ལྷོ་ཕྱོགས་རྫོང་ཁག་ཚུ་ནང་ མི་དབང་མཆོག་གི་གཟིགས་སྐོར།

མི་དབང་མངའ་བདག་རིན་པོ་ཆེ་མཆོག་ ལྷོ་ཕྱོགས་རྫོང་ཁག་ཚུ་ནང་ བདུན་ཕྲག་ ༡ གི་རིང་ལུ་ གཟིགས་སྐོར་གྱི་དོན་ལས་ ཆིབས་བསྐྱོད་གནང་མི་དེ་ མཇུག་བསྡུ་སྟེ་ སྤྱི་ཟླ་ ༤ པའི་ཚེས་ ༢༣ ལུ་ རྒྱལ་ས་ཐིམ་ཕུར་ ལོག་ཕེབས་གནང་ཡི།
མི་དབང་མཆོག་གིས་ སྤུ་ན་ཁ་དང་ རྩི་རང་ གསར་སྤང་ དགེ་ལེགས་ཕུག་ བསམ་གྲུབ་ལྗོངས་མཁར་ བསམ་རྩེ་ ཕུན་ཚོགས་གླིང་ཚུ་ནང་ གཟིགས་སྐོར་གནངམ་ད་ ལས་སྡེ་ཁག་གི་ འགོ་འཛིན་དང་ ཞི་གཡོགཔ་ མི་སྡེའི་འགོ་ཁྲིདཔ་ དེ་ལས་ སྒེར་སྡེའི་འཐུས་མི་ཚུ་དང་གཅིག་ཁར་ མཇལ་ཕྲད་མཛད་གནང་ནུག།
དེ་མ་ཚད་ མི་དབང་མཆོག་གིས་ མགྱོགས་འགྲོས་བདེ་སྲུང་སྦྱོང་བརྡར་ལས་རིམ་ ཤོ་ཐེངས་ ༥༧ པའི་ནང་ གྲལ་གཏོགས་འབད་མི་ཚུ་དང་ཡང་ མཇལ་ཕྲད་མཛད་ཡོདཔ་ད་ བདེ་བ་ཐང་དང་ བརྟན་འབྲུག་ བཀྲིས་ཆོས་གླིང་ འཇིགས་མེད་གླིང་ བཀྲིས་དགའ་ཚལ་ཚུ་ནང་ འགོ་འདྲེན་འཐབ་མི་ བདེ་སྲུང་སྦྱོང་བརྡར་ནང་ བཅའ་མར་གཏོགས་མི་ ༡,༡༥༩ བརྩིས་ཏེ་ ད་རེས་ རྒྱལ་ཁབ་ནང་ བདེ་སྲུངཔ་བསྡོམས་ ༣༨,༩༣༥ ཡོདཔ་ཨིན་པས།
དེ་བཟུམ་སྦེ་ མི་དབང་མངའ་བདག་རིན་པོ་ཆེ་མཆོག་གིས་ བསམ་རྩེ་རྒྱ་མཚོ་གླིང་ལུ་ རྒྱལ་སྲུང་སློབ་སྡེ་ བཟོ་བསྐྲུན་གྱི་ ས་ཁོངས་ནང་ཡང་ གཟིགས་ཞིབ་གནང་ཐོག་ལས་ སྤུས་ཚད་ཅན་གྱི་ གཞི་རྟེན་མཁོ་ཆས་གོང་འཕེལ་གྱི་ ལཱ་གཡོག་དོན་ལུ་ རྒྱལ་སྲུང་ལས་རིམ་ནང་ སྦྱོང་བརྡར་འབད་མི་ བདེ་སྲུངཔ་ཚུ་དང་ཡང་ མཇལ་ཕྲད་མཛད་གནང་ནུག།
གཟིགས་སྐོར་སྐབས་ལུ་ མི་དབང་མངའ་ཞབས་མཆོག་གི་ ཕྱག་ཞུ་སྟེ་ མི་རྗེ་བློན་ཆེན་ བྱོན་ཡོད་པའི་གནས་ཚུལ།

Please follow and like us: