ཡུ་ཨེཛ་གིས་ ཨཱལ་ཀའི་ཌ་དང་ ཏ་ལི་བཱན་སྡེན་གྱི་ འགོ་འཛིན་ ༤ རྒྱལ་སྤྱིའི་དྲག་ཐོག་དབང་བཙོངཔ་ཨིན་པའི་ངོས་འཛིན།

ཨེན་ཌི་ཊི་ཝི།
ཡུ་ཨེཛ་གི་ རྒྱལ་ཁམས་དྲུང་ཆེན་ ཊོ་ནི་བི་ལིང་ཀེན་གྱིས་ བཤད་དོ་བཟུམ་འབད་བ་ཅིན་ ཨཱལ་ཀའི་ཌ་དང་ པ་ཀིཛ་ཏཱན་ ཏ་ལི་བཱན་སྡེན་གྱི་ འགོ་འཛིན་ ༤ རྒྱལ་སྤྱིའི་དྲག་ཐོག་དབང་བཙོངཔ་སྦེ་ ངོས་འཛིན་འབད་ཡོདཔ་ལས་ ཡུ་ཨེཛ་གཞུང་གིས་ ཨཕ་གྷ་ནིཛ་ཏཱན་ལུ་ དྲག་ཐོག་དབང་བཙོངཔ་ཚུ་གིས་ ལཱ་ངན་འབད་ནི་མེདཔ་ ངེས་གཏན་བཟོ་འོང་ཟེར་ཨིན་པས།
དེ་སྦེ་ དྲག་ཐོག་དབང་བཙོང་འབད་མི་ ངོས་འཛིན་འབད་དེ་ཡོད་མི་ཚུ་ཡང་ རྒྱ་གར་གྱི་ ནང་གསེས་གླིང་ཆེན་ནང་གི་ ཨཱལ་ཀའི་ཌའི་འགོ་འཛིན་ ཨོ་ས་མ་ མེཧ་མཱུཌ་དང་ འགོ་འཛིན་འོགམ་ ཡ་ཧི་ཡ་གྷའུ་རི་ དེ་ལས་ སྡེ་ཚན་དེ་ཁར་ གྲལ་གཏོགས་ནང་བཙུགས་མི་ མུ་ཧ་མེཌ་མ་རུཕ་ཚུ་ ཚུད་ཡོདཔ་ཨིན་པས།
དེ་མ་ཚད་ པ་ཀིཛ་ཏཱན་གྱི་ས་ཁོངས་ ཁའི་བར་པག་ཏཱུན་ཁ་ མངའ་སྡེའི་ནང་ དྲག་ཐོག་དབང་བཙོང་གི་ལཱ་ཚུ་ བལྟ་རྟོག་འབད་མི་ ཏེཧ་རིག་ཨི་ ཏ་ལི་བཱན་ཟེར་མི་ སྡེ་ཚན་གྱི་ འགོ་འཛིན་འོགམ་ ཀ་རི་ཨམ་ཇཱཌ་ཟེར་མི་དེ་ཡང་ ཡུ་ཨེཛ་གི་ བཀག་དམ་འོག་ལུ་ བཙུགས་ཡོདཔ་ཨིན་པས།
བཀག་དམ་དེ་ཡང་ ཡུ་ཨེཛ་གི་ ཁྱབ་ཁོངས་ནང་འཁོད་ཚུད་མི་ གོང་གི་མི་ངོམ་ཚུ་གི་ རྒྱུ་དངོས་ཚུ་ སྤྲོད་ལེན་འབད་ནི་མེདཔ་སྦེ་ བཞག་ནི་ཨིན་པས།
རྒྱལ་སྤྱིའི་ནང་ དྲག་ཐོག་དབང་བཙོང་གི་ ལཱ་འབད་མི་ཚུ་གིས་ ཨཱཕ་གྷ་ནིཛ་ཏཱན་ལུ་ དྲག་ཐོག་དབང་བཙོང་གི་ ལཱ་བྱ་འཐབ་མ་ཆོགཔ་སྦེ་ བཟོ་ནི་གི་ ཁས་ལེན་ལུ་ བརྩི་བཀུར་འབད་ནི་ཨིན་པའི་སྐོར་ལས་ རྒྱལ་ཁམས་དྲུང་ཆེན་གྱིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: