རྒྱ་གར་དང་ བང་ལ་དེཤ་ལུ་ ཆུ་རུད་ཐོན་ཏེ་ མི་སེར་ཚུ་ལུ་ ཤི་རྐྱེན་དང་ རྒྱུན་འགྲུལ་གྱི་དཀའ་ངལ།

བི་བི་སི།

རྒྱ་གར་དང་ བང་ལ་དེཤ་ལུ་ གནམ་བྱཱར་གྱི་ ཆར་ཆུ་ལུ་བརྟེན་ཏེ་ ཆུ་རུད་དང་ གློག་ཀེམ་ ས་རུད་ཚུ་གིས་ ཉུང་ཤོས་ར་ མི་གྲངས་ ༥༩ དེ་ཅིག་ལུ་ ཤི་རྐྱེན་བྱུང་པའི་ཁར་ མི་སེར་ས་ཡ་ལེ་ཤ་ཅིག་ཡང་ རྒྱུན་འགྲུལ་འཐབ་མ་ཚུགས་པར་ དཀའ་སྡུག་གི་ངང་ལུ་ གནས་ཏེ་ཡོདཔ་ཨིན་པས།

བང་ལ་དེཤ་གཞུང་གི་ འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ སྤྱི་ལོ་ ༢༠༠༤ གི་ཤུལ་ལས་ ད་རེས་ དེ་བཟུམ་མའི་ ཆར་ཆུ་ལུ་བརྟེན་ཏེ་ ཆུ་རུད་ཐོན་ནི་དེ་གིས་ གནས་སྟངས་སྐྱོ་དྲགས་ཅིག་ལུ་ འགྱུར་ཏེ་ཡོད་ཟེར་ཨིན་པས།

དེ་ཡང་ འདས་པའི་བདུན་ཕྲག་ནང་ལས་ འགོ་བཙུགས་ཏེ་ བང་ལ་དེཤ་ རྒྱལ་ཁབ་ཀྱི་ བྱང་ཤར་ལུང་ཕྱོགས་དང་ ཁྱིམ་མཚེས་རྒྱ་གར་གྱི་ གངས་རི་ཚུ་ནང་ ཆརཔ་རྒྱུན་ཆད་མེད་པར་ རྐྱབ་ནི་དེ་གིས་ དཀའ་ངལ་བྱུང་མི་ མི་སེར་གྱི་དོན་ལས་ སློབ་གྲྭ་ཚུ་ཡང་ གནས་སྐབས་ཀྱི་ སྡོད་སྒར་སྦེ་ ལག་ལེན་འཐབ་དོ་ཡོདཔ་ཨིན་པས།

དེ་མ་ཚད་ ཆུ་རུད་ཀྱིས་སྦེ་ ཁྱིམ་ཚང་ཚུ་གི་བར་ན་ཡང་ རྒྱུན་འགྲུལ་འཐབ་མ་ཚུགས་པའི་ དཀའ་ངལ་སྦོམ་ ཐོན་ཡོདཔ་ལས་ སྲོག་སྐྱབས་ཀྱི་དོན་ལུ་ དམག་མི་ཚུ་ བགོ་བཀྲམ་འབད་ནུག་ཟེར་ བཀོད་འདུག་པའི་གནས་ཚུལ།