ར་ཤི་ཡ་གིས་ ཡུ་ཀེ་རེན་གྱི་ བཱག་མུཊ་ཁྲོམ་སྡེ་ འཕྱོག་ནིའི་དོན་ལས་ དམག་འཁྲུག་ལང་མིའི་ནང་ རྒྱལ་ཁབ་གཉིས་ཆ་ར་ལུ་གྱོང་རྒུད།

བི་བི་སི།  

ར་ཤི་ཡ་གིས་ ཡུ་ཀེ་རེན་གྱི་ ཤར་ཕྱོགས་ཁྲོམ་སྡེ་ བཱག་མུཊ་འཕྱོག་ནིའི་དོན་ལས་ བརྩོན་ཤུགས་བསྐྱེད་དེ་ དམག་འཁྲུག་ལང་མིའི་ནང་ ཡུ་ཀེ་རེན་དང་ ར་ཤི་ཡའི་ རྒྱལ་ཁབ་གཉིས་ཆ་ར་ལུ་ གྱོང་རྒུད་སྦོམ་སྦེ་ར་ ཕོག་སྟེ་ཡོདཔ་ཨིན་པས།

དེ་ཡང་ ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟེ་ལེན་ཀི་གིས་ བཤད་དོ་བཟུམ་འབད་བ་ཅིན་ འདས་པའི་ཉིན་གྲངས་ དག་པ་ཅིག་གི་ ནང་འཁོད་ལུ་ར་ ར་ཤི་ཡའི་དམག་མི་ ༡,༡༠༠ ལྷགཔ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ གཞན་མི་ལེ་ཤ་ཅིག་ལུ་ཡང་ རྨ་སྐྱོན་འཚུབ་ཅན་སྦེ་ར་ བྱུང་ནུག་ཟེར་ཨིན་པས།

ར་ཤི་ཡ་གིས་ བཤད་དོ་བཟུམ་འབད་བ་ཅིན་ འདས་པའི་ཆུ་ཚོད་ ༢༤ གི་ ནང་འཁོད་ལུ་ར་ ཡུ་ཀེ་རེན་གྱི་ དམག་མི་ ༢༢༠ ལྷགཔ་ཅིག་ལུ་ ཤི་རྐྱེན་བྱུང་ཡི་ཟེར་ཨིན་རུང་ བི་བི་སི་ གནས་ཚུལ་ལས་སྡེའི་ ཁ་ཐུག་ལས་ བདེན་དཔྱད་འབད་མ་ཚུགས་ཟེར་བཀོད་ནུག།

ར་ཤི་ཡའི་ དམག་མི་ཚུ་ བཱག་མུཊ་ཁྲོམ་སྡེའི་ ཉེ་འདབས་ལུ་ ལྷོད་ཡོདཔ་ད་ དེ་ཡང་ ཌོ་ནེཊཛ་ཟེར་མི་ ལུང་ཕྱོགས་དེ་ ར་ཤི་ཡ་གིས་ དབང་བཟུང་འབད་ནི་གི་ དམིགས་གཏད་བསྐྱེདཔ་ཨིན་པས་ཟེར་ བཀོད་འདུག་པའི་གནས་ཚུལ།