འབྲུག་དང་ རྒྱ་པཱན་གྱི་བར་ན་ དཔལ་འབྱོར་མཉམ་འབྲེལ་གྱི་ ལོ་བསྟར་གྲོས་འཛོམས།

ཡིག་ཚང་ལས་བྱེདཔ།

སྤྱི་ཟླ་ ༧ པའི་ཚེས་ ༢༧ ལུ་ འབྲུག་དང་ རྒྱ་པཱན་གྱི་བར་ན་ དཔལ་འབྱོར་མཉམ་འབྲེལ་གྱི་ ལོ་བསྟར་གྲོས་འཛོམས་ ཐེངས་ ༡༧ པ་ ཐིམ་ཕུ་ལུ་སྦེ་ འཚོགས་ཡོདཔ་ཨིན་པས།

དེ་ཡང་ འབྲུག་གི་ཁ་ཐུག་ལས་ ཕྱི་འབྲེལ་ལྷན་ཁག་ ཟུང་ཕྱོགས་ལས་ཁུངས་ཀྱི་མདོ་ཆེན་ མཚོ་སྐྱིད་ཆོས་སྒྲོན་དང་ རྒྱ་པཱན་གྱི་ ཁ་ཐུག་ལས་ རྒྱ་གར་ནིའུ་དྷི་ལིར་ཡོད་མི་ རྒྱ་པཱན་གཞུང་ཚབ་ལས་ཁང་གི་ དྲུང་ཆེན་དང་པ་ ཧི་རོ་ཡུ་ཀི་ ཡ་མ་ཤི་ཏ་ ༢ ཀྱིས་ འགོ་ཁྲིད་ཐོག་ལུ་འཚོགས་ནུག།

དེ་བཟུམ་སྦེ་ འབྲུག་ལུ་ཡོད་མི་ རྒྱ་པཱན་ཇའི་ཀ་ཡིག་ཚང་གི་ སྐུ་ཚབ་གཙོ་འཛིན་ ཀོ་ཟོ་ཝ་ཏ་ན་བེ་དང་ འབྲུག་གཞུང་དང་ ཇའི་ཀ་ཡིག་ཚང་གི་ འགོ་དཔོན་ཚུ་གིས་ཡང་ བཅའ་མར་གཏོགས་ཡོདཔ་ཨིན་པས།

གྲོས་འཛོམས་དེ་ནང་ འབྲུག་གི་འཐུས་མི་སྡེ་ཚན་གྱི་ ཁ་ཐུག་ལས་ ལོ་ལྔའི་འཆར་གཞི་ ༡༢ པའི་ དུས་མཐུན་སྙན་ཞུ་དང་ འཆར་གཞི་ ༡༣ པའི་ ཟིན་བྲིས་ཚུ་ གསལ་བཤད་འབད་ཡོདཔ་ད་ རྒྱལ་ཁབ་གཉིས་ཆ་རའི་ ཁ་ཐུག་ལས་ ད་རེས་ནངས་པར་ ལག་ལེན་འཐབ་བཞིན་དུ་ཡོད་མི་ ལས་འགུལ་ཚུ་ལུ་ཡང་ བསྐྱར་ཞིབ་འབད་ནུག།

དེ་མ་ཚད་ ཕྱི་འབྲེལ་ལྷན་ཁག་ལས་ གསར་བཏོན་འབད་མི་ གནས་ཚུལ་ཅིག་ནང་ བཀོད་དོ་བཟུམ་འབད་བ་ཅིན་ འབྲུག་གཞུང་གིས་ རྒྱ་པཱན་གཞུང་ལུ་ ལས་འགུལ་གསརཔ་ཚུ་གི་ གྲོས་འཆར་བཙུགས་མི་ཚུ་ལུ་ཡང་ གྲོས་བསྡུར་འབད་ཡི་ཟེར་ཨིན་པས།

སྤྱི་ལོ་ ༢༠༠༦ ལུ་ འབྲུག་དང་ རྒྱ་པཱན་གྱི་བར་ན་ ལོ་བསྟར་གྲོས་འཛོམས་དེ་ འགོ་བཙུགས་ཞིནམ་ལས་ཚུར་ རྒྱལ་ཁབ་ ༢ ཀྱི་བར་ན་ དཔལ་འབྱོར་མཉམ་འབྲེལ་ བསྐྱར་ཞིབ་དང་ བསམ་འཆར་བརྗེ་སོར་གྱི་ གྲོས་གནས་ཅིག་ལུ་ གྱུར་ཡོདཔ་མ་ཚད་ གནད་དོན་གཞན་ཚུ་ གྲོས་བསྡུར་འབད་སའི་ གོ་སྐབས་ཅིག་ལུ་ཡང་ འགྱུར་ཡོདཔ་ཨིན་པས།

དེ་བསྒང་ ཟུང་ཕྱོགས་ལས་ཁུངས་ཀྱི་མདོ་ཆེན་ མཚོ་སྐྱིད་ཆོས་སྒྲོན་གྱིས་ རྒྱ་པཱན་ལས་ འབྲུག་གི་མི་སྡེའི་དཔལ་འབྱོར་ གོང་འཕེལ་ལུ་ རྒྱབ་སྐྱོར་འཕྲོ་མཐུད་དེ་འབད་བའི་ཁར་ འབྲུག་གཞུང་གིས་ ནད་ཡམས་ཀོ་ཝིཌ་-༡༩ ལུ་ གདོང་ལན་དང་ བཀག་ཐབས་ནང་ཡང་ རྒྱ་པཱན་གྱིས་ ལྷན་ཐབས་འབད་ཡོདཔ་ལས་ རྒྱ་པཱན་གཞུང་དང་ མི་སེར་ཚུ་ལུ་ ཧིང་ལས་ར་ བཀྲིན་དགའ་ཚོར་ཡོད་ཟེར་བཤད་ནུག།

དྲུང་ཆེན་དང་པ་ ཧི་རོ་ཡུ་ཀི་ ཡ་མ་ཤི་ཏ་གིས་ཡང་ འབྲུག་རྒྱལ་ཁབ་འདི་ སྤྱི་ལོ་ ༢༠༢༣ སྤྱི་ཟླ་ ༡༢ པའི་ནང་ གོང་འཕེལ་དུམ་གྲ་ཅིག་ལས་ མ་འགྱོ་མི་ རྒྱལ་ཁབ་ཚུ་གི་གྲས་ལས་ ཕྱིར་འཐོན་འབད་བའི་ཤུལ་ལས་ཡང་ རྒྱ་པཱན་གཞུང་གིས་ འབྲུག་གཞུང་ལུ་ རྒྱབ་སྐྱོར་འཕྲོ་མཐུད་འབད་ནི་གི་ ཁས་བླངས་ཡོད་ཟེར་ བཤད་འདུག་པའི་གནས་ཚུལ།