ཐིམ་ཕུ་ལས་ སྨྱོ་རྫས་ནག་ཚོང་འཐབ་མི་ ཕོ་སྐྱེས་ཅིག་འཛིན་བཟུང་།

སྤྱི་ལོ་ ༢༠༢༤ སྤྱི་ཟླ་ ༢ པའི་ཚེས་ ༥ ལུ་ ཐིམ་ཕུ་རྒྱལ་གཞུང་འབྲུག་གི་འགག་སྡེ་གིས་ ཧེ་འཇོ་ལས་ སྐྱེས་ལོ་ ༢༩ འབད་མི་ ཕོ་སྐྱེས་ཅིག་ སྨྱོ་རྫས་ནག་ཚོང་ལུ་བརྟེན་ཏེ་ འཛིན་བཟུང་འབད་ནུག།
དེ་ཡང་ ཐིམ་ཕུ་ཧེ་འཇོ་ལུ་ཡོད་མི་ མི་ངོམ་དེ་གི་ སྡོད་གནས་ཁང་མིག་ནང་ལས་ སྨྱོ་རྫས་ཨེཛ་པི་པཱ་ལཱཛ་ཟེར་མི་ སྨན་ཐུམ་ ༢༣༤༠ དང་ ཊ་མ་ཌོལ་ དེ་ལས་ ཀོ་ཌིན་སྨན་སྦྱོར་ཅན་གྱི་ གློ་སྨན་ཁུ་བ་ དམ་སྦྱི་ ༡༡ ཐོབ་ཡོདཔ་ཨིན་པས།
རྒྱལ་གཞུང་འགག་སྡེ་གིས་ དབྱེ་ཞིབ་འབད་བའི་སྐབས་ལུ་ ཁོ་གིས་ སྨྱོ་རྫས་དེ་ཚུ་ ཕུན་ཚོགས་གླིང་གི་ ཉེ་འདབས་ལུ་ཡོད་མི་ རྒྱ་འབྲུག་རྒྱལ་ཁབ་ ༢ ཀྱི་ ས་མཚམས་ཁྲོམ་སྡེ་ ཇའི་སྒང་ལས་ རྒྱ་གར་གྱི་ མི་ཁུངས་ཅིག་ལས་ཉོ་སྟེ་ ཐིམ་ཕུ་ལུ་ འབག་འོང་ཡོད་པའི་ ཤེས་གསལ་བྱུང་ནུག།
ག་དེ་སྦེ་ར་ཨིན་རུང་ རྒྱལ་གཞུང་འབྲུག་གི་འགག་སྡེ་གིས་ མི་ངོམ་དེ་གི་ ཁྲིམས་འགལ་གྱི་ ལཱ་ཚུ་གི་སྐོར་ལས་ ཁ་གསལ་སྦེ་ ཤེས་ནིའི་དོན་ལུ་ ཁོ་གི་འགྲུལ་འཕྲིན་དང་ འགྲུལ་བསྐྱོད་ དེ་ལས་ དངུལ་ཁང་ལག་ལེན་དང་ འགྲུལ་འཕྲིན་ཐོག་གི་ བརྒྱུད་འབྲེལ་ཚུ་ བརྟག་དཔྱད་འབད་དོ་ཟེར་ རྒྱལ་གཞུང་འབྲུག་གི་འགག་སྡེའི་ གཞུང་འབྲེལ་ཕེཛ་བུག་ནང་ བཀོད་ཡོད་འི་གནས་ཚུལ།

Please follow and like us: