ཡུ་ཀེ་རེན་གྱིས་ ཨི་རཱན་དོན་གཅོད་སྐུ་ཚབ་ཀྱི་ གནས་ཚད་མར་ཕབ་མི་ལུ་ ཨི་རཱན་གྱིས་གདོང་ལན།

ཨེ་བི་སི།
ཨི་རཱན་གྱིས་ ར་ཤི་ཡ་ལུ་ དམག་འཐབ་ཀྱི་ རང་སྒུལ་གནམ་གྲུ་ཆུང་བ་ཚུ་ བཙོངས་ཡོདཔ་ལས་ ཡུ་ཀེ་རེན་གྱིས་ ཨི་རཱན་དོན་གཅོད་སྐུ་ཚབ་ཀྱི་ གནས་ཚད་མར་ཕབ་མི་ལུ་ ཨི་རཱན་གྱིས་ཡང་ དེ་དང་བསྟུན་པའི་ གདོང་ལན་འབད་ནི་ཨིན་ཟེར་ བཤད་ཡོད་རུང་ ཁོང་གིས་ ར་ཤི་ཡ་ལུ་ དམག་འཐབ་ཀྱི་ རང་སྒུལ་གནམ་གྲུ་ཆུང་བ་ཚུ་ བཙོངས་ཡོདཔ་སྦེ་ ཐད་ཀར་དུ་ ཁ་བཟེད་མ་བཏུབ་ཨིན་པས།
དེ་ཡང་ སྤྱི་ཟླ་ ༩ པའི་ཚེས་ ༢༤ ལུ་ ཨི་རཱན་གྱི་ ཕྱི་འབྲེལ་ལྷན་ཁག་ལས་ ཕྱི་ཁའི་བརྡ་བརྒྱུད་ཚུ་ནང་ གཏན་འཁེལ་མེད་པའི་ གནས་ཚུལ་བཀོད་མི་ལུ་ གཞི་བརྟེན་འབད་དེ་ ཡུ་ཀེ་རེན་གྱིས་ ཨི་རཱན་དོན་གཅོད་སྐུ་ཚབ་ཀྱི་ གནས་ཚད་མར་ཕབ་འབད་མི་དེ་ བློ་འགྱོད་པའི་ གཞི་ཅིག་ཨིན་པས་ཟེར་བཤད་ནུག།
ཨི་རཱན་གྱིས་ ར་ཤི་ཡ་ལུ་ དམག་འཐབ་ཀྱི་ རང་སྒུལ་གནམ་གྲུ་ཆུང་བ་ཚུ་ མ་བཙོངས་པའི་སྐོར་ལས་ ཐད་ཀར་དུ་ ངོས་ལེན་མ་འབད་རུང་ ཡུ་ཀེ་རེན་གྱི་ དམག་འཁྲུག་དང་འབྲེལ་ཏེ་ ཁོང་གི་ཁ་ཐུག་ལས་ ཕྱོགས་རིས་མེདཔ་སྦེ་ར་ སྡོད་ཡོད་ཟེར་ཨིན་པས།
ཡུ་ཀེ་རེན་ སྲིད་འཛིན་གྱིས་ འབད་བ་ཅིན་ ཨི་རཱན་དང་གཅིག་ཁར་ དོན་གཅོད་ཀྱི་གནས་ཚད་ མར་ཕབ་འབད་མི་དེ་ཡང་ འཕྲལ་ཁམས་ཅིག་ཁར་ ཨི་རཱན་ལུ་ བཟོ་བསྐྲུན་འབད་མི་ དམག་འཐབ་ཀྱི་ རང་སྒུལ་གནམ་གྲུ་ཆུང་བ་ཚུ་ ར་ཤི་ཡ་ལུ་ བཙོངས་ཡོད་མི་ ༨ ཡུ་ཀེ་རེན་གྱིས་ ཕབ་བཏང་མི་དང་འབྲེལ་ཏེ་ མར་ཕབ་འབད་ཡི་ཟེར་ཨིན་པས།
ཨི་རཱན་གྱིས་ དེ་བཟུམ་མའི་ བྱ་སྤྱོད་འབད་མི་ལུ་བརྟེན་ཏེ་ ཡུ་ཀེ་རེན་གྱི་ ཁ་ཐུག་ལས་ ཨི་རཱན་གྱི་སྐུ་ཚབ་ བསྐོ་བཞག་འབད་མི་དེ་ མེདཔ་བཟོ་བའི་ཁར་ ཨི་རཱན་གྱི་ སྐུ་ཚབ་ཡིག་ཚང་ནང་ དོན་གཅོད་ལས་གཡོག་པའི་ གྱངས་ཁ་ཡང་ མར་ཕབ་འབད་ནི་སྦེ་ གྲོས་ཐག་བཅད་ནུག་ཟེར་ བཀོད་འདུག་པའི་གནས་ཚུལ།