རྒྱ་གར་གྱི་ མངའ་སྡེའི་སྨན་ཁང་ཅིག་ལུ་མེ་རྐྱེན།

སི་ཨེན་ཨེན།་
སྤྱི་ཟླ་ ༡༡ པའི་ཚེས་ ༡༦ ལུ་ རྒྱ་གར་གྱི་ བྱང་ཕྱོགས་མངའ་སྡེ་ ཨུ་ཏར་པར་དེཤ་གི་ དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ ཇཱན་སི་ཁྲོམ་ལུ་ཡོད་མི་ ཨ་ལོའི་སྨན་ཁང་ལུ་ མེ་རྐྱེན་བྱུང་ཡོདཔ་ལས་ ཨ་ལོ་གསར་སྐྱེས་ ༡༠ ལུ་ ཤི་རྐྱེན་བྱུང་ཡི་ཟེར་ཨིན་པས།
རྐྱེན་ངན་དེ་ བྱུང་པའི་སྐབས་ལུ་ ཨ་ལོ་ ༥༥ གི་གྲས་ལས་ སྲོག་སྐྱབས་འབད་ཚུགས་མི་ ཨ་ལོ་ ༤༥ ལུ་ སྨན་བཅོས་འབད་དོ་ཡོདཔ་ད་ དེ་སྦེ་ སྲོག་སྐྱབས་འབད་ཚུགས་མི་ ཨ་ལོ་ཚུ་ཡང་ སྒོ་ཅུང་ནང་ལས་སྦེ་ ཕྱི་ཁར་བཏོན་ནུག།
མེ་རྐྱེན་དེ་ ག་དེ་སྦེ་ བྱུང་ཡོདཔ་ཨིན་ནའི་སྐོར་ལས་ མ་ཤེས་རུང་ མངའ་སྡེའི་བློན་པོ་འོགམ་ བར་ཇེཤ་པ་ཐག་གིས་ མེ་རྐྱེན་དེ་གི་སྐོར་ལས་ འཚོལ་ཞིབ་འབད་ནི་ཨིནམ་སྦེ་ བཤད་ཡོདཔ་མ་ཚད་ གནོད་སྐྱོན་བྱུང་མིའི་ བཟའ་ཚང་ཚུ་ལུ་ཡང་ གཞུང་ལས་ རྒྱབ་སྐྱོར་བྱིན་ནི་ཨིན་པའི་ ཁས་ལེན་ཡང་འབད་ཡོདཔ་ཨིན་པས།
མ་གཞི་ རྒྱ་གར་རྒྱལ་ཁབ་ནང་ མེ་རྐྱེན་ཚུ་ བྱུངམ་བྱུང་ས་ར་ཨིནམ་ད་ དེ་ཡང་ སྒྲིང་ཁྱིམ་བཟོ་བསྐྲུན་འབད་མི་ཚུ་གིས་ བཅའ་ཡིག་དང་ སྒྲིག་གཞི་ཚུ་ལུ་མ་གནས་པར་ ལག་ལེན་འཐབ་མི་དང་ མེ་རྐྱེན་ཉེན་སྲུང་གི་ འཕྲུལ་ཆས་ཚུ་ཡང་ ཚུལ་མཐུན་མེད་ནི་དེ་གིས་ཨིན་པས་ཟེར་ བཀོད་འདུག་པའི་གནས་ཚུལ།