ཡུ་ཨེཛ་ལུ་ གཏང་ནི་སྦེ་ ཡིག་ཆ་རྫུན་མ་བཟོ་བའི་ ཉེས་འཛུགས་ཀྱི་གྲས་ཁར་ ནེ་པཱལ་གྱི་ བློན་པོ་བགྲེསཔ་ཚུ་ཡང་གྲལ་གཏོགས།

ཨཱལ་ཇ་ཟི་ར།
ནེ་པཱལ་གྱི་ ཁྲིམས་རྩོདཔ་ཚུ་གིས་ ནེ་པཱལ་གྱི་ མི་ཁུངས་ཚུ་ འབྲུག་མི་སྐྱབས་བཅོལ་བ་ཨིན་པའི་ ཡིག་ཆ་རྫུན་མ་བཟོ་སྟེ་ ཡུ་ཨེཛ་ལུ་ གཏང་ནི་འབད་བའི་ ངན་ལྷད་ཀྱི་ ཉེས་འཛུགས་ཐོག་ལུ་ མི་གྲངས་ ༣༠ ཁྲིམས་སར་བསྐྱལ་ཡོདཔ་ད་ དེ་ཚུ་གི་གྲས་ཁར་ ནེ་པཱལ་གྱི་ བློན་པོ་བགྲེསཔ་ ༢ ཡང་ཡོདཔ་ཨིན་པས།
དེ་ཡང་ སྤྱི་ཟླ་འདི་ནང་ ནང་སྲིད་བློན་པོ་བགྲེསཔ་ བཱལ་ཀི་རིཤ་ན་ཁཱན་དང་ ནུས་ཤུགས་བློན་པོ་བགྲེསཔ་ ཊོ་པི་བྷ་དུར་ ར་ཡ་མ་ཇི་ དེ་ལས་ ནང་སྲིད་དྲུང་ཆེན་བགྲེསཔ་ ཊེག་ན་ར་ཡཱན་ པཱན་ཌེ་ཚུ་གིས་གཙོས་པའི་ མི་གྲངས་ ༡༦ འཛིན་བཟུང་ཐོག་ལས་ ཉེས་འཛུགས་འབད་ཡོདཔ་ད་ ད་རུང་ཡང་ ཁྲིམས་སྲུང་འགག་སྡེ་གིས་ མི་གྲངས་ ༡༤ འཚོལ་བའི་བསྒང་ཡོདཔ་ཨིན་པས།
རྫོང་ཁག་རྩོད་དཔོན་ཡིག་ཚང་ལས་ ལགཤ་མཱན་ ཨུ་པ་དྷེ་ གི་མི་རེ་གིས་ བཤད་དོ་བཟུམ་འབད་བ་ཅིན་ ཉེས་འཛུགས་འབད་མི་ཚུ་གིས་ གཡོ་སྒྱུ་དང་ ཁྲིམས་འགལ་ཐོག་ལས་ ཡིག་ཆ་རྫུན་མ་བཟོ་སྟེ་ རྒྱལ་ཁམས་ལུ་ གནོད་འགེལ་ཚུ་འབད་ནུག་ཟེར་ཨིན་པས།
བྱ་ངན་འབད་མི་ཚུ་གིས་ ནེ་པཱལ་གྱི་ མི་ཁུངས་ལེ་ཤ་ཅིག་ འབྲུག་མི་སྐྱབས་བཅོལ་བ་ བཟོ་ཐོག་ལས་ ཡུ་ཨེཛ་ལུ་ བཏང་ནི་གི་ ཁས་ལེན་འབད་དེ་ ཏི་རུ་ལེ་ཤ་ཅིག་ བསྡུ་ལེན་འབད་ཡོདཔ་སྦེ་ གོ་བའི་ཤུལ་ལུ་ ཁྲིམས་སྲུང་འགག་སྡེ་གིས་ ཞིབ་དཔྱདའབད་ནུག།
དེ་སྦེ་ ཞིབ་དཔྱདའབད་བའི་ཤུལ་ལུ་ རྩོད་བཤེར་དེ་ ཀཐ་མཱན་ཌུ་ རྫོང་ཁག་ཁྲིམས་འདུན་ལུ་ ཕུལ་ཏེ་ཡོདཔ་ད་ གལ་སྲིད་ ཁོང་ལུ་ ཉེས་འཛུགས་འབད་མི་དེ་ ངེས་བདེན་སྦེ་ འཐོན་པ་ཅིན་ ལོ་ངོ་ ༡༥ ཚུན་གྱི་ བཙོན་ཁྲིམས་སྨིན་ནི་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: