རྒྱ་གར་གྱི་ ཁྲོམ་སྡེ་ཅེན་ནའི་ལུ་ ཕོ་སྐྱེས་ཅིག་གིས་ ཌོག་ཊར་ཅིག་ལུ་ གནོདཔ་བཀལ་ཡོདཔ།

བི་བི་སི།
སྤྱི་ཟླ་ ༡༡ པའི་ཚེས་ ༡༤ ལུ་ རྒྱ་གར་གྱི་ ལྷོ་ཕྱོགས་ཁྲོམ་སྡེ་ ཅེན་ནའི་ལུ་ གྱི་ཅུང་འབག་མི་ ཕོ་སྐྱེས་ཅིག་གིས་ ཌོག་ཊར་ཅིག་ལུ་ གནོདཔ་བཀལ་ཡོདཔ་ལས་ རྒྱལ་ཁབ་ནང་ གསོ་རིག་མཁས་མཆོག་ཚུ་གི་ ཉེན་སྲུང་ལུ་ ཚ་གྱང་ལང་དགོ་པའི་ གནད་དོན་ཅིག་ལུ་ གྱུར་ཡོདཔ་ཨིན་པས།
དེ་ཡང་ ཁྲིམས་སྲུང་འགག་སྡེ་གིས་ བཤད་དོ་བཟུམ་འབད་བ་ཅིན་ གཞུང་གི་སྨན་ཁང་ནང་ ཨའི་གི་སྨན་བཅོས་འབད་མི་ལུ་ སེམས་མ་དགའ་བར་ཡོད་མི་ ཕོ་སྐྱེས་དེ་གིས་ སྨན་བཅོས་མཁས་མཆོག་ བཱ་ལ་ཇི་ ཇ་ག་ན་ཐཱན་ལུ་ ཚར་ལེ་ཤ་ཅིག་ར་ གྱི་གསོབ་ཡོད་རུང་ ཌོག་ཊར་གྱི་ གནས་སྟངས་དེ་ ལེགས་ཤོམ་སྦེ་ར་ཡོད་ཟེར་ཨིནམ་ད་ བྱ་ངན་འབད་མི་དེ་ ཁྲིམས་སྲུང་འགག་སྡེའི་ དོ་དམ་འོག་ལུ་བཏང་ནུག།
རྒྱ་གར་གསོ་རིག་ཚོགས་པའི་ སྙན་ཞུའི་ནང་ བཀོད་དོ་བཟུམ་འབད་བ་ཅིན་ ཉུང་ཤོས་ར་ ཌོག་ཊར་བརྒྱ་ཆ་ ༧༥ ལྷགཔ་ཅིག་ལུ་ གནོདཔ་བཀལ་ནུག་ཟེར་ཨིནམ་ད་ དེ་བཟུམ་མའི་ གནོདཔ་བཀལ་མི་ཚུ་གི་གྲས་ལས་ བརྒྱ་ཆ་ ༦༨.༣༣ དེ་ཅིག་ ནད་གཡོགཔ་ཚུ་གིས་ གནོདཔ་བཀལ་ནུག་ཟེར་ བཀོད་འདུག་པའི་གནས་ཚུལ།