ལྷོ་ཀོ་རི་ཡ་དང་ རྒྱ་པཱན་ རྒྱ་ནག་ ༣ གྱི་ དབུ་ཁྲིད་ཞལ་འཛོམས་ བསྐྱར་འཛུགས་འབད་ནི།

ཨེ་བི་སི།
སྤྱི་ཟླ་ ༡༡ པའི་ཚེས་ ༢༤ ལུ་ ལྷོ་ཀོ་རི་ཡའི་ ཕྱི་འབྲེལ་ལྷན་ཁག་ལས་ བཤད་དོ་བཟུམ་འབད་བ་ཅིན་ ལྷོ་ཀོ་རི་ཡ་དང་ རྒྱ་པཱན་ རྒྱ་ནག་ ༣ གྱི་ དབུ་ཁྲིད་ཞལ་འཛོམས་ བསྐྱར་འཛུགས་ཀྱི་དོན་ལས་ ཆེ་མཐོའི་དོན་གཅོད་པ་ཚུ་ ཞལ་འཛོམས་ཅིག་ འཚོགས་དོ་ཟེར་ཨིན་པས།
དེ་ཡང་ བྱང་ཤར་ཨེ་ཤི་ཡའི་ རྒྱལ་ཁབ་ ༣ གྱི་བར་ན་ སྤྱི་ལོ་ ༢༠༡༩ ལས་ཚུར་ ནད་ཡམས་ཀོ་ཝིཌ་དང་ གཞན་ཡང་ མཐུན་ལམ་ལུ་ བྱ་སྟབས་མ་བདེཝ་ ཐོན་མི་ལུ་བརྟེན་ཏེ་ སྤྱི་ལོ་ ༢༠༠༨ ལས་ འགོ་བཙུགས་མི་ ལོ་བསྟར་དབུ་ཁྲིད་ཞལ་འཛོམས་དེ་ འཚོགས་མ་ཚུགསཔ་ཨིན་པས།
མ་གཞི་ ཁོང་རྒྱལ་ཁབ་ ༣ པོ་ དཔལ་འབྱོར་དང་ ལམ་སྲོལ་དང་འབྲེལ་བའི་ མཐུན་ལམ་དམ་ཟབ་ཡོད་རུང་ བར་སྐབས་ཅིག་ཁར་ འཛམ་གླིང་དམག་ཆེན་ ༢ པའི་སྐབས་ལུ་ རྒྱ་པཱན་གྱི་ གདུག་རྩུབ་དང་ ཡུ་ཨེཛ་དང་ རྒྱ་ནག་གི་དོ་འགྲན་ དེ་ལས་ བྱང་ཀོ་རི་ཡའི་ རྡུལ་ཕྲན་མཚོན་ཆ་ཚུ་གིས་ མཐུན་ལམ་ལུ་ བར་ཆད་བྱུང་ཡོདཔ་ཨིན་པས།
ད་རིས་ སྤྱི་ཟླ་ ༡༡ པའི་ཚེས་ ༢༦ ལུ་ རྒྱལ་ཁབ་ ༣ གྱི་ ཕྱི་འབྲེལ་བློན་པོ་ཚུ་ ལྷོ་ཀོ་རི་ཡའི་ བུ་སཱན་ཁྲོམ་ཁར་འཛོམས་ཏེ་ བསམ་འཆར་བརྗེ་སོར་དང་ མཉམ་འབྲེལ་ དེ་ལས་ ཕུང་ཕྱོགས་དང་ རྒྱལ་སྤྱིའི་གནད་དོན་ཚུ་གི་སྐོར་ལས་ གསུང་གྲོས་གནང་ནི་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: