རྒྱ་གར་ལུ་ རེལ་ལི་ཐུག་རྐྱེན་ནང་ ཤི་རྐྱེན་མི་ཚུ་གི་དོན་ལས་ བསྔོ་སྨོན་དང་ དཀར་མེ་སྟོང་མཆོད།

སྤྱི་ཟླ་ ༦ པའི་ཚེས་ ༤ གི་དྲོ་པར་ ཐིམ་ཕུ་བཀྲིས་ཆོས་རྫོང་གི་ ཀུན་ར་ནང་སྦེ་ རྒྱ་གར་ཨོ་དཱི་ཤ་ལུ་ རེལ་ལི་ཐུག་རྐྱེན་བྱུང་མིའི་ནང་ ཚེ་སྲོག་ལུ་ བར་ཆད་དང་ རྨ་སྐྱོན་བྱུང་མི་ཚུ་གི་དོན་ལས་ དཀར་མེ་སྟོང་མཆོད་ཕུལ་ཏེ་ བསྔོ་སྨོན་ལམ་ཚུ་ གནང་ཡོདཔ་ཨིན་པས།

དེ་བསྒང་ མི་དབང་འབྲུག་རྒྱལ་བཞི་པ་མཆོག་གིས་ དབུ་གཙོས་པའི་ མི་དབང་སྐུ་འཁོར་ལྷན་རྒྱས་དང་ བློན་ཆེན་ གཞུང་གི་ཆེ་མཐོའི་འགོ་དཔོན་ཚུ་གིས་ གྲལ་གཏོགས་མཛད་ཡོདཔ་མ་ཚད་ རྒྱ་གར་གཞུང་ཚབ་དང་ རྒྱ་གར་གྱི་ དམག་སྦྱོང་ལས་སྡེ་ ཨིམ་ཊཱད་དང་ ལམ་སེལ་ལས་འགུལ་ ཌཱན་ཊཱག་ཚུ་གི་ ཆེ་མཐོའི་འགོ་དཔོན་ཚུ་གིས་ཡང་ བཅའ་མར་གཏོགས་ནུག།

དེ་ཡང་ སྤྱི་ཟླ་ ༦ པའི་ཚེས་ ༢ ཀྱི་ཕྱི་རོ་ རེལ་ལི་ ༣ ཐུག་རྐྱེན་བྱུང་མིའི་ནང་ མི་གྲངས་ ༢༨༠ ལྷགཔ་ཅིག་ལུ་ ཤི་རྐྱེན་དང་ སྟོང་ཕྲག་ལྷགཔ་ཅིག་ལུ་ རྨ་སྐྱོན་བྱུང་ཡོདཔ་ལས་ མི་དབང་མངའ་བདག་རིན་པོ་ཆེ་མཆོག་དང་ འབྲུག་གཞུང་གི་ ཁ་ཐུག་ལས་ རྒྱ་གར་གཞུང་དང་ མི་སེར་ཚུ་ལུ་ མྱ་ངན་གྱི་ གསུང་འཕྲིན་ཚུ་ཡང་ གནང་ཡོད་པའི་གནས་ཚུལ།