ཕྱི་འབྲེལ་དོན་གཅོད་ཀྱི་ ཨིང་རྫོང་མིང་ཚིག་ ༣༣༦ འབད་མི་ཅིག་ དཔེ་བསྐྲུན་ཐེངས་ ༢ པ་གསར་བཏོན་

སྤྱི་ཟླ་ ༧ པའི་ཚེས་ ༡༡ ལུ་ ཕྱི་འབྲེལ་བློན་པོ་ ཌོག་ཊར་རྟ་མགྲིན་རྡོ་རྗེ་གིས་ ཕྱི་འབྲེལ་དོན་གཅོད་ཀྱི་ ཨིང་རྫོང་མིང་ཚིག་ ༣༣༦ འབད་མི་ཅིག་ གློག་རིག་ཡོངས་འབྲེལ་འཆར་སྒོ་ཐོག་ལུ་ དཔེ་བསྐྲུན་ཐེངས་ ༢ པ་ གསར་བཏོན་མཛད་ཡོདཔ་ཨིན་པས།

ཕྱི་འབྲེལ་ལྷན་ཁག་གིས་ དེ་བཟུམ་མའི་ མིང་ཚིག་དཔེ་བསྐྲུན་འབད་མི་དེ་ཡང་ ཕྱི་འབྲེལ་དོན་གཅོད་ཀྱི་ མིང་ཚིག་ཚུ་གི་ གོ་བ་ལུ་ འཛོལ་བ་མེད་པར་ གཅིགས་མཚུངས་སྦེ་ ལག་ལེན་འཐབ་ཐབས་ལུ་ཨིན་ཟེར་ ཕྱི་འབྲེལ་ལྷན་ཁག་ལས་ གསར་བཏོན་འབད་མི་ གནས་ཚུལ་ཅིག་ནང་བཀོད་ནུག།

ཕྱི་འབྲེལ་དོན་གཅོད་ཀྱི་ ཨིང་རྫོང་མིང་ཚིག་ཚུ་ ཕྱི་འབྲེལ་ལྷན་ཁག་གི་ ཡོངས་འབྲེལ་འཆར་སྒོ་ www.mfa.gov.bt ནང་ལས་ ཕབ་ལེན་འབད་ཚུགས་ནི་དང་ དེ་སྦེ་ གསར་བཏོན་འབད་མི་དེ་གིས་ རྒྱལ་ཡོངས་སྐད་ཡིག་ རྫོང་ཁ་འདི་ གོང་འཕེལ་གཏང་ནིའི་དོན་ལས་ རྫོང་ཁ་གོང་འཕེལ་ལྷན་ཚོགས་ལུ་ཡང་ ལྷན་ཐབས་འབྱུང་ནི་ཨིན་པས།

དེ་བཟུམ་མའི་ ཕྱི་འབྲེལ་དོན་གཅོད་ཀྱི་ མིང་ཚིག་ཚུ་ གསར་གཏོད་ཀྱི་དོན་ལུ་ རྫོང་ཁ་གོང་འཕེལ་ལྷན་ཚོགས་ལས་ རྫོང་ཁའི་མཁས་རིག་དང་ མ་དངུལ་གྱི་ རྒྱབ་སྐྱོར་ཚུ་ བྱིན་ཡོདཔ་ད་ དཔེ་བསྐྲུན་ཐེངས་དང་པ་དེ་ སྤྱི་ལོ་ ༢༠༡༨ ལུ་ གསར་བཏོན་འབད་འདུག་པའི་གནས་ཚུལ།