ལམ་ཡིག་ལུ་བརྟེན་ཏེ་ ཕྱིའི་རྒྱལ་ཁབ་ལུ་ འགྲུལ་སྐྱོད་འབད་མི་ འབྲུག་མི་ཚུ་ལུ་དཀའ་ངལ།

ཡིག་ཚང་ལས་བྱེདཔ།
སྤྱི་ཟླ་ ༨ པའི་ཚེས་ ༢༥ ལུ་ འབྲུག་གནམ་གྲུའི་ནང་ འགྲུལ་སྐྱོད་འབད་མི་ འབྲུག་མི་ ༧ ནེ་པཱལ་ཀཋ་མཱན་ཌུའི་ རྒྱལ་སྤྱི་གནམ་ཐང་ནང་ལྷོདཔ་ད་ ལམ་ཡིག་ཚོས་གཞི་ལྕང་ཁ་འབད་མི་ འབག་ཡོད་མི་ལུ་བརྟེན་ཏེ་ རྒྱལ་ཁབ་དེ་ནང་ འཛུལ་ཞུགས་འབད་མ་བཅུག་པར་ ལོག་བཏང་ཡོདཔ་ལས་ གནམ་གྲུ་དེ་ནང་ར་ ལོག་འོང་དགོཔ་བྱུང་ནུག།
དེ་ཡང་ ལམ་ཡིག་ཚོས་གཞི་ཧོནམོ་འབད་མི་ རྫོགས་སོངཔ་ལས་ ཚོས་གཞི་ཧོནམོ་གི་ཚབ་ལུ་ ཚོས་གཞི་ལྕང་ཁ་འབད་མི་ ལམ་འགྲུལ་ཡིག་ཆ་ སྤྲོད་ནི་དེགིས་ཨིནམ་ད་ ཕྱི་འབྲེལ་ལྷན་ཁག་ལས་ བཤད་དོ་བཟུམ་འབད་བ་ཅིན་ ལམ་ཡིག་དེ་ཚུ་ ཇར་མཱན་ལུ་ དཔར་བསྐྲུན་འབདཝ་ཨིན་རུང་ བཀྲམ་སྤེལ་འབད་མ་ཚུགསཔ་ལས དཀའ་ངལ་དེ་ འབྲུག་རྐྱངམ་གཅིག་ལུ་མིན་པར་ རྒྱལ་ཁབ་གཞན་ཚུ་གི་ནང་ཡང་ འཐོན་ཏེ་ཡོད་ཟེར་ཨིན་པས།
སྤྱི་ཟླ་ ༨ པའི་ཚེས་ ༢༥ ལུ་ ཕྱི་འབྲེལ་ལྷན་ཁག་ལས་ གསར་བཏོན་འབད་མི་ ལམ་འགྲུལ་བསླབ་སྟོན་ནང་ བཀོད་དོ་བཟུམ་འབད་བ་ཅིན་ ལམ་ཡིག་དེ་ཚུ་ ལྟ་ཞིབ་ཐོག་ལས་ སྐྱོད་ཐམ་ཚུ་ ཧེ་མ་ལས་ བཟོ་ཡོད་མེད་ཀྱི་ ཞིབ་དཔྱད་འབད་འོང་ཟེར་ཨིན་པས།
དེ་མ་ཚད་ འཕྲལ་ཁམས་ཅིག་ཁར་ སྤྱིར་བཏང་ལམ་ཡིག་གི་ཚབ་སྦེ་ ལམ་འགྲུལ་ཡིག་ཆ་ སྤྲོད་མིའི་གུ་ ནེ་པཱལ་ལུ་ འགྱོ་འདོད་ཡོད་མི་ཚུ་གིས་ཡང་ སྔ་གོང་ལས་ར་ རྒྱ་གར་དྷི་ལི་ལུ་ཡོད་མི་ ནེ་པཱལ་གྱི་ གཞུང་ཚབ་ཡིག་ཚང་ནང་ལས་ སྐྱོད་ཐམ་ཚུ་ བཟོ་དགོ་ཟེར་ཨིནམ་ད་ དེ་བཟུམ་སྦེ་ རྒྱལ་ཁབ་གཞན་ཁར་ འགྲུལ་སྐྱོད་འབད་མི་ཚུ་གིས་ཡང་ སྐྱོད་ཐམ་གྱི་ བྱ་སྒོའི་རིམ་པ་དང་ དགོས་མཁོའི་ཡིག་ཆ་ཚུ་ ལྟ་ཞིབ་འབད་དགོ་ཟེར་ བསླབ་སྟོན་ནང་བཀོད་ནུག།
མ་གཞི་ ཕྱི་འབྲེལ་ལྷན་ཁག་ལས་ གནས་སྐབས་ཀྱི་ ཐབས་ལམ་དེ་གི་སྐོར་ལས་ ཕྱི་རྒྱལ་ཁག་གི་ གཞུང་ཚུ་ལུ་ གསལ་བསྒྲགས་འབད་ཡོད་རུང་ ལཱ་འབད་སའི་ འབྲེལ་ཡོད་དབང་འཛིན་ཚུ་ལུ་ བརྡ་དོན་ཚུ་ ལྷོད་མ་ཚུགསཔ་ འོང་ནི་ཨིནམ་ལས་ བྱ་སྟབས་མ་བདེཝ་བྱུང་མི་ འབྲུག་མི་ཚུ་གིས་ བཟོད་གསོལ་འབད་གནང་ཟེར་ཨིན་པས།
ད་ལས་ཕར་ ཕྱི་རྒྱལ་ལུ་འགྱོ་མི་ འབྲུག་མི་ཚུ་གི་དོན་ལས་ དེ་བཟུམ་མའི་ དཀའ་ངལ་མེདཔ་ ངེས་བརྟན་བཟོ་ཚུགས་པའི་ རེ་བ་ཡོད་ཟེར་ ལམ་འགྲུལ་བསླབ་སྟོན་ནང་ བཀོད་འདུག་པའི་གནས་ཚུལ།