ཨའུ་མཚོ་རྣམ་གྲོལ་གླིང་ དགོན་འཛིན་གྲྭ་ཚང་ནང་ འཕགས་པ་ཐུགས་རྗེ་ཆེན་པོའི་ ལོ་བསྟར་སྒྲུབ་ཆེན།

གནམ་ལོ་ཆུ་ཡོས་ཟླཝ་ ༡ པའི་ཚེས་ ༡༥ སྤྱི་ཟླ་ ༣ པའི་ཚེས་ ༧ ལས་ རྗེ་མཁན་ཁྲི་རབས་ ༧༠ པ་ སྐྱབས་རྗེ་རིན་པོ་ཆེ་མཆོག་ དབུ་བཞུགས་ཐོག་ལུ་ ལྷུན་རྩེ་ཨའུ་མཚོ་རྣམ་གྲོལ་གླིང་ དགོན་འཛིན་གྲྭ་ཚང་གི་ བླ་སློབ་དང་ དགེ་སློང་ཞལ་གྲངས་ ༢༠༠ ལྷགཔ་ཅིག་གིས་ ཉིན་གྲངས་ ༧ གྱི་རིང་ལུ་ འཕགས་པ་ཐུགས་རྗེ་ཆེན་པོའི་ སྒྲུབ་ཆེན་གནངམ་ཨིན་པས།
དེ་ཡང་ རང་ཟླ་ ༡ པའི་ཚེས་ ༡༤ ལུ་ ཨའུ་མཚོ་རྣམ་གྲོལ་གླིང་ དགོན་འཛིན་གྲྭ་ཚང་ནང་སྦེ་ བུམ་བཀྲ་ཤིས་དང་བཅསཔ་སྦེ་ འགོ་བཙུགས་གནང་མི་ འཕགས་པ་ཐུགས་རྗེ་ཆེན་པོ་ སྤྱན་རས་གཟིགས་ཀྱི་ ལོ་བསྟར་སྒྲུབ་ཆེན་དེ་ ཐེངས་ ༩ པ་ཨིན་པས།
དེ་བཟུམ་མའི་ སྒྲུབ་ཆེན་གནང་མི་འདི་ སྤྱིར་རྒྱལ་ཁབ་ཀྱི་ སྐུ་རིམ་དང་ ལྷག་པར་དུ་ མི་དབང་ཡབ་མེས་སྲས་ ༣ གྱིས་ དབུ་གཙོས་པའི་ མི་དབང་སྐུ་འཁོར་ལྷན་རྒྱས་ཚུ་ སྐུ་ཚེ་ཞབས་པད་ བརྟན་ཐབས་ལུ་དང་ བློན་འབངས་ག་ར་ འགལ་རྐྱེན་བར་ཆད་མེད་པར་ བདེ་སྐྱིད་ཀྱི་ངང་ལུ་ གནས་ཐབས་ལུ་ཨིན་ཟེར་ རྣམ་གྲོལ་གླིང་ དགོན་འཛིན་གྲྭ་ཚང་གི་ ཕེཛ་བུག་ནང་བཀོད་ནུག།
སྒྲུབ་ཆེན་དེ་ ཆུ་ཁ་རྫོང་ཁག་ སྐྱབས་ཆ་ལས་ བསྟན་པའི་སྦྱིན་བདག་ ཀརྨ་རྒྱལ་མཚན་དང་ བཟའ་ཚང་ནང་མི་ཚུ་གིས་ གཏན་རྩའི་མ་དངུལ་ བཙུགས་ཡོད་མིའི་ཐོག་ལས་ ལོ་བསྟར་བཞིན་དུ་ ཆོ་འཕྲུལ་ཟླ་བའི་ དུས་བཟང་ཁྱད་པར་ཅན་དང་འབྲེལ་ཏེ་ གནངམ་ཨིན་པའི་གནས་ཚུལ།

Please follow and like us: