སྐྱབས་རྗེ་རྗེ་མཁན་རིན་པོ་ཆེ་མཆོག་ དབུ་བཞུགས་ཐོག་ལས་ བཛྲ་གུ་རུ་དུང་སྒྲུབ།

རང་ཟླ་ ༡༠ པའི་ཚེས་ ༡༠ སྤྱི་ཟླ་ ༡༢ པའི་ཚེས་ ༡༠ ལས་ འགོ་བཙུགས་ཏེ་ ལྷུན་རྩེ་ཨའུ་མཚོ་རྣམ་གྲོལ་གླིང་དགོན་འཛིན་གྲྭ་ཚང་ནང་ སྐྱབས་རྗེ་རྗེ་མཁན་རིན་པོ་ཆེ་མཆོག་ དབུ་བཞུགས་ཐོག་ལུ་ བླ་སློབ་དང་ དགེ་སློང་ཞལ་གྲངས་ ༢༠༠ ལྷགཔ་ཅིག་གིས་ གུ་རུ་ཐོད་འཕྲེང་རིགས་ལྔའི་སྒོ་ལས་ བཛྲ་གུ་རུ་དུང་སྒྲུབ་ བསགས་གནང་ནི་གི་ མཛད་རིམ་ཡོདཔ་ཨིན་པས།

དེ་ལས་ རང་ཟླ་ ༡༠ པའི་ཚེས་ ༡ ནས་ ༩ ཚུན་ སངས་རྒྱས་འོད་དཔག་མེད་ཀྱི་ སྒྲུབ་ཆེན་ཚོགས་གནང་མི་དེ་ རང་ཟླ ༡༠ པའི་ཚེས་ ༩ སྤྱི་ཟླ་ ༡༢ པའི་ཚེས་ ༩ ལུ་ དངོས་གྲུབ་བླངས་ཆོག་དང་བཅསཔ་སྦེ་ གྲོལ་གནང་ནུག།

སྒྲུབ་ཆེན་དེ་ སྐྱབས་རྗེ་ཡིད་བཞིན་ནོར་བུ་མཆོག་དང་ མ་ཡུམ་གྱིས་ སྦྱིན་བདག་མཛད་ཐོག་ལས་ ཚོགས་གནང་ཡོདཔ་ད་ དེ་ཡང་ སྤྱིར་འཛམ་བུའི་གླིང་ནང་ དམག་འཁྲུག་ལུ་བརྟེན་ཏེ་ མིའི་ཚེ་སྲོག་ལུ་ བར་ཆད་བྱུང་མི་ཚུ་དང་ ལྷག་པར་དུ་ ང་བཅས་རའི་ དཔལ་ལྡན་འབྲུག་པའི་ རྒྱལ་ཁབ་འདི་ནང་ སྔར་ལས་ལྷག་པའི་ ཞི་བདེ་འབྱུང་ཐབས་ལུ་ཨིན་པའི་ གནས་ཚུལ་མདོར་བསྡུས།