མི་དབང་མངའ་བདག་རིན་པོ་ཆེ་མཆོག་ལུ་ གཞུང་ཚབ་ ༦ གིས་ གཞུང་ཚབ་ངོ་སྤྲོད་ཀྱི་ ཡིག་ཆ་ཕུལ་ཡོདཔ།

ཨྱོན་ཚེ་རིང་།

སྤྱི་ཟླ་ ༦ པའི་ཚེས་ ༨ ལུ་ བཀྲིས་ཆོས་རྫོང་གི་ ཀུན་རའི་ནང་སྦེ་ མི་དབང་མངའ་བདག་རིན་པོ་ཆེ་མཆོག་ལུ་ ཇར་མ་ནི་དང་ ཨར་ཇིན་ཊི་ན་ མཐའ་ཡས་ལེན་ ཀུས་བཱ་ ཨིཛ་རེལ་ ཀོ་ལོམ་བི་ཡ་ རྒྱལ་ཁབ་ ༦ གི་ གཞུང་ཚབ་ཚུ་གིས་ རང་སོའི་ངོ་སྤྲོད་ཡིག་ཆ་ཚུ་ ཕུལ་ཡོདཔ་ཨིན་པས།

དེ་ཡང་ རྒྱ་གར་གྱི་རྒྱལ་ས་ ནིའུ་དྷི་ལི་ལུ་ གནས་སྡོད་ཐོག་ལས་ ཝཱལ་ཊར་ ཇེ་ ལིན་ནར་དེ་ འབྲུག་ལུ་ ཇར་མཱན་གྱི་ གཞུང་ཚབ་དང་པ་ཨིནམ་ད་ ལིན་ནར་དེ་ སྤྱི་ལོ་ ༢༠༢༡ སྤྱི་ཟླ་ ༣ པའི་ཚེས་ ༣ ལུ་ གཞུང་ཚབ་སྦེ་ བསྐོ་བཞག་འབད་ནུག།

འབྲུག་དང་ ཇར་མ་ནི་ རྒྱལ་ཁབ་ ༢ ཀྱི་བར་ན་ ཕྱི་འབྲེལ་དོན་གཅོད་མཐུན་འབྲེལ་དེ་ སྤྱི་ལོ་ ༢༠༢༠ སྤྱི་ཟླ་ ༡༡ པའི་ཚེས་ ༢༥ ལུ་ གཞི་བཙུགས་མཛད་ཡོདཔ་ཨིན་པས།

དེ་བཟུམ་སྦེ་ ནིའུ་དྷི་ལི་ལུ་ གནས་སྡོད་ཐོག་ལས་ འབྲུག་ལུ་ ཧུ་གོ་ཇ་ཝིར་ གོབ་བི་དེ་ ཨར་ཇིན་ཊི་ནའི་ གཞུང་ཚབ་ ༤ པ་ཨིནམ་ད་ གོབ་བི་དེ་ཡང་ སྤྱི་ལོ་ ༢༠༢༡ སྤྱི་ཟླ་ ༣ པའི་ཚེས་ ༤ ལུ་ ཨར་ཇིན་ཊི་ནའི་ གཞུང་ཚབ་སྦེ་ བསྐོ་བཞག་འབད་ནུག།

འབྲུག་དང་ ཨར་ཇིན་ཊི་ན་ རྒྱལ་ཁབ་ ༢ ཀྱི་བར་ན་ ཕྱི་འབྲེལ་དོན་གཅོད་མཐུན་འབྲེལ་དེ་ སྤྱི་ལོ་ ༢༠༡༢ སྤྱི་ཟླ་ ༣ པའི་ཚེས་ ༡༢ ལུ་ གཞི་བཙུགས་མཛད་ཡོདཔ་ཨིན་པས།

དེ་ལས་ བང་ལ་དེཤ་གི་རྒྱལ་ས་ ཌ་ཀ་ལུ་ གནས་སྡོད་ཐོག་ལས་ མ་ཀ་ཝ་དི་ སུ་མིཏ་མོར་དེ་ འབྲུག་ལུ་ མཐའ་ཡས་ལེན་གྱི་ གཞུང་ཚབ་ ༡༢ པ་ཨིནམ་ད་ སུ་མིཏ་མོར་དེ་ སྤྱི་ལོ་ ༢༠༢༡ སྤྱི་ཟླ་ ༧ པའི་ཚེས་ ༢༥ ལུ་ གཞུང་ཚབ་སྦེ་ བསྐོ་བཞག་འབད་ནུག།

འབྲུག་དང་ མཐའ་ཡས་ལེན་ རྒྱལ་ཁབ་ ༢ ཀྱི་བར་ན་ ཕྱི་འབྲེལ་དོན་གཅོད་མཐུན་འབྲེལ་དེ་ སྤྱི་ལོ་ ༡༩༨༩ སྤྱི་ཟླ་ ༡༡ པའི་ཚེས་ ༡༤ ལུ་ གཞི་བཙུགས་མཛད་ཡོདཔ་ཨིན་པས།

ད་རུང་ ནིའུ་དྷི་ལི་ལུ་ གནས་སྡོད་ཐོག་ལས་ ཨ་ལེ་ཇཱན་ཌོ་ སི་མཱན་ཀཱཛ་ མ་རིན་དེ་ འབྲུག་ལུ་ ཀུས་བཱའི་གཞུང་ཚབ་ ༣ པ་ཨིནམ་ད་ མ་རིན་དེ་ སྤྱི་ལོ་ ༢༠༢༡ སྤྱི་ཟླ་ ༧ པའི་ཚེས་ ༢༨ ལུ་ གཞུང་ཚབ་སྦེ་ བསྐོ་བཞག་འབད་ནུག།

འབྲུག་དང་ ཀུས་བཱའི་རྒྱལ་ཁབ་ ༢ ཀྱི་བར་ན་ ཕྱི་འབྲེལ་དོན་གཅོད་མཐུན་འབྲེལ་དེ་ སྤྱི་ལོ་ ༢༠༡༡ སྤྱི་ཟླ་ ༩ པའི་ཚེས་ ༢༦ ལུ་ གཞི་བཙུགས་མཛད་ཡོདཔ་ཨིན་པས།

དེ་མ་ཚད་ ནིའུ་དྷི་ལི་ལུ་ གནས་སྡོད་ཐོག་ལས་ ན་འོར་གི་ལཱོན་དེ་ཡང་ འབྲུག་ལུ་ ཨིཛ་རེལ་གྱི་ གཞུང་ཚབ་ ༡ པ་ཨིནམ་ད་ གི་ལཱོན་དེ་ སྤྱི་ལོ་ ༢༠༢༡ སྤྱི་ཟླ་ ༩ པའི་ཚེས་ ༡ ལུ་ གཞུང་ཚབ་སྦེ་ བསྐོ་བཞག་འབད་ནུག།

འབྲུག་དང་ ཨིཛ་རེལ་ རྒྱལ་ཁབ་ ༢ ཀྱི་བར་ན་ ཕྱི་འབྲེལ་དོན་གཅོད་མཐུན་འབྲེལ་དེ་ སྤྱི་ལོ་ ༢༠༢༠ སྤྱི་ཟླ་ ༡༢ པའི་ཚེས་ ༡༢ ལུ་ གཞི་བཙུགས་མཛད་ཡོདཔ་ཨིན་པས།

ནིའུ་དྷི་ལི་ལུ་ གནས་སྡོད་ཐོག་ལས་ མ་རི་ཡ་ན་ པ་ཆེ་ཀོ་ མཱོན་ཊེཛ་དེ་ཡང་ འབྲུག་ལུ་ ཀོ་ལོམ་བི་ཡའི་ གཞུང་ཚབ་ ༤ པ་ཨིནམ་ད་ མཱོན་ཊེཛ་དེ་ སྤྱི་ལོ་ ༢༠༢༡ སྤྱི་ཟླ་ ༡༡ པའི་ཚེས་ ༢༤ ལུ་ གཞུང་ཚབ་སྦེ་ བསྐོ་བཞག་འབད་ནུག།

འབྲུག་དང་ ཀོ་ལོ་བི་ཡའི་ རྒྱལ་ཁབ་ ༢ ཀྱི་བར་ན་ ཕྱི་འབྲེལ་དོན་གཅོད་མཐུན་འབྲེལ་དེ་ སྤྱི་ལོ་ ༢༠༡༢ སྤྱི་ཟླ་ ༡༢ པའི་ཚེས་ ༢༡ ལུ་ གཞི་བཙུགས་མཛད་ཡོདཔ་ཨིན་པས།

ཕྱི་འབྲེལ་ལྷན་ཁག་ལས་ གསར་བཏོན་འབད་མི་ གནས་ཚུལ་ཅིག་ནང་ བཀོད་དོ་བཟུམ་འབད་བ་ཅིན་ གཞུང་ཚབ་ཚུ་གིས་ མི་རྗེ་བློན་ཆེན་གྱིས་གཙོས་པའི་ ཕྱི་འབྲེལ་བློན་པོ་དང་ གཞུང་གི་ཆེ་མཐོའི་འགོ་དཔོན་ཚུ་དང་ཡང་ མཇལ་ཕྲད་ཐོག་ལས་ མཐུན་འབྲེལ་དང་ རྒྱལ་ཁབ་ཕན་ཚུན་ལུ་ཕན་པའི་ གསུང་གྲོས་ཚུ་ གནང་ཡི་ཟེརཨིན་པས།

སྤྱི་ལོ་ ༢༠༢༠ སྤྱི་ཟླ་ ༡ པ་ལས་ ད་ཚུན་གྱི་རིང་ལུ་ གཞུང་ཚབ་ཀྱི་ ངོ་སྤྲོད་ཡིག་ཆ་ཚུ་ ཕུལ་མི་དེ་ འགོ་དང་པ་ཨིན་པའི་གནས་ཚུལ།