འབྲུག་གིས་ རྒྱལ་སྤྱིའི་ས་མཚམས་སྒོ་ར་ཁ་ཚུ་ སྒོ་ཕྱེ་མི་དང་འབྲེལ་ཏེ་ བཀྲིས་ལེགས་དར་གྱི་བསུ་བ།

ཡིག་ཚང་ལས་བྱེདཔ།
སྤྱི་ཟླ་ ༩ པའི་ཚེས་ ༢༣ ལུ་ འབྲུག་གིས་ རྒྱལ་སྤྱིའི་ས་མཚམས་སྒོ་ར་ཁ་ཚུ་ ལོ་ངོ་ཕྱེད་དང་ ༣ གྱི་རྒྱབ་ལས་ སྒོ་ཕྱེ་ནི་དེ་གིས་ རྒྱ་འབྲུག་གི་ ས་མཚམས་ཁག་ལུ་སྡོད་མི་ རྒྱལ་ཁབ་ཕྱི་ནང་གི་ མི་སེར་ཚུ་ག་ར་ དགའ་སྤྲོའི་ཐོག་ལས་ ཕན་ཚུན་རྒྱུན་འགྲུལ་འཐབ་ནི་ འགོ་བཙུགས་ནུག།
དེ་ཡང་ མི་རྗེ་བློན་ཆེན་ ཌོག་ཊར་བློ་གྲོས་ཚེ་རིང་གིས་ ཕུན་ཚོགས་གླིང་ལུ་ རྐང་ཐང་སྦེ་ འཐོན་འཛུལ་ས་ཁོངས་ སྒོ་འབྱེད་གནང་མི་དང་འབྲེལ་ཏེ་ བསམ་རྩེ་དང་ དགེ་ལེགས་ཕུག་ བསམ་གྲུབ་ལྗོངས་མཁར་ཚུ་གི་ ས་མཚམས་སྒོ་ར་ཁ་ཚུ་ཡང་ སྒོ་ཕྱེ་ཡོདཔ་ཨིན་པས།
ཉིནམ་དེ་ཁར་ རྒྱ་གར་ལས་ མི་བརྒྱ་ཕྲག་སྦེ་ རྒྱལ་ཁབ་ནང་ འཛུལ་ཞུགས་འབད་མི་ཚུ་དང་ རྒྱལ་སྤྱིའི་ལྟ་བཤལཔ་ཚུ་ལུ་ བཀྲིས་བདེ་ལེགས་ཀྱི་ ཁ་དར་དང་བཅསཔ་སྦེ་ བསུ་བ་འབད་ཡོདཔ་མ་ཚད་ འབྲུག་མི་ཚུ་ཡང་ རྒྱ་འབྲུག་ས་མཚམས་ཀྱི་ ཉེ་འདབས་ལུ་ཡོད་མི་ ཚོང་ཁྲོམ་ཚུ་ནང་ དགའ་སྤྲོ་དང་བཅས་པའི་སྒོ་ལས་ བཤལ་བར་འགྱོ་ནི་ འགོ་བཙུགས་ནུག།
དེ་བཟུམ་སྦེ་ སྤ་རོ་རྒྱལ་སྤྱི་གནམ་ཐང་ནང་ལྷོད་མི་ རྒྱལ་སྤྱིའི་ལྟ་བཤལཔ་ཚུ་ཡང་ འབྲུག་གཞུང་གི་ འགོ་དཔོན་ཚུ་དང་ ལྟ་བཤལ་ལས་སྡེ་ཚུ་གིས་ བཀྲིས་བདེ་ལེགས་ཀྱི་ ཁ་དར་དང་བཅསཔ་སྦེ་ བསུ་བ་འབད་ཡོདཔ་ཨིན་པས།
ལྟ་བཤལཔ་ཚུ་ཡང་ ནེ་པཱལ་ལས་ འཕུར་འགྲུལ་འབད་མི་ གནམ་གྲུའི་ནང་ ལྟ་བཤལཔ་ ༢༤ དང་ རྒྱ་གར་ནིའུ་དྷི་ལི་ལས་ འཕུར་འགྲུལ་འབད་མི་ གནམ་གྲུའི་ནང་ ༤༦ བེང་ཀོག་ལས་ འཕུར་འགྲུལ་འབད་མི་ གནམ་གྲུའི་ནང་ ༣༤ རྒྱ་གར་ཀཱོལ་ཀ་ཊ་ལས་ འཕུར་འགྲུལ་འབད་མི་ གནམ་གྲུའི་ནང་ ༡༦ འབདཝ་ད་ ཉིནམ་ ༡ ལུ་ར་ ལྟ་བཤལཔ་བསྡོམས་ ༡༢༠ ལྷོད་ཡོད་པའི་གནས་ཚུལ།