ནེ་པཱལ་དང་ རྒྱ་ནག་གི་བར་ན་ ཟུང་ཕྱོགས་མཐུན་ལམ་ ཡར་དྲག་གི་དོན་ལས་ ཆིངས་ཡིག་ཁག་ ༡༢ ལུ་ མཚན་རྟགས་བཀོད་ཡོདཔ།

ཨེན་ཌི་ཊི་ཝི།
ནེ་པཱལ་དང་ རྒྱ་ནག་གི་བར་ན་ གོ་དོན་ཆིངས་ཡིག་གིས་གཙོས་པའི་ ཆིངས་ཡིག་ཁག་ ༡༢ ལུ་ མིང་རྟགས་བཀོད་ཡོདཔ་ད་ དེ་བཟུམ་མའི་ ཆིངས་ཡིག་བཟོ་ཚུ་ཡང་ རྒྱ་ནག་གི་བློན་ཆེན་ ལི་ཀི་ཨང་དང་ ནེ་པཱལ་གྱི་བློན་ཆེན་ པུཤ་པ་ཀ་མཱལ་ད་ཧཱལ་ ༢ ཀྱི་བར་ན་ རྒྱ་ཆེ་བའི་ གནད་དོན་ཚུ་གི་སྐོར་ལས་ གསུང་གྲོས་གནང་བའི་ཤུལ་ལུ་ བཟོ་ཡོདཔ་ཨིན་པས།
དེ་བསྒང་ བློན་ཆེན་གཉིས་ཆ་རའི་ ཁ་ཐུག་ལས་ རྒྱལ་ཁབ་ ༢ ཀྱི་ མཐུན་ལམ་དེ་ དམ་ཟབ་སྦེ་ར་ཡོད་པའི་ ཡིད་ཆེས་བྱུང་ཡོདཔ་མ་ཚད་ ད་ལས་ཕར་ཡང་ དཔལ་འབྱོར་དང་ ཚོང་འབྲེལ་ དེ་ལས་ མི་སེར་ཚུ་གི་བར་ན་ སྔར་བ་ལྷག་པའི་ འབྲེལ་བ་འཐབ་ཐོག་ལས་ མཉམ་འབྲེལ་ཡར་དྲག་གཏང་ནི་ཨིན་པའི་ གསུང་གྲོས་ཚུ་གནང་ནུག།
ཧེ་མར་ རྒྱ་ནག་ལུ་ རྒྱབ་སྐྱོར་ཡོད་མི་ ནེ་པཱལ་ཀ་མུས་ནིཛ་ སྲིད་ཚོགས་ཀྱི་འགོ་ཁྲིད་ ཀེ་པི་ཨོ་ལི་དང་ སྲིད་དོན་གྱི་ འབྲེལ་བ་མེདཔ་སྦེ་ སྡོད་ཡོད་རུང་ ཀ་མཱལ་ད་ཧཱལ་དེ་ ནེ་པཱལ་གྱི་ བློན་ཆེན་སྦེ་ བཙག་འཐུ་གྲུབ་ཞིནམ་ལས་ རྒྱ་གར་དང་ ཡུ་ཨེཛ་ལུ་ གཟིགས་སྐོར་གནང་པའི་ཤུལ་ལས་ རྒྱ་ནག་ལུ་ གཟིགས་སྐོར་གནང་མི་དེ་ འགོ་དང་པ་ཨིན་པས།
གོ་དོན་ཆིངས་ཡིག་དེ་ནང་ ནེ་པཱལ་དང་ རྒྱ་ནག་གི་བར་ན་ ཚོང་འབྲེལ་དང་ དངུལ་སྤྲོད་ལེན་ བསྐྱར་ཞིབ་ཀྱི་དོན་ལུ་ མཉམ་སྡོམ་ཁྱད་རིག་ ལས་བྱེད་སྡེ་ཚན་ཅིག་ཡང་ གཞི་བཙུགས་འབད་ནི་ཨིན་པའི་སྐོར་ལས་ ཚུད་དེ་ཡོད་ཟེར་བཀོད་ནུག།
ནེ་པཱལ་གྱི་བློན་ཆེན་ ཀ་མཱལ་ད་ཧཱལ་གྱིས་ རྒྱ་ནག་གི་སྲིད་འཛིན་ ཛི་ཇིན་པིང་དང་ཡང་ མཇལ་ཕྲད་མཛད་ནུག་ཟེར་ བཀོད་འདུག་པའི་གནས་ཚུལ།

Please follow and like us: