ཨཕ་རི་ཀ་ ཀེ་ནི་ཡ་ལུ་ སློབ་གྲྭ་ཅིག་ནང་ མེ་རྐྱེན་ཤོར་ཏེ་ སློབ་ཕྲུག་ཚུ་ལུ་ཤི་རྐྱེན།

ཨཱལ་ཇ་ཟི་ར།
སྤྱི་ཟླ་ ༩ པའི་ཚེས་ ༦ ལུ་ ཨཕ་རི་ཀའི་རྒྱལ་ཁབ་ ཀེ་ནི་ཡའི་ ཁྲིམས་སྲུང་འགག་སྡེ་གིས་ བཤད་དོ་བཟུམ་འབད་བ་ཅིན་ སློབ་གྲྭ་ཅིག་ནང་ མེ་རྐྱེན་ཤོར་ཏེ་ སློབ་ཕྲུག་ ༡༧ དེ་ཅིག་ལུ་ ཤི་རྐྱེན་དང་ ༡༣ ལུ་ རྨ་སྐྱོན་ཚབས་ཆེན་སྦེ་ར་ བྱུང་ནུག་ཟེར་ཨིན་པས།
དེ་ཡང་ ཀེ་ནི་ཡའི་མངའ་སྡེ་ ཉེ་རི་ཟེར་སར་ སྒང་ཏོག་ཅིག་གུ་ ཆགས་ཏེ་ཡོད་མི་ ཧིལ་ས་ཡིཊ་ཨེན་ད་ར་ཤ་ གཞི་རིམ་སློབ་གྲྭར་ མེ་རྐྱེན་བྱུང་པའི་ཤུལ་ལས་ རྨ་སྐྱོན་བྱུང་མི་ཚུ་ སྨན་ཁང་ཅིག་ནང་ སྨན་བཅོས་འབད་ནུག།
མེ་རྐྱེན་དེ་ནང་ ཤི་རྐྱེན་བྱུང་མི་ཚུ་ག་ར་ ཨ་ལོ་ཆུང་ཀུ་ཚུ་ཨིནམ་སྦེ་ ངོས་འཛིན་བྱུང་ཡོད་རུང་ ཁོང་གི་ཕུངམོ་ཚུ་ ངོ་ཕྱེ་མ་ཚུགསཔ་སྦེ་ར་ འཚིགས་ཡོདཔ་ད་ སློབ་གྲྭ་དེ་ནང་ སྐྱེས་ལོ་ ༥ ལས་ ༡༢ ཚུན་འབད་མི་ སློབ་ཕྲུག་ ༨༠༠ དེ་ཅིག་ཡོདཔ་ཨིན་པས།
ཁྲིམས་སྲུང་འགག་སྡེའི་མགྲིན་ཚབ་ རེ་སི་ལ་ ཨོ་ཉང་གོ་གིས་ བཤད་དོ་བཟུམ་འབད་བ་ཅིན་ མེ་རྐྱེན་དེ་ ག་དེ་སྦེ་ བྱུང་བྱུངམ་ཨིན་ནའི་སྐོར་ལས་ ཞིབ་དཔྱད་ཚུ་འབད་དོ་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: