སྤ་རོ་ཨྱོན་པདྨ་ཟངས་མདོག་དཔལ་རི་ལུ་ རིན་ཆེན་གཏེར་མཛོད་ཀྱི་བཀའ་དབང་།

སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་གིས་ སྤ་རོ་བོང་སྡེ་ ཨྱོན་པདྨ་ཟངས་མདོག་དཔལ་རིའི་ ས་ཁོངས་ནང་སྦེ་ མཁན་སྤྲུལ་དང་ བླ་སློབ་ དགེ་སློང་ སྒོམ་ཆེན་ ཨ་ཎེམ་ཚུ་གིས་གཙོས་པའི་ དད་ལྡན་སེར་སྐྱ་ཕོ་མོ་ཡོངས་ལུ་ རིན་ཆེན་གཏེར་མཛོད་ཀྱི་ དབང་ལུང་ཁྲིད་ ༣ གནང་བཞིན་དུ་ཡོདཔ་ཨིན་པས།
དེ་ཡང་ རང་ཟླ་ ༦ པའི་ཚེས་ ༧ སྤྱི་ཟླ་ ༧ པའི་ཚེས་ ༡༣ ལུ་ སྡིག་སྒྲིབ་དག་བྱེད་ ཁྲུས་ལུང་དབང་དང་། མེ་ཐུན་སོགས་ བགེགས་བསྐྲད་སྟ་གོན་དབང་། དངོས་གཞི་བུམ་དབང་ སྣང་སྟོང་རང་གྲོལ་དབང་། གསང་དབང་རྩ་རླུང་རང་གྲོལ་དབང་། ཤེར་དབང་བདེ་སྟོང་རང་གྲོལ་དབང་། ཚིག་དབང་སེམས་ཉིད་རང་གྲོལ་དབང་། རིག་པའི་རྩལ་དབང་ འོད་སྣང་རང་གྲོལ། མངའ་རི་ཚུལ་བཟང་ ཐུགས་ཆེན་ཡི་གེ་དྲུག་པའི་རིག་གཏད། ལེགས་ལྡན་རྗེའི་ཐུགས་ཆེན་འཁོར་སྒྲོལ་དབང་ དངོས་སྟ་སྦྲེལ་མ། ཞིག་གླིང་ཐུགས་ཆེན་ ནམ་མཁའི་རྒྱལ་པོའི་དབང་ སྟ་གོན་བཅས་གནང་ནུག།
དེ་སྦེ་ ཟླ་ངོ་ཕྱེད་དང་ ༤ གི་རིང་ལུ་ གནང་ནི་ཨིན་མི་ བཀའ་དབང་དེ་ རང་ཟླ་ ༤ པའི་ཚེས་ ༢༡ སྤྱི་ཟླ་ ༥ པའི་ཚེས་ ༢༩ ལས་ འགོ་བཙུགས་གནང་ཡོདཔ་བཞིན་དུ་ རང་ཟླ་ ༦ པའི་ཚེས་ ༧ སྤྱི་ཟླ་ ༧ པའི་ཚེས་ ༡༣ ལུ་ ཉིན་གྲངས་ ༤༣ སོང་ཡོདཔ་ད་ སྤྱི་ཟླ་ ༩ པའི་ཚེས་ ༢༣ ལུ་ འགྲོལ་གནང་ནི་གི་ ལས་རིམ་ཡོདཔ་ཨིན་པས།
དེ་བཟུམ་མའི་ རིན་ཆེན་གཏེར་མཛོད་ཀྱི་ དབང་ལུང་ཁྲིད་ ༣ དེ་ མཁན་སྤྲུལ་ཀརྨ་འཇིགས་མེད་མཆོག་གིས་ དབུ་གཙོས་པའི་ ཨྱོན་པདྨ་ཟངས་མདོག་དཔལ་རིའི་ ཆོས་ཚོགས་ཀྱིས་ འགོ་འདྲེན་འཐབ་དོ་ཡོདཔ་མ་ཚད་ བཀའ་དབང་ཞུ་མི་ཚུ་ལུ་ འགོ་འདྲེན་པའི་ཁ་ཐུག་ལས་ ཉིན་བསྟར་བཞིན་དུ་ གསོལ་ཇ་དང་ གསོལ་ཚོགས་ཚུ་ཡང་ དྲང་དོ་ཡོདཔ་ཨིན་པས།
དེ་མ་ཚད་ ཟངས་མདོག་དཔལ་རིའི་ གཙུག་ལག་ཁང་གི་གདོང་ཁར་ མི་གྲངས་ ༡༢,༠༠༠ ལྷགཔ་ཅིག་ཤོང་པའི་ དབང་ཁང་རྐྱབ་པའི་གུ་ སྒེར་གྱི་ས་ཆ་ཨེ་ཀར་ ༡ ལེན་ཞིནམ་ལས་ ཕོ་སྐྱེས་ཀྱི་གསང་སྤྱོད་ ༦༤ དང་ ཨམ་སྲུའི་གསང་སྤྱོད་ ༥༦ ས་དོང་བརྐོ་སྟེ་ རྐྱབ་ཡོདཔ་ད་ དེ་ལས་ བླ་སྤྲུལ་དང་ དགེ་སློང་ཚུ་གི་དོན་ལས་ གྲྭ་ཤག་ནང་ དེང་སང་གི་ གསང་སྤྱོད་ ༦༠ དེ་ཅིག་ཡང་ གཞི་བཙུགས་འབད་ནུག།
དེ་བཟུམ་སྦེ་ གནམ་བྱར་གྱི་ དུས་ཚོད་ཁར་ གཟུགས་ཁམས་འཕྲོད་བསྟེན་དང་ གཙང་སྦྲ་བསྟེན་དགོཔ་ཚུ་ཡང་ ག་ནི་བ་ གལ་ཆེ་བའི་ གནད་ལུ་བརྟེན་ཏེ་ དབང་ཁང་གི་ གཡས་གཡོན་ལུ་ ཆུ་འཐུང་ནི་དང་ ལགཔ་འཁྱུ་ནིའི་དོན་ལས་ ཆུའི་ཀ་ལི་ ༦༠ དེ་ཅིག་ཡང་ བཟོ་བསྐྲུན་འབད་དེ་ཡོདཔ་ཨིན་པའི་གནས་ཚུལ།

Please follow and like us: