ ཧམ་རོ་སི་ཀིམ་པར་ཊིའི་ འགོ་ཁྲིདཔ་དང་ འཐུས་མི་ཚུ་གི་བར་ན་ ཞལ་འཛོམས་ཅིག་ འཚོགས་པའི་སྐབས་ལུ་ མགྲིན་གཅིག་གི་ཐོག་ལས་ བཙགས་འཐུ་གྲུབ་ཅི་ཟེར་ ཚོགས་པ་དེ་གི་ ཡོངས་ཁྱབ་དྲུང་ཆེན་ བི་རཱཤ་ ཨ་དྷི་ཀ་རི་གིས་ བཤད་ཡོདཔ་ཨིན་པས།

ག་དེམ་ཅིག་སྦེ་ བྷའི་ཅུང་བྷུ་ཊི་ཡ་དེ་ མ་འོངས་པ་ལུ་ མངའ་སྡེའི་འགོ་ཁྲིདཔ་སྦེ་ བཙག་འཐུ་འགྲུབ་པ་ཅིན་ མི་སེར་ཚུ་གི་ རེ་འདོད་འགྲུབ་ཐབས་ལུ་ འགན་ཁུར་དང་ འགན་འཁྲི་ཚུ་ འཐུས་ཤོར་མེད་པར་ འབག་ནི་ཨིན་པའི་ཁར་ ངན་ལྷད་ཚུ་ཡང་ ཕྱི་གསལ་ནང་གསལ་འབད་དེ་ མི་སེར་གྱི་དོན་ལུ་ ཕྱག་ཕྱིད་གང་དྲག་ཞུ་ཚུགས་པའི་ བློ་གཏད་ཡོད་ཟེར་ཨིན་པས།

དེ་མ་ཚད་ མི་སྡེ་དེ་ནང་ འདྲ་མཉམ་དང་ དྲང་བདེན་ཐོག་ལུ་ གོང་འཕེལ་གྱི་ གོ་སྐབས་ཡངས་དྲགས་བཟོ་སྟེ་ མི་སེར་ཚུ་ལུ་ ནུས་པ་ཡོད་པའི་ མངའ་སྡེ་ཅིག་ལུ་ཡང་ འགྱུར་ཚུགས་པའི་ དམིགས་གཏད་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།