རྒྱ་གར་མ་ནི་པུར་ལུ་ ས་རུད་ཆད་མིའི་ནང་ མི་གྲངས་ ༢༧ ལུ་ཤི་རྐྱེན།

ཨིན་དུཛ་ཏཱན་ཊ་ཡེམཛ།
སྤྱི་ཟླ་ ༧ པའི་ཚེས་ ༢ ལུ་ མི་རོ་ ༦ ཐོབ་མི་བརྩིས་ཏེ་ ད་ཚུན་གྱི་བར་ན་ རྒྱ་གར་མ་ནི་པུར་མངའ་སྡེའི་ ནོ་ནེ་རྫོང་ཁག་གི་ ས་གནས་མ་རང་ཅིང་ཟེར་སར་ རེལ་ལིའི་ལམ་ བཟོ་བསྐྲུན་འབད་སའི་ ས་ཁོངས་ནང་ ས་རུད་ཆད་མི་ནང་ལས་ མི་རོ་ ༢༧ ཐོབ་ཡོད་རུང་ བྱང་སྟོར་ཤོར་མི་ མི་གྲངས་ ༣༥ དེ་ཅིག་ འཚོལ་མ་ཐོབ་པར་ཡོད་ཟེར་ཨིན་པས།
དེ་སྦེ་ ཤི་རྐྱེན་བྱུང་མི་ ༢༧ ལས་ ༢༠ དམག་མི་ཨིནམ་ད་ ས་རུད་དེ་ སྤྱི་ཟླ་ ༦ པའི་ཚེས་ ༢༩ དང་ ༣༠ ལུ་ ཆད་ཡོདཔ་ཨིན་པས།
ག་དེ་སྦེ་ཨིན་རུང་ ས་རུད་ཆད་སའི་ ས་ཁོངས་ནང་ སྲོག་སྐྱབས་འབད་མི་ཚུ་གིས་ འཚོལ་ཞིབ་ཀྱི་ལཱ་ཚུ་ འཕྲོ་མཐུད་དེ་ར་འབད་བའི་གུ་ འཚོལ་ཞིབ་ཀྱི་དོན་ལས་ རོ་ཁྱི་ཚུ་ཡང་ བགོ་བཀྲམ་འབད་ནུག་ཟེར་ བཀོད་འདུག་པའི་གནས་ཚུལ།