མི་དབང་མཆོག་གིས་ ནེ་པཱལ་ཀཋ་མཱན་ཌུ་ལུ་གཟིགས་སྐོར།

སྤྱི་ཟླ་ ༡༢ པའི་ཚེས་ ༦ ལུ་ མི་དབང་མངའ་བདག་རིན་པོ་ཆེ་མཆོག་ རྒྱ་གར་དིལླི་ལུ་ གཞུང་དོན་གཟིགས་སྐོར་ གནང་པའི་ཤུལ་ལས་ རྒྱལ་ཁབ་ནང་ ལོག་བྱོན་པའི་ལམ་ཁར་ ནེ་པཱལ་གྱི་རྒྱལ་ས་ ཀཋ་མཱན་ཌུ་ལུ་ སོ་ཝ་ཡམ་བྷུ་དང་ མཆོད་རྟེན་བྱ་རུང་ཁ་ཤོར་ལུ་ གཟིགས་སྐོར་གནང་ནུག།
སོ་ཝ་ཡམ་བྷུ་དེ་ ཀཋ་མཱན་ཌུའི་ ལུང་གཤོང་གི་ སྒང་ཏོག་ཅིག་གུ་ ཆགས་ཏེ་ཡོདཔ་ད་ དེ་ཡང་ ནེ་པཱལ་གྱི་ ཆོས་བྱུང་ནང་ གནས་འགངས་ཅན་ཅིག་ཨིན་པས།
དེ་བཟུམ་སྦེ་ ཀཋ་མཱན་ཌུའི་ ཁྲོམ་གྱི་སྦུག་ན་ ཆགས་ཏེ་ཡོད་མི་ མཆོད་རྟེན་བྱ་རུང་ཁ་ཤོར་དེ་ཡང་ གུ་རུ་རིན་པོ་ཆེའི་ སྐུ་ཚེ་སྔ་མ་ཅིག་དང་ འབྲེལ་བ་ཡོདཔ་ལས་ ཞི་བདེ་དང་ བྱང་ཆུབ་ཐོབ་པའི་ བརྡ་མཚོན་ལུ་ བྱང་ཆུབ་མཆོད་རྟེན་ཟེར་ཡང་ མཚན་གསོལ་ཏེ་ཡོདཔ་ད་ གནས་ཆེན་དེ་ ༢ ཀྱི་ནང་ མི་དབང་མངའ་ཞབས་མཆོག་གིས་ ཐུགས་སྨོན་ཚུ་གནང་ནུག།
མི་དབང་མངའ་བདག་རིན་པོ་ཆེ་མཆོག་ ཏིར་བྷུ་བཱན་ རྒྱལ་སྤྱི་གནམ་གྲུ་ཐང་ནང་ ཕེབས་པའི་སྐབས་ལུ་ ནེ་པཱལ་གྱི་ ཕྱི་འབྲེལ་བློན་པོ་ ཨམ་ཨར་ཟུ་ར་ན་ དེའུ་བ་གིས་ ཕེབས་བསུ་ཞུ་ཡོདཔ་ད་ མི་དབང་མཆོག་གིས་ ནེ་པཱལ་གྱི་ མི་སེར་ཚུ་གིས་ བྱོན་ལེགས་ཞུ་མི་ལུ་ བཀའ་དྲིན་དགའ་ཚོར་ཡོད་ལུགས་ཚུ་ གསུངས་གནང་ཡོད་པའི་གནས་ཚུལ།

Please follow and like us: