རྒྱལ་ཡོངས་ཚོགས་འདུའི་ནང་ ལས་སྡེ་གཞན་ཁ་ལས་ ཚོགས་དཔོན་བསྐོ་བཞག།

རྒྱལ་ཡོངས་ཚོགས་འདུའི་ནང་ གཞུང་སྐྱོང་ཚོགས་པའི་ནང་ལས་ ཚོགས་དཔོན་བསྐོ་བཞག་འབད་མི་དེ་ རྒྱལ་སྤྱིའི་ལམ་ལུགས་ཅིག་ཨིན་རུང་ ང་བཅས་རའི་ དཔལ་ལྡན་འབྲུག་པའི་ རྒྱལ་ཁབ་འདི་ནང་ སྲིད་དོན་ཚོགས་པ་དང་ འབྲེལ་བ་མེད་པའི་ གཞུང་སྒེར་གྱི་ ལས་སྡེ་གཞན་ཅིག་ལས་ འོས་འབབ་ཅན་ཅིག་ བསྐོ་བཞག་གནང་པ་ཅིན་ རྒྱལ་ཡོངས་ཚོགས་འདུ་འདི་ སྔར་བ་ལྷག་པའི་ སྒྲིང་སྒྲིང་དང་ ཡིད་ཆེས་ཅན་ཅིག་ལུ་ འགྱུར་ནི་མས་ཟེར་ཨིན་པས།
མ་གཞི་ ད་ཚུན་གྱི་རིང་ལུ་ ཆགས་སྡང་ཕྱོགས་རིས་ཀྱི་ གནད་དོན་ལ་སོགས་པ་ཚུ་ མ་ཐོན་ཏེ་འབད་རུང་ ལྟོ་ཟ་ས་ལས་ ཧབ་ཟེར་དོ་བཟུམ་སྦེ་ མ་འོངས་པ་ལུ་ ཆགས་སྡང་ཕྱོགས་རིས་ ཨ་ཙི་རེ་ མི་འཐོན་ག་མནོ་བའི་ དོགས་པ་ཡོདཔ་ལས་ ཆུ་མ་འོང་གོང་ལས་ གཡུར་བ་ཟེར་ སླབ་དོ་བཟུམ་སྦེ་ མ་འོངས་པ་ལུ་ཡང་ ཆགས་སྡང་ཕྱོགས་རིས་ཀྱི་ ངན་ལྷད་ཚུ་ མི་འཐོན་ནིའི་དོན་ལས་ ཚོགས་དཔོན་དེ་ ལས་སྡེ་གཞན་ཅིག་ལས་ར་ བསྐོ་བཞག་གནང་པ་ཅིན་ ལེགས་ཤོམ་འོང་ནི་ཨིན་པའི་ བསམ་འཆར་བཀོདཔ་ཨིན་པས།
དེ་ཡང་ མི་མང་གིས་ བསམ་འཆར་བཀོད་དོ་བཟུམ་འབད་བ་ཅིན་ རྒྱལ་ཡོངས་ཚོགས་འདུའི་ནང་ གཞུང་སྐྱོང་དང་ ལྡོག་ཕྱོགས་ ༢ ཀྱི་བར་ན་ རྩོད་བསྡུར་ཐོག་ལས་ གསུང་གྲོས་གནང་པའི་ཤུལ་ལུ་ ཚོགས་དཔོན་གྱིས་ ཉེན་ཁ་མི་འབག་ནིའི་དོན་ལས་ མང་མོས་ཀྱི་ ཚོགས་རྒྱན་བཙུགསཔ་ད་ ད་རེས་ནངས་པའི་ གནས་སྟངས་ནང་ གཞུང་སྐྱོང་འཐུས་མི་དེ་ ལོག་བལྟབ་སུམ་བལྟབ་ཀྱིས་ མང་ནི་དེ་གིས་ རང་བཞིན་གྱིས་ གཞུང་སྐྱོང་ལུ་ རྒྱལ་ཁ་ཐོབ་ཨིན་པས།
དེ་བཟུམ་སྦེ་ སྤྱི་ཚོགས་ལྷན་བཞུགས་ཀྱི་སྐབས་ལུ་ཡང་ མ་འོངས་པར་ དེ་བཟུམ་མའི་ བྱ་སྟབས་མ་བདེཝ་ ཨ་ཙི་རེ་ འཐོན་ནི་གི་ ཉེན་ཁ་ཡོད་པ་ལུ་བརྟེན་ཏེ་ རྒྱལ་ཡོངས་ཚོགས་འདུའི་སྐབས་ལུ་ ཚོགས་དཔོན་དེ་ རང་འཇགས་བཞག་རུང་ སྤྱི་ཚོགས་ལྷན་བཞུགས་ཀྱི་སྐབས་ལུ་ ཚོགས་གཙོ་དེ་ རྒྱལ་ཡོངས་ཚོགས་སྡེའི་ ཁྲི་འཛིན་བསྐོས་པ་ཅིན་ དྭངས་གསལ་དང་ འདྲ་མཉམ་འོང་ནི་བཟུམ་ཅིག་སྦེ་ ཚོརཝ་ཨིན་པའི་སྐོར་ལས་ བཤདཔ་ཨིན་པས་ཟེར་ ཞུ་ནི་དང་།
ག་དེ་སྦེ་ཨིན་རུང་ མི་མང་གིས་ དེ་བཟུམ་མའི་ བསམ་འཆར་བཀོད་མི་ཚུ་ ང་བཅས་རའི་ དཔལ་ལྡན་འབྲུག་པའི་ རྒྱལ་ཁབ་འདི་ མི་དབང་མངའ་བདག་རིན་པོ་ཆེ་ རིམ་བྱོན་ཚུ་གི་ དབུ་ཁྲིད་བཟང་པོའི་འོག་ལུ་ བསྐལཔ་མ་སྟོང་གི་བར་ན་ ཆགས་སྡང་ཕྱོགས་རིས་ཀྱི་ ངན་ལྷད་མེད་པར་ དམ་ཚིག་གཙང་མའི་སྒོ་ལས་ ཞི་བདེར་གནས་ཐབས་ལུ་ཨིན་པས་ཟེར་ ཞུ་ནི་ཨིན།

Please follow and like us: