ཕི་ལི་པིན་ལུ་ སྐྱེལ་འདྲེན་གྲུ་ཅིག་ལུ་ མེ་རྐྱེན་བྱུང་སྟེ་ མི་གྲངས་ ༢༨ ལུ་ཤི་རྐྱེན།

བི་བི་སི།
ཕི་ལི་པིན་ལུ་ སྐྱེལ་འདྲེན་གྲུ་ཅིག་ལུ་ མེ་རྐྱེན་བྱུང་སྟེ་ མི་གྲངས་ ༢༨ དེ་ཅིག་ལུ་ ཤི་རྐྱེན་བྱུང་ཡོད་རུང་ འགྲུལ་པ་ ༢༣༠ དེ་ཅིག་ སྲོག་སྐྱབས་འབད་ཚུགས་ནུག།
དེ་ཡང་ སྤྱི་ཟླ་ ༣ པའི་ཚེས་ ༢༩ གི་ནུབ་མོར་ བསིལ་དྲོན་སྙོམས་འཕྲུལ་ཡོད་སའི་ ཁང་མིག་ཅིག་གི་ནང་ལས་ འགོ་བཙུགས་ཡོད་རུང་ མེ་རྐྱེན་དེ་ ག་དེ་སྦེ་ བྱུང་བྱུངམ་ཨིན་ན་ གསལ་ཏོག་ཏོ་ཅིག་ ཧ་མ་གོཝ་ཨིན་པས།
ག་དེ་སྦེ་ཨིན་རུང་ རྐྱེན་ངན་དེ་ནང་ ཤི་རྐྱེན་བྱུང་མིའི་གྲས་ཁར་ ཟླཝ་ ༦ ལང་མི་ ཨ་ལོ་ཅིག་གིས་གཙོས་པའི་ ཨ་ལོ་ཆུང་ཀུ་ ༣ ཡང་ཡོདཔ་ཨིན་པས།
དེ་སྦེ་ མེ་རྐྱེན་བྱུང་པའི་སྐབས་ལུ་ འགྲུལ་པ་མ་ཤོས་ཅིག་ར་ ཉལ་ཏེ་ཡོདཔ་ད་ གྲུའི་དེད་དཔོན་གྱིས་ འགྲུལ་པ་ཚུ་ རྩལ་རྐྱབ་སྟེ་ རྒྱ་མཚོའི་མཐའ་མར་ འཐོན་ཐབས་ལུ་ འགྲོས་ཀྱིས་བཏང་སྟེ་ གྲུ་དེ་ མཚོ་མཐའི་ཉེ་འདབས་ལུ་ བསྐྱལ་ཡོདཔ་སྦེ་ མཚོ་མཐའི་སྲུང་རྒྱབ་ཚུ་གིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: