ཨིཛ་རེལ་གྱི་ དམག་མི་ཚུ་གིས་ པེ་ལིཛ་ཊིན་གྱི་ས་ཁོངས་ ཝེཛ་བེང་ལུ་གནོད་འཚུབ།

བི་བི་སི།
སྤྱི་ཟླ་ ༨ པའི་ཚེས་ ༢༨ ལུ་ པེ་ལིཛ་ཊིན་གྱི་ གསོ་བའི་འགོ་དཔོན་ཚུ་གིས་འབད་བ་ཅིན་ ཝེཛ་བེང་ས་ཁོངས་ཀྱི་ བྱང་ཕྱོགས་ལུ་ ཨིཛ་རེལ་གྱི་ དམག་མི་ཚུ་གིས་ གནོད་འཚུབ་བཀལ་ཏེ་ པེ་ལིཛ་ཊིན་གྱི་ མི་སེར་ ༡༡ དམར་བསད་འབད་ཡི་ཟེར་ཨིན་པས།
ཨིཛ་རེལ་གྱི་ སྲུང་སྐྱོབ་དམག་སྡེ་གིས་ ཇེ་ནིན་དང་ ཊུལ་ཀཱམ་ཁྲོམ་ཁར་ཡོད་མི་ དྲག་ཐོག་དབང་བཙོང་འབད་མི་ཚུ་གི་ འཇིགས་བསྐུལ་གྱི་ ལཱ་ཚུ་གི་རྒྱབ་འགལ་ལུ་ ཕྱད་མདའ་རྐྱབ་དོ་ཡོདཔ་སྦེ་ བཤད་ཡོདཔ་ད་ དེ་ཡང་ པེ་ལིཛ་ཊིན་གྱི་ཁྲོམ་ ཇེ་ནིན་དང་ ཊུལ་ཀཱམ་ ནབ་ལུཛ་ དེ་ལས་ ཊུ་བཱཛ་ཚུ་ལུ་ དམིགས་གཏད་བསྐྱེད་དེ་ གནོད་འཚུབ་བཀལ་ཡོདཔ་སྦེ་བཤད་ནུག།
དེ་མ་ཚད་ ཨིཛ་རེལ་གྱི་ དམག་མི་ཚུ་གིས་ ཇེ་ནིན་ཁྲོམ་ཁར་ སྨན་ཁང་ཅིག་གི་ནང་ཡང་ བཙན་འཛུལ་དང་ ཊུལ་ཀཱམ་ཁྲོམ་གྱི་ འཁོར་ལམ་ཁག་ ༢ ཡང་ བཀག་ཆ་འབད་བཞག་ནུག་ཟེར་ཨིན་པས།
ཨིཛ་རེལ་གྱི་ ཕྱི་འབྲེལ་བློན་པོ་ ཨིཛ་རེལ་ཀཱཛ་གིས་ ཁོང་གི་སྲུང་སྐྱོབ་དམག་མི་ཚུ་གིས་ ཇེ་ནིན་དང་ ཊུལ་ཀཱམ་ཁྲོམ་ཚུ་ནང་ ཨི་རཱན་གྱིས་ རྒྱབ་སྐྱོར་འབད་མི་ ཨིཛ་ལ་མིག་དྲག་ཐོག་དབང་བཙོང་འབད་མི་ཚུ་གི་ གཞི་རྟེན་མཁོ་ཆས་ཚུ་ མེདཔ་གཏང་ཐབས་ལུ་ བརྩོན་ཤུགས་ཐོག་ལས་ ཕྱད་མདའ་རྐྱབ་དོ་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: