མི་དབང་མངའ་བདག་རིན་པོ་ཆེ་མཆོག་གིས་ དིལླི་ལུ་ རྒྱ་གར་གྱི་བློན་ཆེན་ ན་རེན་ད་ར་ མོ་དི་དང་མཇལ་ཕྲད།

སྤྱི་ཟླ་ ༡༡ པའི་ཚེས་ ༦ གི་ཕྱི་རོ་ མི་དབང་མངའ་བདག་རིན་པོ་ཆེ་མཆོག་གིས་ དིལླི་ལུ་ རྒྱ་གར་གྱི་བློན་ཆེན་ ན་རེན་ད་ར་ མོ་དི་དང་གཅིག་ཁར་ མཇལ་ཕྲད་མཛད་གནང་ནུག།

དེ་ཡང་ མི་དབང་མངའ་ཞབས་མཆོག་ རྒྱ་གར་གྱི་ བློན་ཆེན་མོ་དི་གིས་ ཁོ་རའི་གཞུང་དོན་གཟིམ་ཅུང་ནང་ ཕེབས་བསུ་ཞུ་ཞིནམ་ལས་ རྒྱ་འབྲུག་ ༢ ཀྱི་བར་ན་ མོས་མཐུན་ཅན་གྱི་ མཐའ་དོན་ལེ་ཤ་ཅིག་གི་སྐོར་ལས་ གསུང་གྲོས་ཚུ་ གནང་པའི་ཤུལ་ལས་ བློན་ཆེན་གྱིས་ མི་དབང་མཆོག་ལུ་ ཚོགས་སྟོན་ཅིག་ཡང་ དྲངས་ཡོདཔ་ཨིན་པས།

རྒྱ་གར་དིལླིར་ བཞུགས་པའི་རིང་ལུ་ མི་དབང་མཆོག་གིས་ རྒྱ་འབྲུག་མཐུན་འབྲེལ་ཚོགས་པའི་ འཐུས་མི་ཚུ་དང་ མི་སེར་དང་ མི་སེར་གྱི་བར་ན་ འབྲེལ་བ་འཐབ་སྟེ་ དོན་གཅོད་གོང་འཕེལ་གྱི་དོན་ལུ་ ལཱ་འབད་མི་ གཞུང་མིན་ལས་ཚོགས་ དིལླིའི་ཞིབ་འཇུག་སྡེ་ཚན་ཟེར་མི་ འཐུས་མི་ཚུ་དང་གཅིག་ཁར་ཡང་ མཇལ་ཕྲད་མཛད་གནང་ནུག།

དེ་མ་ཚད་ མི་དབང་མཆོག་གིས་ དིལླི་ལུ་ཡོད་མི་ ཚོང་འབྲེལ་འགོ་ཁྲིདཔ་ ཡོངས་གྲགས་ཅན་ དག་པ་ཅིག་དང་ཡང་ མཇལ་ཕྲད་མཛད་ཡོཅདཔ་ཨིན་པས།

མི་དབང་མངའ་ཞབས་མཆོག་ རྒྱ་གར་རྒྱལ་ཁབ་ནང་ བདུན་ཕྲག་ ༡ གི་དོན་ལས་ གཞུང་དོན་གཟིགས་སྐོར་ལུ་ བྱོན་ཏེ་ཡོདཔ་བཞིན་དུ་ མིང་དབང་མཆོག་གིས་ ཨ་སམ་དང་ དིལླི་ལུ་ གཟིགས་སྐོར་གནང་ཡོད་པའི་གནས་ཚུལ།