ཨ་ལོ་ཆུང་ཀུ་ཚུ་གི་དོན་ལས་ ནད་ཡམས་ཀོ་ཝིཌ་-༡༩ གི་ སྨན་ཁབ་ཕའི་ཟར་དང་ མོ་ཌེར་ན་ ༢ ལག་ལེན་འཐབ་ཆོག་པའི་ གནང་བ་བྱིན་ཡོདཔ།

ཧིན་དུཛ་ཏཱན་ ཊ་ཡེམཛ།
སྤྱི་ཟླ་ ༦ པའི་ཚེས་ ༡༧ ལུ་ ཨ་མི་རི་ཀའི་ བཟའ་འཐུང་དང་ སྨན་རྫས་བདག་སྐྱོང་གིས་ ཨ་ལོ་ཆུང་ཀུ་ཚུ་གི་དོན་ལས་ ནད་ཡམས་ཀོ་ཝིཌ་-༡༩ གི་ སྨན་ཁབ་ཕའི་ཟར་དང་ མོ་ཌེར་ན་ ༢ ལག་ལེན་འཐབ་ཆོག་པའི་ གནང་བ་བྱིན་ནུག།
དེ་ཡང་ ཨ་ལོ་ཆུང་ཀུ་ ཟླཝ་ ༦ ལས་ སྐྱེས་ལོ་ ༥ ཚུན་ལུ་ མོ་ཌེར་ནའི་ སྨན་ཁབ་དེ་ ཐུན་ཚད་ ༢ རེ་དང་ ཕའི་ཟར་སྨན་ཁབ་དེ་ ཨ་ལོ་ཟླཝ་ ༦ ལས་ སྐྱེས་ལོ་ ༤ ཚུན་ལུ་ ཐུན་ཚད་ ༣ རེ་ བཙུགས་དགོ་ཟེར་ཨིན་པས།
ད་ཚུན་ ཨ་ལོ་ཆུང་ཀུའི་ སྨན་ཁབ་དེ་གི་དོན་ལུ་ ཨ་ལོའི་ཕམ་ཚུ་དང་ ཨ་ལོ་གཅེས་སྐྱོང་འཐབ་མི་ སྨན་བཅོས་ཁང་ཚུ་ དུས་ཡུན་རིངམོ་སྦེ་ སྒུག་སྡོད་པའི་མཐའ་མར་ ནད་ཡམས་བཀག་འཛིན་འབད་ནི་ལུ་ ཕན་ཐོགས་འབྱུང་ཚུགས་ཟེར་ ཨ་མི་རི་ཀའི་ བཟའ་འཐུང་དང་ སྨན་རྫས་བདག་སྐྱོང་གི་ གསལ་བཤད་ཅིག་ནང་བཀོད་ནུག།
དེ་མ་ཚད་ སྨན་ཁབ་དེ་གིས་ ཨ་ལོ་ཆུང་ཀུ་ཚུ་ ཀོ་ཝིཌ་-༡༩ ལུ་བརྟེན་ཏེ་ སྨན་ཁང་ནང་ བཞག་ནི་དང་ ཤི་རྐྱེན་ཚུ་ལས་ཡང་ སྲུང་སྐྱོབ་འབད་ཚུགས་པའི་ རེ་བ་ཡོད་ཟེར་ཨིན་པས།
ག་དེ་སྦེ་ཨིན་རུང་ སྨན་ཁབ་དེ་ ལག་ལེན་མ་འཐབ་པའི་ཧེ་མར་ མཐའ་དཔྱད་གནང་བའི་དོན་ལུ་ ནད་རིགས་དམ་འཛིན་དང་ བཀག་དམ་ལྟེ་བའི་ནང་ལས་ རྒྱབ་སྣོན་དགོཔ་བཞིན་དུ་ མཁས་མཆོག་ཚུ་གི་ ཚོགས་ཆུང་དེ་ འཕྲལ་མགྱོགས་ར་ འཚོགས་ནི་ཨིན་པས་ཟེར་ བཀོད་འདུག་པའི་གནས་ཚུལ།