ཡུ་ཀེའི་བློན་ཆེན་ བོ་རིཛ་ཇཱོན་སཱན་ བློན་ཆེན་གྱི་ གོ་གནས་ལས་དགོངས་ཞུ།

སི་ཨེན་ཨེན།
སྤྱི་ཟླ་ ༧ པའི་ཚེས་ ༧ ལུ་ ཡུ་ཀེའི་བློན་ཆེན་ བོ་རིཛ་ཇཱོན་སཱན་དེ་ བློན་ཆེན་གྱི་ གོ་གནས་ལས་ དགོངས་ཞུ་མཛད་ཡོདཔ་ད་ དེ་ཡང་ བློན་ཆེན་དེ་གིས་ སྤྱོད་ངན་མཛད་པའི་ གནད་ལུ་བརྟེན་ཏེ་ ཁོ་རའི་སྲིད་ཚོགས་ཀྱི་ འཐུས་མི་ཚུ་གིས་ དགོངས་ཞུ་མཛད་དགོཔ་སྦེ་ ཨུ་ཚུགས་བསྐྱེད་ཡོདཔ་ཨིན་པས།
དེ་སྦེ་ དགོངས་ཞུ་མ་མཛད་པའི་ཧེ་མར་ གཞུང་སྐྱོང་འཐུས་མི་ ༦༠ དེ་ཅིག་གིས་ དགོངས་ཞུ་འབད་བའི་ཤུལ་ལུ་ བློན་ཆེན་ཁོ་ར་ཡང་ བྱ་ཐབས་ར་མེད་པར་ མི་འདོད་བཞིན་དུ་ དགོངས་ཞུ་མཛད་དགོཔ་བྱུང་ནུག།
དེ་བཟུམ་སྦེ་ སྲིད་ཚོགས་ནང་ལས་ བློན་ཆེན་གྱི་ཚབ་ཅིག་ གདམ་ཁ་རྐྱབ་ནི་ འགོ་བཙུགས་ཡོད་རུང་ བློན་ཆེན་གསརཔ་ མ་བསྐོས་ཚུན་གྱི་རིང་ལུ་ འཕྲོ་མཐུད་དེ་ར་ རྒྱལ་ཁབ་བདག་འཛིན་འཐབ་མི་སྦེ་ བཞུགས་ནི་ཨིན་པའི་སྐོར་ལས་ ཨུ་ཚུགས་བསྐྱེདཔ་ཨིན་པས་ཟེར་ བཀོད་འདུག་པའི་གནས་ཚུལ།