གེ་སར་རྒྱལ་པོ་ གསོ་རིག་གཙུག་ལག་སློབ་སྡེའི་འོག་ལུ་ཡོད་མི་ ནད་གཡོག་དང་ མི་མང་འཕྲོད་བསྟེན་ གཞི་བཙུགས་འབད་དེ་ ལོ་ངོ་ ༥༠ འཁོར་བའི་ དུས་སྟོན་བརྩི་སྲུང་།

སྤྱི་ཟླ་ ༥ པའི་ཚེས་ ༢ ལུ་ མི་དབང་ཨ་ཞེ་སྐལ་བཟང་དབང་མོ་དབང་ཕྱུག་མཆོག་གིས་ གེ་སར་རྒྱལ་པོ་གསོ་རིག་གཙུག་ལག་སློབ་སྡེའི་འོག་ལུ་ཡོད་མི་ ནད་གཡོག་དང་ མི་མང་འཕྲོད་བསྟེན་ གཞི་བཙུགས་འབད་དེ་ ལོ་ངོ་ ༥༠ འཁོར་བའི་ དུས་སྟོན་བརྩི་སྲུང་དང་འབྲེལ་ཏེ་ ནད་གཡོག་ཚན་རིག་གི་ མཐོ་རིམ་གོང་མའི་ ཤེས་ཚད་ལས་རིམ་ འགོ་འབྱེད་རྟེན་འབྲེལ་མཛད་སར་ དབུ་བཞུགས་མཛད་གནང་ནུག།
མཐོ་རིམ་གོང་མའི་ ཤེས་ཚད་ལས་རིམ་དེ་ ད་རེས་ འགོ་འབྱེད་གནང་ཡོད་རུང་ རྩ་གཞུང་ཚུ་ གཏན་འཁེལ་འབད་བའི་བསྒང་ཡོདཔ་ལས་ སློབ་སྦྱོང་གི་ཐེད་ཁར་ སྤྱི་ལོ་ ༢༠༢༥ ལས་མ་གཏོགས་ འགོ་མི་བཙུགས་ནི་ཨིན་པས།
དེ་མ་ཚད་ ནད་གཡོག་དང་ མི་མང་འཕྲོད་བསྟེན་ གཞི་བཙུགས་འབད་དེ་ མི་ལོ་ ༥༠ འཁོར་བའི་ དུས་དྲན་དཔེ་དེབ་ཅིག་ཡང་ གསར་བཏོན་འབད་ཡོདཔ་ད་ དེ་བསྒང་ ཧེ་མའི་འགོ་འཛིན་ བཙན་སྐྱོགས་རྡོ་རྗེ་ལུ་ ཚེ་ཐེངས་ཅིག་ར་ ལས་རིམ་དེ་ནང་ ཕན་འདེབས་འབད་བའི་ ངོས་འཛིན་ལུ་ རྟགས་མ་ཡང་གནང་ནུག།
དུས་སྟོན་དེ་ནང་ གསོ་བའི་བློན་པོ་དང་ ཆེ་མཐོའི་འགོ་དཔོན་ཚུ་གིས་གཙོས་པའི་ གཙུག་ལག་སློབ་སྡེའི་ནང་ལས་ མཐར་འཁྱོལ་མི་ཚུ་གིས་ གྲལ་གཏོགས་འབད་ཡོད་པའི་གནས་ཚུལ།

Please follow and like us: