འབྲུག་གཞུང་གིས་ རྒྱ་པཱན་གཞུང་ལས་ དངུལ་ཀྲམ་ཐེར་འབུམ་ ༢ ལྷགཔ་ཅིག་ སྐྱིན་འགྲུལ་ལེན་ནི།

ནད་ཡམས་ཀོ་ཝིཌ་-༡༩ གི་ གནས་སྟངས་ཚབས་ཆེན་ནང་ རྒྱ་པཱན་གཞུང་གིས་ འབྲུག་གཞུང་ལུ་ རྒྱ་པཱན་གྱི་ཏི་རུ་ ཡན་ཐེར་འབུམ་ ༣.༣ འབདཝ་ད་ དངུལ་ཀྲམ་ཐེར་འབུམ་ ༢ ལྷགཔ་ཅིག་ གློ་བུར་སྐྱིན་འགྲུལ་ བྱིན་ནི་ཨིན་པས།
དེ་ཡང་ སྤྱི་ཟླ་ ༥ པའི་ཚེས་ ༢༠ ལུ་ རྒྱ་གར་གྱི་རྒྱལ་ས་ ནིའུ་ལྡི་ལི་ལུ་ འབྲུག་གི་གཞུང་ཚབ་ བི་རྣམ་རྒྱལ་དང་ རྒྱ་པཱན་གཞུང་ཚབ་ཡིག་ཚང་གི་ གཞུང་ཚབ་འགན་འཛིན་ ཀ་ཝ་ཟུ་ ཀུ་ནི་ཧི་ཀོ་གིས་ སྐྱིན་འགྲུལ་རྒྱབ་སྐྱོར་གྱི་ ཆིངས་ཡིག་གུ་ མིང་རྟགས་བཀོད་ནུག།
སྐྱིན་འགྲུལ་དེ་ གཞུང་འབྲེལ་གོང་འཕེལ་གྲོགས་རམ་ལས་ སྐྱེད་ཀྱི་ཚད་གཞི་དམའ་སུ་དང་ བསྐྱིན་ཚབ་ཡང་ བྱ་སྟབས་གང་བདེའི་ཐོག་ལུ་ སྤྲོད་ནི་སྦེ་ཨིནམ་ད་ སྐྱིན་འགྲུལ་དེ་གིས་ ནད་ཡམས་ཀྱི་ཤུལ་ལས་ འབྲུག་རྒྱལ་ཁབ་ཀྱི་ དཔལ་འབྱོར་བསྐྱར་གསོའི་ བརྩོན་ཤུགས་ཚུ་ལུ་ ལྷན་ཐབས་འབྱུང་ནི་ཨིན་པས།
སྐྱིན་འགྲུལ་ཆིངས་ཡིག་གུ་ མིང་རྟགས་བཀོད་པའི་སྐབས་ལུ་ འབྲུག་གི་གཞུང་ཚབ་ བི་རྣམ་རྒྱལ་གྱིས་ མི་དབང་མངའ་བདག་རིན་པོ་ཆེའི་ དབུ་ཁྲིད་དང་ ལམ་སྟོན་བཟང་པོའི་འོག་ལུ་ འབྲུག་གིས་ ནད་ཡམས་འཛིན་སྐྱོང་ནང་ མིག་དཔེ་བཟང་པོ་ སྟོན་ཡོདཔ་བཞིན་དུ་ ད་ལས་ཕར་ འབྲུག་གཞུང་ལུ་ ནད་ཡམས་ལུ་བརྟེན་ཏེ་ གནོད་སྐྱོན་སྦོམ་བྱུང་མི་ དཔལ་འབྱོར་གོང་འཕེལ་ཐོག་ལས་ སྒྲིང་སྒྲིང་བཟོ་ནི་ལུ་ གཙོ་རིམ་བཟུང་འོང་ཟེར་བཤད་ནུག།
དེ་མ་ཚད་ རྒྱ་པཱན་གྱིས་ གཞུང་འབྲེལ་གོང་འཕེལ་ གྲོགས་རམ་ཐོག་ལུ་ སྐྱིན་འགྲུལ་བྱིན་མི་དེ་གིས་ འབྲུག་གི་དཔལ་འབྱོར་ བསྐྱར་གསོའི་ ལས་སྣ་ཚུ་ལུ་ ཕན་ཐོགས་སྦོམ་སྦེ་ར་འབྱུང་པའི་ རེ་བ་ཡོད་ཟེར་ཨིན་པས།
རྒྱ་པཱན་གཞུང་ཚབ་འགན་འཛིན་ ཀ་ཝ་ཟུ་ ཀུ་ནི་ཧི་ཀོ་གིས་ རྒྱ་པཱན་གཞུང་ལས་ ནད་ཡམས་ཀོ་ཝིཌ་-༡༩ གི་ གནས་སྟངས་ཚབས་ཆེན་ནང་ གློ་བུར་སྐྱིན་འགྲུལ་ བྱིན་མི་དེ་གིས་ འབྲུག་གི་གོང་འཕེལ་ལས་སྣ་ཚུ་གིས་མ་ཚད་པར་ རྒྱ་པཱན་དང་ འབྲུག་གི་བར་ན་ འཕྲུལ་རིག་མཉམ་འབྲེལ་ལུ་ཡང་ ལྷན་ཐབས་འབྱུང་པའི་ རེ་བ་ཡོད་ལུགས་ཚུ་བཤད་ནུག།
གཞུང་ཚབ་བི་རྣམ་རྒྱལ་གྱིས་ ད་ཚུན་གྱི་བར་ན་ རྒྱ་པཱན་གྱིས་ འབྲུག་གི་མི་སྡེའི་དཔལ་འབྱོར་ གོང་འཕེལ་དང་ ནད་ཡམས་ཀྱི་སྐབས་ལུ་ བརྩེ་བའི་གྲོགས་རམ་ཚུ་ གང་དྲག་བྱིན་མི་དང་ ད་ལས་ཕར་ཡང་ རྒྱབ་སྐྱོར་ཚུ་ འཕྲོ་མཐུད་དེ་ར་ བྱིན་ནི་གི་ ཁས་ལེན་འབད་མི་ལུ་ འབྲུག་གཞུང་དང་ མི་སེར་གྱི་ ཁ་ཐུག་ལས་ རྒྱ་པཱན་གཞུང་དང་ མི་སེར་ཚུ་ལུ་ ཧིང་དྭངས་མའི་དཀྱིལ་ལས་ར་ ཡིད་ཆེས་དང་ ངལ་རངས་ཡོད་ལུགས་ཚུ་ བཤད་ཡོདཔ་ཨིན་པའི་གནས་ཚུལ།