ལེགས་བཤད།

༆   རྒྱལ་པོ་ཡུལ་འཁོར་མི་བསྲུང་དང་། །བློན་པོ་ཐབས་ལ་མི་མཁས་པས། །རྒྱལ་སྲིད་འཕེལ་ལྟ་ག་ལ་ཞིག །རང་གི་སྲོག་ཀྱང་བསྲུང་མི་ནུས། །

མི་མཁས་ང་རྒྱལ་ཆེ་བ་དང་། །གཙོ་བོ་འདོད་དང་ཞལ་ཏ་མང་། །བསམ་པ་མི་མཐུན་འུར་རྡོ་ཡིས། །རང་སྲིད་ཆམ་ལ་ཕབ་པ་མང་། །

དེ་ཕྱིར་རྒྱལ་བློན་འབངས་བཅས་ཀུན། །ལྗོན་ཤིང་ལ་ནི་འཁྲི་ཤིང་ལྟར། །ཕན་ཚུན་ལྟོས་གྲེབ་གཟུ་བོའི་བློས། །རང་སའི་བྱ་བ་དྲང་པོར་སྲོང་། །

རྨ་བྱ་ཚད་པས་གདུངས་གྱུར་ཀྱང་། །རྫིང་བུ་རྙོག་མར་འཇུག་མི་བྱེད། །ཡ་རབས་ཤིན་ཏུ་ཉམ་ཐག་ཀྱང་། །མ་བྱིན་ལེན་ལ་སྤྲོ་བ་ཞན། །

ངེས་པར་རྫུན་པ་མེད་པའི་ཚིག །སྨྲ་བའི་ཁ་ནི་ཡི་གེ་སྟེ། །དེ་ལས་གཞན་དུ་ལྕེ་བདེ་ཡང་། །ནེ་ཙོ་བཞིན་དུ་སྙིང་པོ་མེད། །

རང་སྡེ་ཤིན་ཏུ་སྲུང་མཁས་པ། །མུ་སྟེགས་ཀླ་ཀློའི་ཁྲོད་ནའང་ཡོད། །འདོད་པར་བགོ་བཤའ་བྱེད་ནུས་པའི། །སྐྱེས་བུ་དེ་ནི་དྲང་སྲོང་ཨིན། །

ཤིན་ཏུ་འདོད་པས་གདུངས་ན་ཡང་། །ཁྲེལ་དང་ངོ་ཚའི་གོས་མི་འབུད། །དེ་ལ་ཡ་རབས་ཞེས་བྱ་སྟེ། །འབྱོར་ལྡན་གཡུང་པོའི་ཁྲོད་ནའང་མང་། །

གཡུལ་ངོར་ཞུགས་ན་བརྟུལ་ཕོད་ཀྱང་། །ཡུལ་གྱི་མི་ལ་དེས་ཤིང་འཇམ། །དམན་པ་རྣམས་ལ་སྙིང་བརྩེ་བ། །དེ་ལ་དཔའ་བོ་ཞེས་སུ་བརྗོད། །

དམ་པ་རྣམས་ལ་མི་སྙན་སྒྲོགས། །བྱིས་པའི་གྲོགས་ལ་ཤིན་ཏུ་གདུང་། །ཆུང་མའི་འོག་ནས་མི་ལྷོངས་པ། །སྐྱེས་པ་འདྲ་བའི་བུད་མེད་ཡིན། །

ལུགས་གཉིས་བསྒྲུབ་པའི་མཐུ་ཆུང་ཞིང་། །ཕན་དང་གནོད་པའི་མཐའ་མི་ཤེས། །ལྟོ་བ་འགེངས་པ་གཙོར་བྱེད་པ། །ཆུ་དང་ནགས་མའི་མི་ཆུང་དངོས། །

ཡོན་ཏན་མེད་པའི་སློབ་དཔོན་དང་། །སེམས་བསྐྱེད་མེད་པའི་སྨན་པ་དང་། །སྤྱི་ཚིག་མེད་པའི་གྲོས་པ་གསུམ། །ཕན་ལས་གནོད་པ་ཆེ་བའི་རྒྱུ། །

མཁས་པ་ང་རྒྱལ་ཆེ་བ་དང་། །ཆེན་པོ་དྲེགས་པས་རྒྱགས་པ་དང་། །ཕྱུག་པོ་སེར་སྣས་བསྡམས་པ་གསུམ། །གདུག་སྦྲུལ་གདེང་ཀའི་བསིལ་ཡབ་ཡིན། །

སློང་ལ་ངོ་ཚ་མེད་མོད་ཀྱི། །མི་སྟེར་ཟེར་ན་དེ་བས་དམན། །བྱིན་ནོ་ཟེར་ན་དམ་པའི་ཚིག །མི་འདོད་ཟེར་ན་དེ་བས་འཕགས། །

རང་ཉིད་བསྲུང་བ་དེ་ཙམ་དུ། །གཞན་ལའང་ཕན་པ་འབའ་ཞིག་བསྒྲུབ། །ངུར་པ་གཅིག་གིས་ཅིག་ཤོས་ལ། །བསྟི་བསྟང་ཇི་ལྟར་བྱེད་མཐོང་ངམ། །

རྗེ་བོ་ངན་ལ་བསྟེན་པ་དང་། །གྲུ་གཟིངས་གོག་པོར་འཇུག་པ་དང་། །རྒྱ་མཚོའི་ཆུ་ལ་འཐུང་བ་གསུམ། །སྲོག་ལ་འཇིགས་པ་བསྐྱེད་པའི་རྒྱུ། །

ངན་པ་ཆེ་སར་སླེབ་པ་དང་། །དབང་ཡོད་ངོ་ཚ་མེད་པ་དང་། །ཕུག་རོན་ལྷ་ཁང་ཞུགས་པ་གསུམ། །གྲིབ་གནོན་བཞིན་དུ་གནོད་པ་མང་། །

ཟིལ་པའི་ཆུ་དང་རྩྭ་ཡི་མེ། །སྤྲིན་གྱི་གྲིབ་མ་འཇག་མའི་སྐྱབས། །སྐྱེ་བོ་ངན་པའི་མཛའ་བཤེས་ལྔ། །དགོས་པའི་དུས་སུ་བསླུ་བར་མཚུངས། །

ས་ཞི་རེངས་དང་ཁེ་མེད་ཚོང་། །མ་དུལ་རྟ་དང་གྱོང་པོའི་བྲན། །ལྐོག་འགྱུར་བྱེད་པའི་བུད་མེད་ལྔ། །ཁྱིམ་ཐབ་བཤིག་པའི་ཐབས་ཆེན་ཡིན། །

སློང་མོས་འཚོ་ཞིང་ཁེངས་ཚིག་སྨྲ། །ཟ་བའི་ཡུལ་ལ་འབར་ཞིང་འཁུན། །ཕ་མའི་དྲིན་ལན་མི་བསམ་པ། །འདི་གསུམ་ཤེས་ལྡན་ཁྲེལ་བའི་རྒྱུ། །

མཁས་པའི་ཚིག་ལ་རོ་མྱང་གིས། །ཕལ་མ་ཟས་སྐོམ་ཙམ་གྱིས་ཚིམ། །མུ་ཏིག་མེད་པའི་ཉ་གསོད་པ། །གདོལ་པ་རྣམས་ཀྱི་སྤྱོད་ཚུལ་ཡིན། །

དམ་པ་གྲོགས་སུ་བསྟེན་པ་ལས། །འདི་ཕྱིའི་ལེགས་སྨོན་ཐམས་ཅད་འགྲུབ། །ཤཱཀྱ་བཟང་ལྡན་ལ་བསྟེན་ནས། །འདྲེག་མཁན་འདུལ་བ་འཛིན་པར་འགྱུར། །

ནགས་ཚལ་ཕལ་པ་མང་མོད་ཀྱི། །ཙན་དན་ཡོད་པ་མ་ལ་ཡ། །ཀུན་ཏུ་སྐྱེ་བོས་གང་གྱུར་ཀྱང་། །དགེ་བའི་གྲོགས་པོ་ལ་ལ་ཙམ། །

རང་བཞིན་ངན་པ་ལ་བསྟེན་ན། །དམ་པ་མཐོང་ཡང་ཐེ་ཚོམ་སྐྱེ། །ཁྱི་ཡིས་རྨུག་པའི་བྱིས་པ་དག །ནིའུ་ལོ་མཐོང་ནའང་སྐྲག་ཅིང་བརྒྱལ། །

གཡོ་ཅན་རྣམས་ཀྱིས་རང་ཉིད་ལ། །སྨ་འབེབས་བྱས་པ་མ་ཤེས་པས། །དྲང་ཞིང་བདེན་པར་སྨྲ་བ་ལ། །ལྐུགས་པ་ཡིན་ཞེས་བླ་དྭགས་འདོགས། །

ཡོན་ཏན་ལྡན་པའི་སྐྱེས་བུ་ནི། །ས་ཕྱོགས་གཞན་ལ་ཕྱིན་ན་བྲིན། །ཁུ་བྱུག་མོན་དུ་སྐྱེས་ན་ཡང་། །ཅ་ཅོ་བྷོ་ཊའི་དབུས་ན་སྙན། །

གཞོན་ནུའི་དུས་ན་བསམ་མེད་ཀྱི། །དབང་དུ་གྱུར་པ་ཐལ་ཡིན་ཀྱང་། །ད་ནི་ལང་ཚོར་གྱུར་པའི་དུས། །འཆལ་དང་ཆུང་མའི་དབང་མ་གཏོང་། །

རྒས་པ་ཤི་བའི་སྔོན་འགྲོ་ལ། །ངེས་འབྱུང་སྐྱེ་བ་ལྟ་ཞོག་གི །བུ་ལ་ཁྱིམ་ཐབ་ཕོགས་ཟེར་ནས། །ད་དུང་སོས་དལ་བྱེད་པ་བླུན། །

ངན་པ་ཇི་ཙམ་ཉམ་ཆུང་བ། །དེ་ཡི་བར་དུ་དུལ་ཞིང་འཇམ། །ཅུང་ཟད་རྒྱགས་པར་གྱུར་པའི་ཚེ། །གླང་པོའི་ཀོ་བ་སྐམ་དང་མཚུངས། །

རྒྱལ་པོ་སྙན་ཁུངས་སྲབ་པ་དང་། །བློན་པོ་གཟོ་བོར་མི་གནས་པ། །བཙུན་མོ་ཕྲ་མར་དགའ་བ་གསུམ། །རྒྱལ་སྲིད་དཀྲུག་པའི་སྲུབ་ཤིང་ཡིན། །

སེངྒེས་རི་དྭགས་ཤ་ཟ་ཡང་། །ལོ་གཅིག་འདོད་པ་ལན་གཅིག་སྤྱོད། །འབངས་རྣམས་རྒྱལ་པོའི་དཔལ་ཡིན་ཀྱང་། །དཔྱ་ཐང་ཡང་ཡང་སྡུད་ན་ཉམས། །

བོང་བུ་བཞིན་དུ་འདོད་པ་ལ། །ཆོག་ཤེས་མེད་པའི་འཁོར་ངན་གྱིས། །ལྐོག་ཏུ་མི་ལྟོགས་མནར་བྱེད་པའི། །འཚིར་དཔྱད་མགར་བ་བ་ལང་མེད། །

དྲུག་ཆའི་དཔྱ་ཐང་ཐོབ་པའི་གནས། །མང་པོས་བཀུར་བ་ཁོ་ན་སྟེ། །དེ་ཡི་ཁྲིམས་ལུགས་མི་སྲོང་ན། །བུ་ལོན་འབངས་ལས་བླངས་པ་ཡིན། །

རི་བོ་ས་ཡི་ཁུར་ཡིན་ཀྱང་། །ཐེག་པ་དམན་པའི་རྣམ་འགྱུར་མེད། །གང་དག་བྱས་པ་མི་བཟོའི་ཁར། །དབང་ཆེན་ས་གཞིས་ག་ལ་ཐེག །

སྐྱེ་བོ་ཉོ་ཆང་ལ་དགའ་དང་། །བུད་མེད་ལྐོག་ཟས་བྱེད་པ་གཉིས། །ཁྱིམ་ཐབ་བརླག་ལ་མཚུངས་པ་ཡི། །དཔང་པོ་སྲང་རྡོ་ཁོ་ན་ཡིན།

གཞན་དག་འབྱོར་པ་མཐོང་ནས་ནི། །ཤིན་ཏུ་འཁྲུགས་པའི་སེམས་བསྐྱེད་ཀྱང་། །དེ་ལས་ཅུང་ཟད་མི་རྙེད་སྟེང་། །རང་གི་བསོད་ནམས་ལྷག་མེད་འཇོམས། །

ནོར་ལྡན་སེར་སྣས་བསྡམས་པ་རྣམས། །མཆོད་སྦྱིན་ཡུལ་ལ་འཁོན་པའི་རྒྱུས། །སྒྲ་ལྔ་འདོན་པའི་ཡི་དྭགས་ཀྱི། །རྒྱུ་མཐུན་ད་ལྟ་སླེབ་པ་མང་། །

མི་སྲུན་ཁ་ནས་འདོན་པ་ཡི། །ཚིག་ངན་སྦྲུལ་གྱི་ལྕེ་བརྐྱང་ན། །ཕ་རོལ་སྙིང་ལ་ཟིན་པའི་ནད། །རྒྱུན་ཤེས་བུས་ཀྱང་བཅོས་པར་དཀའ། །

ཁྱིམ་པ་ཡོན་ཏན་མི་ལྡན་ཀྱང་། །བསམ་པ་བཟང་པོར་ནན་གྱིས་སློབ། །མི་ཡི་གྲོགས་སུ་རླུང་བཞིན་དུ། །དགེ་བའི་ཆོས་རྣམས་སྡུད་པའི་ཕྱིར། །

སློང་བ་དང་འདྲའི་མཛའ་བཤེས་དཀོན། །གཏོང་བ་དང་འདྲའི་བང་མཛོད་ནི། །མགོན་མེད་ཟས་སྦྱིན་ལ་ཡང་མེད། །དེ་ཕྱིར་གཏོང་ལ་འབད་པར་གྱིས། །

ཁྱིམ་ཐབ་བརྙེས་པ་སླ་མོད་ཀྱི། །ཕ་མ་བརྙེས་པ་ཤིན་ཏུ་དཀོན། །དེ་ཉིད་བཀུར་བའི་བསོད་ནམས་ཁྱད། །ཤེས་ན་ལོག་ལྟའི་གཡང་ལས་གྲོལ། །

སྒོག་སྐྱ་ག་བུར་གྱིས་བྱུགས་ཀྱང་། །རང་གི་མཚན་ཉིད་མི་འདོར་ལྟར། །ཅུང་ཟད་རྐྱེན་གྱིས་མཐོ་དམན་བྱེད། །སྲང་མདའ་ལྟ་བུའི་སྐྱེ་བོ་སྤང་། །

གཞན་ལ་གནོད་པ་ལྷུར་བྱེད་ན། །དེ་ནི་ཚངས་པར་སྤྱོད་ཀྱང་ཅི། །སྤུ་གྲིས་བཟུང་བའི་སྦྲང་རྩི་ཡིས། །རྨས་པ་ཉིད་ལས་གསོས་པ་མེད། །

དགྲ་བོ་ཐུལ་བའི་མཐའ་འཚོལ་ལ། །ཚེ་ཡི་གཏུགས་པར་འགྱུར་བ་སྟེ། །དེ་ལ་ཉེ་བར་ལེན་པའི་སེམས། །བཏུལ་ན་རང་ཉིད་བདེ་བ་ཐོབ། །

ཇི་སྲིད་ཆོག་ཤེས་མ་ཐོབ་པ། །དེ་སྲིད་ནོར་གྱིས་ཕོངས་པ་སྟེ། །བྱི་བས་འབད་ནས་བསགས་པའི་མཐར། །ལྟོགས་འགྲིལ་ཤི་བ་ལ་ཐོས་སམ། །

དྲང་པོ་རེ་ཞིག་མཐུ་ཆུང་ཡང་། །དེ་ཡི་རང་བཞིན་ཉམས་པ་མེད། །ཉི་མ་སྤྲིན་གྱིས་སྒྲིབ་ན་ཡང་། །དེ་མ་ཐག་ཏུ་ལྷག་པར་གསལ། །

དམ་པ་རེ་ཞིག་ཉམས་གྱུར་ཀྱང་། །དེ་ལས་ལྡང་བའི་ཐབས་བྱེད་དེ། །ཟླ་བ་ཉ་བ་གཟས་ཟིན་ཀྱང་། །ད་དུང་གླིང་བཞི་བསྐོར་ལ་བརྩོན། །

རིན་ཆེན་སྣ་བདུན་ལྡན་ན་ཡང་། །འཆི་བའི་ཚེ་ན་རྗེས་མི་འབྲང་། །འཕགས་པའི་ནོར་བདུན་བསྙེན་པ་རྣམས། །དབང་ཕྱུག་བརྒྱད་དུ་འགྲོ་བ་མང་། །

སྡོམ་པ་ལན་གཅིག་བྲལ་གྱུར་ཀྱང་། །འཆབ་སེམས་མེད་ན་གསོར་མོད་ཀྱི། །རྟག་ཏུ་བསམ་པ་ཉམས་པ་རྣམས། །འགྲོ་ས་ངན་སོང་གསུམ་ལས་མེད། །

རྫས་ལས་འཕེལ་བའི་བསོད་ནམས་བདུན། །བསྒྲུབ་པ་ཐུབ་པའི་ལུགས་ཡིན་གྱི། །དམ་པ་བཏགས་ནས་དཀོར་རྫས་ལ། །གཟི་བྱིན་བསྒྲུབ་ན་ཤིན་ཏུ་ཉམས། །