ཐིམ་ཕུ་རྟ་མགོ་ཆོས་དབྱིངས་རྫོང་ནང་ རྗེ་མཁན་ཁྲི་རབས་ ༦༨ པ་མཆོག་གི་ སྐུ་འདྲ་གདན་འདྲེན།

རང་ཟླ་ ༡༠ པའི་ཚེས་ ༣ སྤྱི་ཟླ་ ༡༡ པའི་ཚེས ༡༦ ལུ་ གཟའ་སྐར་དགེ་བའི་ཉིན་མར་ རྗེ་མཁན་ཁྲི་རབས་ ༦༨ པ་ སྐྱབས་རྗེ་ཞིང་གཤེགས་ བསྟན་འཛིན་དོན་གྲུབ་མཆོག་གི་ སྐུ་འདྲ་བྱིན་ཅན་ རྟ་མགོ་གསང་ཆེན་རྡོ་རྗེ་ཐེག་པའི་ སློབ་སྦྱོང་སྤེལ་ཁང་ནང་ གདན་འདྲེན་ཞུ་ནུག།

དེ་ཡང་ རྟ་མགོ་གསང་ཆེན་རྡོ་རྗེ་ཐེག་པའི་ སློབ་སྦྱོང་སྤེལ་ཁང་གི་ སྤྱི་འཛིན་གོངམ་ རྒྱལ་སྲས་མཆོག་སྤྲུལ་རིན་པོ་ཆེ་མཆོག་གིས་ རང་གི་རྩ་བའི་བླམ་ལུ་ སྐུ་གསུམ་ཡེ་ཤེས་ལྔའི་བདག་ཉིད་ རིགས་བརྒྱའི་ཁྱབ་བདག་ཨིན་པའི་ མོས་གུས་ཀྱིས་ དངུལ་ཀྲམ་ས་ཡ་ ༡ དེ་ཅིག་ མཆོག་སྤྲུལ་རིན་པོ་ཆེ་ རང་གི་ཕྱག་མཛོད་ནང་ལས་གནང་སྟེ་ གསར་བཞེངས་མཛད་ཡོདཔ་ཨིན་པས།

དེ་བཟུམ་སྦེ་ དད་ལྡན་སྦྱིན་བདག་སྤྱི་དང་ ལྷག་པར་དུ་ རྒྱལ་སྲས་མཆོག་སྤྲུལ་རིན་པོ་ཆེ་དང་ གཙུག་ལག་སློབ་དཔོན་སྐུ་བགྲེས་ བསམ་གཏན་རྡོ་རྗེ་ དབུ་བཞུགས་ཐོག་ལུ་ ཚོགས་ཆུང་ཅིག་ གཞི་བཙུགས་གནང་ཡོདཔ་བཞིན་དུ་ འཐུས་མི་སྡེ་ཚན་དེ་གིས་ མ་དངུལ་ས་ཡ་ ༤ དེ་ཅིག་ ཕངས་སེམས་མེད་པར་བཏང་སྟེ་ བཞེངས་ཡོད་མི་ ཁྲི་ཆེན་བསྟན་འཛིན་རབ་རྒྱས་ཀྱི་ སྐུ་འཕྲེང་རིམ་བྱོན་གྱི་ མཐོང་གྲོལ་ཆེན་མོ་དེ་ཡང་ རྟ་མགོ་ཆོས་དབྱིངས་གཙུག་ལག་ཁང་ནང་ གདན་འདྲེན་ཞུ་ཡོད་པའི་གནས་ཚུལ།