ལྷོ་ཀོ་རི་ཡ་གིས་ འབྲུག་ལུ་ གློག་ཤུགས་སྣུམ་འཁོར་ ༤ རྩིས་སྤྲོད།

སྤྱི་ཟླ་ ༨ པའི་ཚེས་ ༤ ལུ་ འབྲུག་གི་དོན་ལས་ ལྷོ་ཀོ་རི་ཡའི་གཞུང་ཚབ་ ལི་ཇང་ཀེ་འུན་གྱིས་ ཕྱི་འབྲེལ་དྲུང་ཆེན་ པདྨ་ཆོས་སྒྲོན་ལུ་ ཧུན་ཌའི་ཀོ་ན་ཟེར་མི་ གློག་ཤུགས་སྣུམ་འཁོར་ ༤ རྩིས་སྤྲོད་འབད་ནུག།

སྣུམ་འཁོར་དེ་ཡང་ འབྲུག་ལུ་ ལྷོ་ཀོ་རི་ཡ་གཞུང་གིས་ སྤྱི་ལོ་ ༢༠༢༡ གི་ ལས་འགུལ་ཆུང་བའི་ གྲོགས་རམ་འོག་ལས་ བྱིན་ཡོདཔ་ད་ སྤྱི་ལོ་ ༢༠༡༦ ལས་ཚུར་ ཧུན་ཌའི་ཀོ་ན་རྩིས་ཏེ་ ཀོ་རི་ཡ་གཞུང་ལས་ སྣུམ་འཁོར་ ༢༢ ཐོབ་སྟེ་ཡོདཔ་ཨིན་པས།

ཕྱི་འབྲེལ་དྲུང་ཆེན་ པདྨ་ཆོས་སྒྲོན་གྱིས་ གློགས་ཤུགས་སྣུམ་འཁོར་ ༤ ལུ་བརྟེན་ཏེ་ གཞུང་གིས་ ནག་རྫས་མར་ཕབ་ཀྱི་ སྐྱེལ་འདྲེན་ལམ་ལུགས་ ཡར་དྲག་གཏང་ནི་སྦེ་ འབད་རྩོལ་བསྐྱེད་མི་ལུ་ ལྷན་ཐབས་འབྱུང་འོང་ཟེར་བཤད་ནུག།

སྣུམ་འཁོར་རྩིས་སྤྲོད་ཀྱི་ རྟེན་འབྲེལ་སྐབས་ལུ་ ཕྱི་འབྲེལ་ལྷན་ཁག་དང་ རྒྱལ་ཡོངས་དགའ་སྐྱིད་དཔལ་འཛོམས་ལྷན་ཚོགས་ཀྱི་ འགོ་དཔོན་ཚུ་གིས་ གྲལ་གཏོགས་འབད་ཡོད་པའི་གནས་ཚུལ།