ཡུ་ཀེ་རེན་ལུ་ ཡུ་རོབ་ཀྱི་ འགོ་ཁྲིདཔ་ཚུ་ བལྟ་སྐོར་ལུ་ ལྷོད་དེ་ཡོད་པའི་བར་ན་ གནམ་ཁ་ལས་ གནོད་འཚུབས་ཀྱི་བརྡ་སྐད།

རོའི་ཊརཛ།
སྤྱི་ཟླ་ ༢ པའི་ཚེས་ ༣ ལུ་ ཡུ་རོབ་རྒྱལ་ཚོགས་ཀྱི་ འགོ་ཁྲིདཔ་ཚུ་ ཡུ་ཀེ་རེན་གྱི་རྒྱལ་ས་ ཀི་ཡེབ་ལུ་ སྲིད་འཛིན་ཝོ་ལོ་ཌི་མིར་ ཟེ་ལེནཛ་ཀི་དང་གཅིག་ཁར་ ར་ཤི་ཡའི་ རྒྱབ་འགལ་ལུ་ བཀག་ཆ་ཁ་སྐོང་དང་ ཡུ་ཀེ་རེན་ རྒྱལ་ཁབ་དེ་ ཡུ་རོབ་རྒྱལ་ཚོགས་ནང་ འཛུལ་ཞུགས་ཀྱི་སྐོར་ལས་ བསྟུན་གྲོས་འབད་བར་ ལྷོད་དེ་ཡོད་མི་དང་འབྲེལ་ཏེ་ ཡུ་ཀེ་རེན་གྱི་ རྒྱལ་ཁབ་མཐའ་དབུས་མེད་པར་ གནམ་ཁ་ལས་ གནོད་འཚུབས་ཀྱི་ བརྡ་སྐད་ཚུ་ བཏང་ཡོདཔ་ཨིན་པས།
དེ་ཡང་ ཡུ་རོབ་རྒྱལ་ཚོགས་ བཀོད་ཁྱབ་ལྷན་ཚོགས་ཀྱི་ ཁྲི་འཛིན་དང་ འགོ་ཁྲིདཔ་ ༢༧ སྤྱི་ལོ་ ༢༠༢༢ སྤྱི་ཟླ་ ༢ པའི་ཚེས་ ༢༤ ལུ་ ར་ཤི་ཡ་གིས་ ཡུ་ཀེ་རེན་དང་གཅིག་ཁར་ དམག་འཁྲུག་འགོ་བཙུགས་ཏེ་ ལོ་གཅིག་འཁོར་བའི་ དུས་དྲན་དང་འྦརེལ་ཏེ་ ཡུ་ཀེ་རེན་ལུ་ རྒྱབ་སྐྱོར་ཡོད་པའི་ བརྡ་མཚོན་གྱི་དོན་ལས་ འོང་ཡོདཔ་ཨིན་པས།
ཡུ་རོབ་རྒྱལ་ཚོགས་ཀྱི་ཁྲི་འཛིན་ ཅར་ལིཛ་མའི་ཀཱལ་གྱིས་ མི་སྡེ་བརྡ་བརྒྱུད་ ཊུ་ཡེ་ཊར་ནང་ ང་བཅས་ཀྱིས་ སེམས་ཐག་བཅད་མི་དེ་ལུ་ འགྱུར་ལྡོག་མེད་ལུགས་དང་ ཡུ་རོབ་རྒྱལ་ཚོགས་ནང་ འཛུལ་ཞུགས་ཀྱི་ བྱ་སྒོ་རེ་རེ་བཞིན་དུ་ལུ་ཡང་ ང་བཅས་ཀྱི་ ཁ་ཐུག་ལས་ རྒྱབ་སྐྱོར་འབད་ནི་ཨིན་ཟེར་བཀོད་ནུག།
སྲིད་འཛིན་ཟེ་ལེནཛ་ཀི་གིས་ ཡུ་རོབ་རྒྱལ་ཚོགས་ལུ་ ནན་བསྐུལ་འབད་མིའི་ནང་ ཡུ་རོབ་རྒྱལ་ཚོགས་ཀྱི་ བཀག་ཆ་ཚུ་ ལོ་འཁོར་དུས་དྲན་ཚུན་ བསྒུག་སྡོད་པ་ཅིན་ ཕྱི་ར་ཕྱི་ནི་ཨིནམ་ལས་ ཉེས་བྱའི་ཐབས་ལམ་ཚུ་ སྔར་བ་སྒྲིང་སྒྲིང་སྦེ་ བཟོ་དགོ་པའི་སྐོར་ལས་ བཤད་ནུག་ཟེར་ བཀོད་འདུག་པའི་གནས་ཚུལ།

Please follow and like us: