བསམ་གྲུབ་ལྗོངས་མཁར་ལུ་ སྣུམ་འཁོར་ཐུག་རྐྱེན་ནང་ མི་ ༥ ལུ་ཤི་རྐྱེན།

འཇམ་དཔལ་ཞི་བའི་བློ་གྲོས།

སྤྱི་ཟླ་ ༦ པའི་ཚེས་ ༤ ལུ་ ཕྱི་རུའི་ཆུ་ཚོད་ཕྱེད་དང་ ༥ དེ་ཅིག་ཁར་ བསམ་གྲུབ་ལྗོངས་མཁར་རྫོང་ཁག་ བདེ་བ་ཐང་རྒེད་འོག་ ས་གནས་ཤིག་པ་ཤིང་དང་ ཏོ་ཀ་རོང་གི་བར་ན་ སྣུམ་འཁོར་ཅིག་ ལམ་འོག་ལས་མར་ རྦོབ་རིལ་འགྱོ་བའི་ རྐྱེན་ངན་ནང་ འགྲུལ་པ་ ༥ ལུ་ ཤི་རྐྱེན་བྱུང་ནུག།

དེ་ཡང་ སྣུམ་འཁོར་ཀེ་རེ་ཊ་དེ་ ལམ་འོག་ལས་མར་ མི་ཊར་ ༢༠༠ དེ་ཅིག་གི་ས་ཁར་ རྦོབ་རིལ་སོང་ཡོདཔ་ད་ དེ་བསྒང་ སྣུམ་འཁོར་དེ་ནང་ ཨམ་སྲུ་ ༣ དང་ ཕོ་སྐྱེས་ ༢ ཀྱི་གྲས་ཁར་ བདེ་བ་ཐང་ འཇིགས་མེད་རྣམ་རྒྱལ་ བཟོ་རིག་མཐོ་རིམ་སློབ་གྲྭའི་ སློབ་ཕྲུག་ ༢ ཡང་ཡོདཔ་ཨིན་པས།

སྲོག་སྐྱབས་འབད་མི་ཚུ་གི་ རྒྱབ་སྐྱོར་ཐོག་ལས་ ཤི་རྐྱེན་བྱུང་མིའི་ ཕུངམོ་དེ་ཚུ་ ཁོང་རའི་ཕམ་སྤུན་མཆེད་ཚུ་ལུ་ རྩིས་སྤྲོད་འབད་ཡོདཔ་ད་ ཐུག་རྐྱེན་དེ་གི་སྐོར་ལས་ ཁྲིམས་སྲུང་འགག་སྡེ་གིས་ དབྱེ་ཞིབ་འབད་དོ་ཡོདཔ་ཨིན་པའི་གནས་ཚུལ།