ཕོ་སྐྱེས་ཅིག་གིས་ ན་ཆུང་བུམོ་ཅུང་ཅིག་ལུ་ དབང་བཙོང་འདོད་སྤྱོད།

བདེ་སྐྱིད་ཆོས་སྒྲོན།
སྤྱི་ཟླ་ ༧ པའི་ཚེས་ ༢༠ ལུ་ དབང་འདུས་རྫོང་ཁག་ རུས་སྦིས་ས་ལུ་ སྐྱེས་ལོ་ ༢༢ འབད་མི་ ཕོ་སྐྱེས་ཅིག་གིས་ སྐྱེས་ལོ་ ༨ འབད་མི་ སློབ་རིམ་ ༢ པའི་ སློབ་ཕྲུག་བུམོ་ཅུང་ཅིག་ལུ་ དབང་བཙོང་གི་སྒོ་ལས་ ལུས་འབྲེལ་འབད་ནུག།
དེ་ཡང་ ཉིན་མའི་ཆུ་ཚོད་ཕྱེད་དང་ ༣ དེ་ཅིག་ཁར་ བུམོ་ཅུང་དེ་ སློབ་གྲྭའི་ནང་ལས་ ཁྱིམ་ནང་ལོག་པའི་ལམ་ཁར་ ཉེས་འཛུགས་ཅན་དེ་གིས་ བཟུང་ཞིནམ་ལས་ ལམ་འོག་ལུ་ཁྱིད་དེ་ ལུས་འབྲེལ་འབད་ནུག་ཟེར་ དབང་འདུས་ཕོ་བྲང་ རྒྱལ་གཞུང་འབྲུག་གི་འགག་སྡེ་གིས་ བཤདཔ་ཨིན་པས།
དེ་བསྒང་ ཕོ་སྐྱེས་དེ་གིས་ ཆང་ཅིག་ཡང་ འཐུང་ཡོདཔ་ད་ དེ་སྦེ་ འདོད་སྤྱོད་འབད་བའི་ཤུལ་ལུ་ བུམོ་ཅུང་དེ་ ས་གནས་དེ་ཁ་ར་ བཀོག་བཞག་ནུག་ཟེར་ཨིན་པས།
དེ་བསྒང་ ཉེ་འདབས་ཀྱི་ཞིང་ཁར་ ལཱ་འབད་མི་ཚུ་གིས་ བུམོ་ཅུང་དེ་གིས་ ན་ཟུག་གི་ སྐད་རྐྱབ་ས་ གོ་བའི་ཤུལ་ལས་ སློབ་གྲྭའི་དབུ་འཛིན་ལུ་ སྙན་ཞུ་འབད་ཡོདཔ་བཞིན་དུ་ དབུ་འཛིན་གྱིས་ རྒྱལ་གཞུང་འགག་སྡེ་ལུ་ སྙན་ཞུ་འབད་ནུག།
ཕོ་སྐྱེས་དེ་ ས་གནས་དེ་ཁ་ལས་ར་ འཛིན་བཟུང་འབད་བའི་ཤུལ་ལུ་ ཁོ་གིས་ཡང་ བྱ་ངན་འབད་ཡོདཔ་སྦེ་ ཁ་བཟེད་ཡོདཔ་ཨིན་པའི་གནས་ཚུལ།