ཀེན་ཡའི་རྒྱལ་ས་ ནའི་རོ་བི་ལུ་ ཆུ་རུད་དང་ ས་རུད་ཚུ་གིས་གནོད་སྐྱོན།

ཨཱལ་ཇ་ཟི་ར།
སྤྱི་ཟླ་ ༤ པའི་ཚེས་ ༢༥ ལུ་ ཀེན་ཡའི་རྒྱལ་ཁབ་ ཧ་ལམ་ཕྱེད་ཀ་དེ་ཅིག་ར་ ཆུ་རུད་ཀྱིས་ འཕྱགས་བདའ་ཡོདཔ་ལས་ མི་གྲངས་ ༣༢ དེ་ཅིག་ལུ་ ཤི་རྐྱེན་དང་ མི་ ༢ དེ་ཅིག་ བྱང་སྟོར་ཤོར་ཡོདཔ་མ་ཚད་ མི་གྲངས་ ༡༠༣,༥༠༠ དེ་ཅིག་ལུ་ཡང་ གནོད་སྐྱོན་བྱུང་ནུག།
དེ་ཡང་ སྤྱི་ཟླ་ ༣ པའི་ ཟླ་ཕྱེད་དེ་ཅིག་ལས་ར་ ཆརཔ་རྐྱབ་ནི་ འགོ་བཙུགས་ཡོདཔ་ད་ འདས་པའི་བདུན་ཕྲག་ནང་ལས་ ཆུ་རུད་ཐོན་ནི་ འགོ་བཙུགས་ཡོདཔ་བཞིན་དུ་ ཆུ་རུད་དེ་གིས་ མང་ཤོས་ཅིག་ ཨམ་སྲུ་དང་ ཨ་ལོ་ཚུ་ཨིན་མི་ མི་གྲངས་ ༦༠,༠༠༠ དེ་ཅིག་ལུ་ གནོད་སྐྱོན་བྱུང་ཡོདཔ་མ་ཚད་ སྣུམ་འཁོར་ཚུ་དང་ མི་ལེ་ཤ་ཅིག་ཡང་ ཆུ་རུད་ནང་ཐོགས་ཏེ་ ལུས་ཡོད་པའི་སྐོར་ལས་ ནའི་རོ་བི་ མངའ་སྡེ་གཙོ་འཛིན་གྱིས་ བཤད་ཡོདཔ་ཨིན་པས།
ད་རུང་ཡང་ སྤྱི་ཟླ་ ༥ པ་ཚུན་ རྒྱལ་ཁབ་ཀྱི་ ས་གནས་ཁག་སོ་སོའི་ནང་ ཆརཔ་སྦོམ་སྦེ་ར་ རྐྱབ་ནི་ཨིན་པའི་སྐོར་ལས་ ཀེན་ཡ་གནམ་གཤིས་ལས་ཁུངས་ཀྱིས་ ཉེན་བརྡ་འབད་ཡོདཔ་སྦེ་བཀོད་ནུག།
དེ་འབདཝ་ལས་ ཀེན་ཡའི་རེལ་ལི་ཚུ་ གནས་སྐབས་ཅིག་གི་དོན་ལས་ འགྲུལ་བསྐྱོད་བཀག་དམ་འབད་བའི་ཁར་ འཁོར་ལམ་ཁག་ ༤ དེ་ཅིག་གི་ནང་ཡང་ སྣུམ་འཁོར་ཚུ་ འགྲོ་འགྲུལ་འབད་ནི་མེདཔ་སྦེ་ བཀག་དམ་འབད་ཡོདཔ་ཨིན་པས།
དེ་བཟུ་མའི་ ཆུ་རུད་ལུ་བརྟེན་ཏེ་ རང་སོའི་ཚེ་སྲོག་ སྲུང་སྐྱོབ་འབད་ཐབས་ལུ་ མི་དེ་ཚུ་ ཁྱིམ་ཐོག་གུ་ འཛེགས་ཏེ་ཡོདཔ་མ་ཚད་ ནགས་ཤིངཚུ་ཡང་འགྱེལ་ཏེ་ འཁོར་ལམ་བསུབ་ནི་དེ་གིས་ ཡིག་ཚང་ཚུ་ནང་ཡང་ འགྲུལ་སྐྱོད་འབད་མ་ཚུགས་པར་ ཐོགས་ལུས་སོང་ནུག་ཟེར་ བཀོད་འདུག་པའི་གནས་ཚུལ།

Please follow and like us: