ཡུ་ཨེཛ་ལུ་ ཉེན་ཁ་ཆེ་བའི་ རླུང་འཚུབས་ཀྱིས་ ཊེག་སཱཛ་ཁྲོམ་སྡེའི་ས་གནས་ པེ་རི་ཊཱོན་ལུ་གནོད་སྐྱོན།

བི་བི་སི།
སྤྱི་ཟླ་ ༦ པའི་ཚེས་ ༡༥ ལུ་ ཕྱི་རོ་ཁམས་ཅིག་ཁར་ ཡུ་ཨེཛ་གི་ ལྷོ་ཕྱོགས་ཁ་ཐུག་ལུ་ ག་ནི་བ་ ཉེན་ཁ་ལྕི་བའི་ རླུང་འཚུབས་ལངས་ཏེ་ བྱང་ཕྱོགས་ཁྲོམ་སྡེ་ ཊེག་སཱཛ་ཟེར་སར་ མི་ ༣ ལུ་ ཤི་རྐྱེན་དང་ ལེ་ཤ་ཅིག་ལུ་ རྨ་སྐྱོན་བྱུང་ནུག།
དེ་མ་ཚད་ བརྒྱུད་འབྲེལ་གྱི་ མཐུན་རྐྱེན་ཚུ་དང་ འདྲུད་ཁྱིམ་སྣུམ་འཁོར་ཚུ་ལུ་ཡང་ གནོད་སྐྱོན་བྱུང་ཡོདཔ་ད་ པེ་རི་ཊཱོན་ལུ་ མི་རློབས་ ༨,༠༠༠ དེ་ཅིག་ སྡོད་དོ་ཡོདཔ་ད་ རྐྱེན་ངན་དེ་བྱུང་སར་ གློ་བུར་གྱི་ ཉེན་སྐྱོབ་འབད་མི་ སྡེ་ཚན༌ཚུ་ཡང་ བཏང་ཡོདཔ་ཨིན་པས།
པེ་རི་ཊཱོན་གྱི་ མེ་རྐྱེན་ཉེན་སྲུང་སྡེ་ཚན་གྱི་གཙོ་འཛིན་ པཱོལ་ཌུ་ཅར་གྱིས་ བཤད་དོ་བཟུམ་འབད་བ་ཅིན་ མི་གྲངས་ ༧༥ དེ་ཅིག་ སྨན་ཁང་ནང་ བསྐྱལ་བའི་ཁར་ འདྲུད་ཁྱིམ་ ༣༠ དེ་ཅིག་ལུ་ཡང་ ཐད་ཀར་དུ་ཕོག་ནུག་ཟེར་ཨིནམ་ད་ ས་གནས་དེ་ནང་གི་ སྨན་ཁང་ཚུ་གི་ གློག་མེ་ཡང་ མེདཔ་བཏང་ཡོདཔ་ལས་ རང་སོའི་གློག་འཕྲུལ་ཚུ་ ལག་ལེན་འཐབ་ནུག་ཟེར་ཨིན་པས།
དེ་བཟུམ་མའི་ གནམ་གཤིས་གནས་སྟངས་དེ་ བདུན་ཕྲག་མཇུག་བསྡུའི་རིང་ལུ་ འཕྲོ་མཐུད་ནི་དང་ ལྷོ་ཕྱོགས་ཀྱི་ས་གནས་ ལ་ལོ་ཅིག་ནང་ སེརཝ་དང་སྦྲགས་ཏེ་ རླུང་འཚུབས་ཚུ་ཡང་ འཕུ་ནི་བཟུམ་ཅིག་ཡོདཔ་ལས་ ད་རུང་ཡང་ གནོད་པ་འབྱུང་ནི་གི་ ཉེན་ཁ་འདུག་ཟེར་ བཀོད་འདུག་པའི་གནས་ཚུལ།

Please follow and like us: