ར་ནིལ་ཝིག་ཀེ་རེ་མེ་སིང་གེ་ ཤྲཱི་ལངྐའི་ སྲིད་འཛིན་གསརཔ་སྦེ་ བཙག་འཐུ་གྲུབ་ཡོདཔ།

བི་བི་སི།
སྤྱི་ཟླ་ ༧ པའི་ཚེས་ ༢༠ ལུ་ ཤྲཱི་ལངྐའི་བློན་ཆེན་ ར་ནིལ་ཝིག་ཀེ་རེ་མེ་སིང་གེ་དེ་ སྲིད་འཛིན་གསརཔ་སྦེ་ བཙག་འཐུ་གྲུབ་ཡོདཔ་ད་ ཝིག་ཀེ་རེ་མེ་སིང་གེ་དེ་ཡང་ མི་སེར་ཚུ་གིས་ མ་དགའ་མི་ཅིག་ཨིན་པས།
རྒྱལ་ཡོངས་ཚོགས་འདུའི་ནང་ སྲིད་འཛིན་གྱི་དོན་ལས་ ཚོགས་རྒྱན་བཙུགས་པའི་སྐབས་ལུ་ ཁོ་གི་དོ་འགྲན་པ་ ཌཱུལ་ལཱཛ་ ཨ་ལ་ཧབ་པེ་རུ་མ་གིས་ ཚོགས་རྒྱན་ ༨༢ ལས་ མ་ཐོབ་རུང་ ཁོ་གིས་ ཚོགས་རྒྱན་ ༡༣༤ ཐོབ་ནུག།
ཤྲཱི་ལངྐའི་ སྲིད་འཛིན་བགྲེསཔ་ གོ་ཊ་བཱ་ཡ་ ར་ཇ་པག་ས་དེ་ བདུན་ཕྲག་ཧེ་མའི་ནང་ རྒྱལ་ཁབ་ནང་ལས་ བྱོག་སོང་ཡོདཔ་ད་ མ་གཞི་ ཝིག་ཀེ་རེ་མེ་སིང་གེ་ཡང་ མི་སེར་ཚུ་གིས་ དགོངས་ཞུ་འབད་དགོཔ་སྦེ་ སླབ་ཡོདཔ་ཨིན་པས།
སྲིད་འཛིན་གསརཔ་ ཝིག་ཀེ་རེ་མེ་སིང་གེ་གིས་ ཁོ་གི་ཁ་ཐུག་ལས་ ཚོགས་འདུའི་ནང་ མོས་མཐུན་ཐོག་ལས་ སྲིད་རྒྱུས་བརྩམ་སྟེ་ མི་སེར་ཚུ་གི་ དཀའ་སྡུག་ཚུ་ བསལ་ཐབས་ལུ་ ག་དེ་དྲག་དྲག་ ཕྱག་ཞུ་འོང་ཟེར་གསུངས་ནུག།
དེ་མ་ཚད་ ཤྲཱི་ལངྐའི་ མི་སེར་ཚུ་གི་ ཡིད་ཆེས་དང་འཁྲིལ་ཏེ་ དཔལ་འབྱོར་གྱི་ གནས་སྟངས་ཚབས་ཆེན་སྦེ་ར་ མར་ཉམས་འགྱོ་མིའི་ དཀའ་ངལ་དེ་ བསལ་ཚུགས་པ་ཅིན་ སྲིད་འཛིན་བགྲེསཔ་གི་ གནས་ཡུན་མ་ཚང་ཚུན་ ཕྱག་ཞུ་ནི་ཨིན་ཟེར་ གསུངས་ཡོདཔ་ད་ གནས་ཡུན་དེ་ སྤྱི་ལོ་ ༢༠༢༤ སྤྱི་ཟླ་ ༡༡ པའི་ནང་ ཚང་ནི་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: