བ་ཀུ་ལུ་ སྡེ་ཚན་ ༢༩ གི་ ཞལ་འཛོམས་སྐབས་ལུ་ བཙོག་རླུང་ཀཱར་བཱོན་མེད་མི་དང་ ཀཱར་བོན་བར་གནས་ཅན་གྱི་ རྒྱལ་ཁབ་ཚུ་གིས་ གནམ་གཤིས་ཀྱི་ འགྱུར་བ་ཐུབ་པའི་ རང་བཞིན་ལེགས་ཤོམ་ཡོད་མི་ འཛམ་གླིང་གི་དོན་ལས་ བརྩོན་ཤུགས་མདུན་བསྐྱོད་ལུ་དམིགས་ཏེ་ ཇི་ཟི་རོ་ཟེར་མི་ གྲོས་གནས་འགོ་འབྱེད།

སྤྱི་ཟླ་ ༡༡ པའི་ཚེས་ ༡༢ ལུ་ རྒྱལ་སྤྱིའི་གནས་རིམ་ནང་ མ་འོངས་པའི་དོན་ལས་ ཀཱར་བཱོན་མེད་པའི་ གནམ་གཤིས་ཀྱི་ འགྱུར་བ་ཐུབ་པའི་ རང་བཞིན་གནས་སྟངས་ ལེགས་ཤོམ་བཞག་ཐབས་ལུ་ འབྲུག་དང་ མ་གཱཛ་ཀར་ པ་ན་མ་ དེ་ལས་ སུ་རི་ནཱམ་ རྒྱལ་ཁབ་ ༤ གིས་ སྡེ་ཚན་ ༢༩ (COP29) གི་ ཞལ་འཛོམས་སྐབས་ལུ་ ཇི་ཟི་རོ་ (G-ZERO) ཟེར་མི་ གྲོས་གནས་ཅིག་ འགོ་འབྱེད་འབད་དེ་ འཛམ་གླིང་སྤྱི་ཚོགས་ཀྱི་ གནམ་གཤིས་འགྱུར་བའི་ སྒྲིག་བཀོད་མཐུན་གྲོས་ཀྱི་ འཐུས་མི་ཚུ་གི་ ཞལ་འཛོམས་ཐེངས་ ༢༩ པའི་སྐབས་ལུ་ ཨ་ཛར་བའི་ཇཱན་གྱི་ས་གནས་ བ་ཀུ་ལུ་ མཉམ་འབྲེལ་གནས་ཚུལ་ གསར་བཏོན་འབད་ནུག།
དེ་བསྒང་ ཇི་ཟི་རོའི་ འཐུས་མི་རྒྱལ་ཁབ་ ༤ གི་ དབུ་ཁྲིད་ཚུ་གིས་ གྲོས་གནས་དེ་ གཞན་དང་མ་འདྲ་བའི་ གྲོས་གནས་ཅིག་ཨིན་མི་དེ་ཡང་ འཛམ་གླིང་དང་གཅིག་ཁར་ འབྲེལ་ཆགས་ལུ་ ཐོ་ཕོག་ཡོད་མི་དེ་ ལོག་སྟེ་ར་ བཅོ་ཁ་རྐྱབ་ནི་གི་ བརྩོན་ཤུགས་མདུན་བསྐྱོད་ཀྱི་དོན་ལུ་ གལ་གནད་ཆེ་བའི་ གྲོས་གནས་ཨིན་ཟེར་ བཤད་ཡོདཔ་ཨིན་པས།
ཇི་ཟི་རོ་ གྲོས་གནས་ཀྱིས་ སྤྱི་ལོ་ ༢༠༢༥ གི་ ཤུལ་མའི་གནམ་གཤིས་ལག་ལེན་འཆར་གཞི་ (རྒྱལ་ཡོངས་ཀྱིས་ གཏན་འཁེལ་འབད་བའི་ཕན་འདེབས་) གི་ སྙན་ཞུ་ཕུལ་དགོཔ་ཡོད་མི་ལུ་ ངོས་ལེན་དང་ ཁས་ལེན་གྱིས་མ་ཚད་ དུས་ཚོད་ནམ་ར་ཨིན་རུང་ རྒྱལ་ཁབ་འདི་ ཀཱར་བཱོན་མེད་པའི་ རྒྱལ་ཁབ་སྦེ་ བཞག་ནི་ལུ་ ཁས་བླངས་འབད་ནུག།
དེ་བཟུམ་མའི་ རེ་འདོད་ཐོག་ལས་ ཇི་ཟི་རོ་ གྲོས་གནས་ཀྱིས་ སྤྱི་ལོ་ ༢༠༣༥ འཐོནམ་ད་ ཀཱར་བཱོན་གྱི་ ཚད་གཞི་མར་ཕབ་ཐོག་ དྲོད་ཚད་ཌི་གི་རི་སེལ་ཤེད་ ༡༥ ལུ་ རྒྱུན་སྐྱོང་འབད་ནི་ཡོདཔ་བཟོ་ནི་དང་ འཛམ་གླིང་གི་ དཀའ་ངལ་སུམ་བལྟབ་འབད་མི་དེ་ བསལ་ཐབས་ཀྱི་ མདུན་ལམ་དང་འཁྲིལ་ཏེ་ འཛམ་གླིང་རྒྱལ་ཡོངས་ཀྱིས་ ལག་ལེན་ལུ་རྒྱབ་སྐོར་ཚུ་ རེ་འདོད་མཐོ་དྲགས་ཀྱི་སྒོ་ལས་འབད་དགོ་པའི་ ནན་སྐུལ་ཡང་འབདཝ་ཨིན་པས།
རྒྱལ་ཁབ་ ༤ མཉམ་འབྲེལ་ཐོག་ལས་ རྒྱལ་སྤྱིའི་གནམ་གཤིས་དང་འབྲེལ་བའི་ མདུན་བསྐྱོད་ལག་ལེན་ནང་ མཉམ་འབྲེལ་དང་ གསར་བཏོད་ མཐའ་སྐྱོང་ཚུ་གི་ ལྕོགས་གྲུབ་ཡར་དྲགས་གཏང་ནི་ལུ་ གཅིག་སྒྲིལ་ཅན་གྱི་ ཁས་ལེན་དམ་ཟབ་ཡོད་ལུགས་ཚུ་གི་ གསལ་བསྒྲགས་ཡང་འབད་ནུག།
ཇི་ཟི་རོ་གྲོས་གནས་ཀྱི་ འཐུས་མི་རྒྱལ་ཁབ་ཚུ་གི་ དབུ་ཁྲིད་ཚུ་གིས་འབད་བ་ཅིན་ ང་བཅས་རའི་ རྒྱལ་ཁབ་ཚུ་ བཙོག་རླུང་ཀཱར་བཱོན་མེད་མི་དང་ ཀཱར་བཱོན་བར་གནས་ཅན་གྱི་ རྒྱལ་ཁབ་སྦེ་ བཟོ་ཐབས་ལུ་ མཐུན་མོང་མ་ཡིན་པའི་ འགན་ཁུར་འབག་སྟེ་ བཙོག་རླུང་ཀཱར་བཱོན་མེད་པའི་ གནས་སྟངས་སྲུང་སྐྱོབ་འབད་ནི་དང་ ཀཱར་བཱོན་སིམ་ས་ཚུ་ ཡར་དྲགས་གཏང་སྟེ་ སྐྱེ་ལྡན་རིགས་སྣ་ཚུ་ཡང་ ཉེན་སྲུང་ཐོག་ལས་ མ་འོངས་པར་ ཡུན་བརྟན་གོང་འཕེལ་ལུ་ རྒྱབ་སྐྱོར་དང་ གནམ་གཤིས་འགྱུར་བའི་ གནོད་པ་ཚུ་ལུ་ གདོང་ལེན་འབད་ནིའི་དོན་ལས་ མདུན་ལམ་ཚུ་ གོང་འཕེལ་གཏང་སྟེ་ མདུན་བསྐྱོད་འབད་དགོ་ཟེར་ཨིན་པས།
དེ་ཡང་ གསར་བཏོད་འདི་ པེ་རིཛ་གི་ ཆིངས་ཡིག་གིས་མ་དོ་བར་ འཕྲལ་ཁམས་ཅིག་ཁར་ འཛམ་གླིང་འགོ་ཁྲིདཔ་ཚུ་གིས་ མ་འོངས་དབུ་ཁྲིད་ཞལ་འཛོམས་སྐབས་ལུ་ ཆ་འཇོག་གྲུབ་མི་ མ་འོངས་སྒྲིག་ཆ་དང་ ཀུན་མིང་མོན་ཊི་ཡཱལ་ རྒྱལ་སྤྱི་སྐྱེ་ལྡན་རིགས་སྣའི་ སྒྲིག་བཀོད་ལྟར་དུ་ སྤྱི་ལོ་ ༢༠༥༠ ལུ་ རང་བཞིན་གནས་སྟངས་དང་ མཐུན་སྒྲིག་ཅན་གྱི་ འཚོ་གནས་ཟེར་མིའི་ དམིགས་དོན་ཚུ་དང་ འབྲེལ་མཐུན་ཡོདཔ་མ་ཚད་ རྒྱལ་ཡོངས་ཀྱིས་ གཏན་འཁེལ་འབད་མི་ ཕན་འདེབས་དོན་ཚན་ ༣.༠ དང་ཡང་ ཚུལ་མཐུན་ཡོདཔ་སྦེ་བཀོད་ནུག།
སྐྱེ་ལྡན་རིགས་སྣ་གིས་ཕྱུག་པའི་ རྒྱལ་ཁབ་དེ་ཚུ་གིས་ མཁའ་དབྱིངས་བཙོག་ཞུགས་ ཚད་འཛིན་འབད་ནི་དང་ ནགས་ཚལ་དང་ ཆུ་ཞིང་ཚུ་གིས་གཙོས་པའི་ སྐྱེ་ལྡན་རིམ་ལུགས་གཞན་ཚུ་བཟུམ་མའི་ ཀཱར་བཱོན་སིམ་ས་ཚུ་ཡང་ ཡར་དྲགས་གཏང་ནི་གི་དོན་ལས་ སྲིད་བྱུས་བརྩམ་ནི་གི་ ཁས་ལེན་ཡང་ གྲུབ་ཡོདཔ་ཨིན་པས།
ཇི་ཟི་རོ་ གྲོས་གནས་ཀྱིས་ གནས་གཤིས་ཡར་དྲགས་ཀྱི་ རེ་འདོད་ཡར་དྲགས་གཏང་ནི་དང་ མ་དངུལ་གྱི་ རྒྱབ་སྐྱོར་ཡར་སེང་ འཕྲུལ་རིག་བཀྲམ་སྤེལ་ཚུ་གི་སྐོར་ལས་ སྐུལ་བསྒྲགས་འབདཝ་མ་ཚད་ གོང་འཕེལ་འགྱོ་བའི་བསྒང་ཡོད་མི་ རྒྱལ་ཁབ་ཚུ་གི་ ནུས་སྟོབས་གོང་འཕེལ་དང་ ཉེན་ཁ་ཅན་གྱི་ མི་སྡེ་ཚུ་གི་ སྲུང་སྐྱོབ་ཀྱི་དོན་ལུ་ཨིནམ་ད་ འཐུས་མི་རྒྱལ་ཁབ་ཚུ་གིས་ ཉམས་མྱོང་དང་ སྲིད་བྱུས་ཀྱི་ ཐབས་ལམ་ཚུ་ བརྗེ་སོར་ཐོག་ལས་ ཡུན་བརྟན་ཅན་གྱི་ འཛམ་གླིང་གི་དོན་ལུ་ ཀཱར་བཱོན་ཐོན་ཚད་ ཀླད་ཀོར་གུ་ རྒྱུན་སྐྱོང་འཐབ་ནི་དང་འབྲེལ་ཏེ་ ཁྱད་རིག་ཚུ་ གོང་འཕེལ་གཏང་ནི་ཚུ་ནང་ མཉམ་འབྲེལ་འཐབ་ནི་སྦེ་བཀོད་ནུག།
དེ་མ་ཚད་ ཇི་ཟི་རོ་ གྲོས་གནས་ཀྱི་ འཐུས་མི་རྒྱལ་ཁབ་ཚུ་གིས་ རྒྱལ་སྤྱིའི་གནམ་གཤིས་དང་འབྲེལ་བའི་ སྲིད་བྱུས་ཀྱི་ གྲོས་བསྟུན་ཚུ་ནང་ ཀཱར་བཱོན་མེད་པའི་སྐོར་ལས་ བརྗོད་དོན་སྔར་བ་སྒྲིང་སྒྲིང་སྦེ་ བཀོད་ནི་གི་ དམིགས་གཏད་བསྐྱེད་མི་དང་གཅིག་ཁར་ ཀཱར་བཱོན་སིམ་ས་ཚུ་ ཡར་དྲགས་གཏང་ནི་དང་ སྐྱེ་ལྡན་རིགས་སྣ་དང་ སྐྱེ་ལྡན་རིམ་ལུགས་གཞན་ཚུ་ ཉམས་སྲུང་འབད་ནིའི་ནང་ ཐབས་ཤེས་སྣ་མང་གི་སྒོ་ལས་ མ་དངུལ་བསྡུ་ལེན་ཚུ་ གསར་བཏོད་འབད་ནི་གི་ ལཱ་ཚུ་ནང་ བརྩོན་ནི་ཨིན་པས།
ཇི་ཟི་རོ་ གྲོས་གནས་དེ་གི་ གཙོ་འཛིན་དེ་ཡང་ འབྲུག་ལུ་ གཏན་འཇགས་ཡིག་ཚང་ཅིག་གིས་ རྒྱབ་སྐྱོར་འབད་དེ་ སྐོར་རྒྱབ་ཐོག་ལས་ འབད་ནི་ཨིན་པའི་གནས་ཚུལ།