རྒྱ་གར་ཀེ་ར་ལ་མངའ་སྡེའི་ ཆརཔ་ཤུགས་སྦེ་ རྐྱབ་ནི་དེ་གིས་ ས་རུད་ཆད་དེ་ མི་གྲངས་ ༡༢༣ ལུ་ཤི་རྐྱེན།

བི་བི་སི།

རྒྱ་གར་གྱི་ ལྷོ་ཕྱོགས་མངའ་སྡེ་ ཀེ་ར་ལ་ལུ་ ཆརཔ་ཤུགས་སྦེ་ རྐྱབ་ནི་དེ་གིས་ ས་རུད་ཆད་དེ་ མི་གྲངས་ ༡༢༣ དེ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ མི་ལེ་ཤ་ཅིག་ཡང་ འཚོལ་མ་ཐོབ་པར་ཡོདཔ་ཨིན་པས།

ས་རུད་དེ་ཡང་ སྤྱི་ཟླ་ ༧ པའི་ཚེས་ ༣༠ གི་དྲོ་པར་ ཝ་ཡ་ནཱད་ཟེར་མི་ རྫོང་ཁག་ནང་ མི་སེར་མང་ཤོས་ཅིག་ གཉིད་ལོག་སྟེ་ སྡོད་པའི་སྐབས་ལུ་ ཆད་ཡོདཔ་ད་ སྲོག་སྐྱབས་ཀྱི་ལཱ་ཚུ་ འབད་བའི་བསྒང་ཡོད་རུང་ ཆརཔ་མ་ཆདཔ་སྦེ་ རྐྱབ་མི་དང་ གནད་འགག་ཅན་གྱི་ ཟམ་ཅིག་ཡང་ རམ་ཡར་སོང་པ་ལུ་བརྟེན་ཏེ་ སྲོག་སྐྱབས་ཀྱི་ ལཱ་འབད་ནི་ལུ་ བར་ཆད་འབྱུང་སྟེ་ཡོདཔ་ཨིན་པས།

དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ རྐྱེན་ངན་དེ་ནང་ ཤི་རྐྱེན་བྱུང་མི་ ཡར་འཕར་འགྱོ་ནི་བཟུམ་ཅིག་ཡོད་མི་དེ་ཡང་ གློ་བུར་གྱི་ ཞབས་ཏོག་ཚུ་ ལྷོད་མ་ཚུགས་པའི་ ས་ཁོངས་ནང་ མི་གྲངས་ ༡༠༠ དེ་ཅིག་ འོང་ནི་བཟུམ་ཅིག་འདུག་ཟེར་ཨིན་པས།

སྤྱི་ལོ་ ༢༠༡༨ ལོར་ ཀེ་རེ་ལ་ལུ་ ཆུ་རུད་ཐོན་ཏེ་ མི་གྲངས་ ༤༠༠ ལྷགཔ་ཅིག་ལུ་ ཤི་རྐྱེན་བྱུང་མི་དེ་ རྐྱེན་ངན་སྦོམ་ཤོས་ཅིག་ཨིནམ་ད་ ད་རེས་ གཞུང་གི་ཁ་ཐུག་ལས་ རྐྱེན་ངན་བྱུང་སའི་ ས་ཁོངས་ནང་ དྲག་པོའི་དམག་མི་ ༢༠༠ དེ་ཅིག་ འཚོལ་ཞིབ་དང་ སྲོག་སྐྱབས་ཀྱི་དོན་ལས་ བཙུགས་ཡོདཔ་ཨིན་པས།

ད་རེས་ ས་གནས་ཀྱི་ སྨན་ཁང་ཚུ་ནང་ རྨ་སྐྱོན་བྱུང་མི་ ༡༢༣ དེ་ཅིག་ལུ་ སྨན་བཅོས་འབད་དོ་ཡོདཔ་ད་ མི་གྲངས་ ༣,༠༠༠ ལྷགཔ་ཅིག་ སྲོག་སྐྱབས་འབད་དེ་ གནས་སྐབས་ཀྱི་ སྡོད་སྒར་ ༤༥ གི་ནང་ སྤོ་བཤུད་འབད་དེ་ བཞག་ནུག་ཟེར་ བཀོད་འདུག་པའི་གནས་ཚུལ།