ལྷོ་ཀོ་རི་ཡ་ལུ་ ཚོགས་རྒྱན་བསྐྱུར་ཐོག་ལས་ ཡུན་སུག་ཡེ་ཨོལ་དེ་ སྲིད་འཛིན་ལས་ཕྱིར་དབྱུངས།

རོའི་ཊརཛ།
སྤྱི་ཟླ་ ༡༢ པའི་ཚེས་ ༡༤ ལུ་ ལྡོག་ཕྱོགས་ཚོགས་པའི་ འགོ་ཁྲིད་ཐོག་ལུ་ སྤྱི་ཚོགས་ནང་ ཚོགས་རྒྱན་ཐེངས་ ༢ པ་ བསྐྱུར་ཐོག་ལས་ ཡུན་སུག་ཡེ་ཨོལ་དེ་ ལྷོ་ཀོ་རི་ཡའི་ སྲིད་འཛིན་གྱི་ གོ་གནས་ལས་ ཕྱིར་དབྱུངས་འབད་ནུག།
དེ་ཡང་ སྲིད་འཛིན་ཡུན་སུག་གིས་ རྒྱལ་ཁབ་ནང་ མི་སེར་ཚུ་ ཧ་ལས་བཅུག་ཐོག་ལས་ དུས་ཡུན་ཐུང་ཀུ་ཅིག་གི་རིང་ལུ་ དྲག་པོའི་གཞུང་ བཙུགས་ཐབས་འབད་ནི་དེ་གིས་ཨིནམ་ད་ སྲིད་འཛིན་ཡུན་སུག་དེ་ ཤུལ་མའི་ཟླ་ངོ་ ༦ གི་ ནང་འཁོད་ལུ་ ཕྱིར་བཏོན་འབད་མི་འབད་ཀྱི་ཐེད་ཁར་ རྩ་ཁྲིམས་ཅན་གྱི་ ཁྲིམས་འདུན་ལས་ གྲོས་ཐག་གཅད་ནི་ཨིན་པས།
ད་རེས་ སྲིད་འཛིན་ཡུན་གྱིས་ བློན་ཆེན་སྦེ་ བསྐོ་བཞག་འབད་མི་ ཧཱན་ཌག་སུ་དེ་ སྲིད་འཛིན་ངོ་ཚབ་སྦེ་ བསྐོས་ཡོདཔ་ད་ སྲིད་འཛིན་ཡུན་དེ་ཡང་ ཡིག་ཚང་ནང་ར་ སྡོད་ནི་ཨིན་རུང་ དབང་ཆ་ཚུ་ བཀག་དམ་འབད་ནུག།
ལྷོ་ཀོ་རི་ཡ་ལུ་ དེ་སྦེ་ སྲིད་འཛིན་ཕྱིར་དབྱུངས་འབད་མི་དེ་ ཐེངས་ ༢ པ་ཨིནམ་ད་ ཐེངས་དང་པའི་ནང་ སྤྱི་ལོ་ ༢༠༡༧ ལུ་ སྲིད་འཛིན་པཱག་ཡུན་ཧེ་དེ་ ཕྱིར་དབྱུངས་འབད་ནུག་ཟེར་ བཀོད་འདུག་པའི་གནས་ཚུལ།

Please follow and like us: