རྒྱ་པཱན་གཞུང་གིས་ བློན་པོ་དར་མགོ་ཚེ་རིང་ལུ་ གཟེངས་བསྟོད་རྟགས་མ།

རྡོ་རྗེ་དབང་ཕྱུག།
རྒྱ་པཱན་གཞུང་གིས་ བློན་པོ་དར་མགོ་ཚེ་རིང་ལུ་ རའི་ཛིང་སཱན་གཱོལ་ ཨེན་ སིལ་ཝར་སི་ཊར་ཟེར་མི་ གཟེངས་བསྟོད་རྟགས་མ་ གནང་ཡོད་མི་དེ་ སྤྱི་ཟླ་ ༩ པའི་ཚེས་ ༦ ལུ་ ཐིམ་ཕུར་སྦེ་ འབྲུག་ལུ་ རྒྱ་པཱན་གཞུང་ཚབ་ ས་ཏོ་ཤི་ སུ་ཟུ་ཀི་གིས་ འབྲུག་གཞུང་གི་ ཆེ་མཐོའི་འགོ་དཔོན་ཚུ་ འཛོམས་ཐོག་ལུ་སྦེ་ རྩིས་སྤྲོད་འབད་ནུག།
དེ་ཡང་ བློན་པོ་དར་མགོ་ཚེ་རིང་མཆོག༌ རྒྱ་པཱན་ལུ་ འབྲུག་གི་གཞུང་ཚབ་སྦེ་ ཕྱག་ཞུ་བའི་སྐབས་ལུ་ འབྲུག་དང་ རྒྱ་པཱན་གྱི་བར་ན་ མཐུན་ལམ་དམ་ཟབ་སྦེ་ གཞི༌བཙུགས༌འབད་བའི༌ བཀྲིན་དགའ༌ཚོར༌ རྗེས་སུ་དྲན༌ནིའི༌དོན༌ལས་ སྤྱི་ལོ་ ༢༠༢༡ སྤྱི་ཟླ་ ༤ པའི་ནང་ གནང་ནི་སྦེ་ཨིན༌རུང༌ ནད་ཡམས་ཀོ་ཝིཌ་-༡༩ ལུ་བརྟེན་ཏེ་ ལུས༌ཡོདཔ༌ད་ རྒྱ་པཱན་གཞུང་གིས་ འབྲུག་མི་ལུ་ དེ༌བཟུམ༌མའི་ གཟེངས་བསྟོད་རྟགས་མ་ གནང་མི་དེ་ འགོ་དང་པ་ཨིན་པས།
རྟགས་མ་དེ་ རྒྱ་པཱན་གྱི་ རྒྱལ་ཆེན་མཆོག་གིས་ རྒྱ་པཱན་གྱི་ ནང་མི་དང་ རྒྱལ་ཁབ་གཞན་གྱི་མི་ གཟེངས་ཐོན་བྱུང་མི་དང་ ལཱ་མཆོག༌ཏུ༌འགྱུར༌པ༌འབད༌མི༌ཚུ༌ལུ༌ གནང་སྲོལ་ཡོདཔ་ཨིན༌པས།
བློན་པོ་དར་མགོ་ཚེ་རིང་འདི་ རྒྱ་པཱན་ལུ་ འབྲུག་གི་གཞུང་ཚབ་སྦེ་ སྤྱི་ལོ་ ༡༩༩༩ ལས་ ༢༠༠༨ ཚུན་ ཕྱག་ཞུ་བའི་སྐབས་ལུ་ རྒྱལ་ཁབ་ ༢ ཀྱི་བར་ན་ ཆེ་མཐོའི་སྐུ་མགྲོན་མང་རབས་ཅིག་ གཟིགས་སྐོར་ལུ་ བྱོན་ཡོདཔ་མ་ཚད་ ལམ་སྲོལ་བརྗེ་སོར་གྱི་ ལས་རིམ་ལེ་ཤ་ཅིག་ཡང་ འགོ་འདྲེན་འཐབ་སྟེ་ རྒྱལ་ཁབ་ ༢ ཀྱི་བར་ན་ མཛའ་བཤེས་མཐུན་འབྲེལ་ རྩ་བརྟན་བཟོ་ཡོད་པའི་གནས་ཚུལ།

Please follow and like us: